গণাণা 23
23
বিলিয়মর মুয়োনত্ গোজেনর্ দিয়্যে পত্তম্ আগাম কধা
1পরেদি বিলিয়মে বালাকরে কলঅ, “তুই মত্তে ইয়েনত্ সাত্তো পূজো বানেইনে সাত্তো বলদ গোরু আর সাত্তো ভেড়া ছাগল উৎসর্বত্তে যুক্কোল্ গুরিচ্।” 2বালাকে বিলিয়মর কধা মজিম কাম্ গুরিলো আর দ্বিজনে মিজেইনে পত্তি পূজো উগুরে এক্কো গুরি বলদ গোরু আর এক্কো গুরি ভেড়াছাগল উৎসর্ব গুরিলাক্।
3সে পরেদি বিলিয়মে বালাকরে কলঅ, “যে য়েমানুন্দোই পুজ্যে-উৎসর্বর অনুষ্ঠানান গরা অলঅ তুই সিগুনো ইদু থাক্ আর মুই উন্দি যাঙর্। দগেনলে লগেপ্রভু মঅ লগে দেগা গুরিবাত্তে এবঅ। তে মইদু যিয়েনি ফগদাঙ্ গুরিবো মুই সিয়েনি তইদু কোম্।” এই কধাগান কোইনে বিলিয়মে এন্ এক্কো মুড়ো উগুরে উদিলো যিয়েনত্ কনঅ গাজ্পালা ন-এলাক্। 4সেক্কে গোজেনে তা সমারে দেগা গুরিলো। বিলিয়মে কলঅ, “মুই সাত্তো পূজো বানেয়োং আর পত্তি পূজো উগুরে এক্কো গুরি দামাড়া গোরু আর এক্কো গুরি ভেড়াছাগল উৎসর্ব গোজ্যং।”
5সেক্কে লগেপ্রভু বিলিয়মর্ মুয়োনত্ কদক্কানি কধা যুগেই দিইনে কলঅ,“তুই বালাক ইদু ফিরি যেইনে তারে এই কধানি কঅ।”
6বিলিয়মে বালাক ইদু ফিরি গেলঅ। তে দেগিলোদে, বালাকে মোয়াবর্ বেক্ নেতাগুনোরে নেযেইনে তার উৎসর্ব গোজ্যে য়েমানুনো ইদু থিয়্যেই আঘে। 7সেক্কে বিলিয়মে গোজেনর্ দিয়্যে এই কধানি কুয়ো ধুরিলো:
“বালাকে মরে অরাম দেজত্তুন্
লোই আনিলো,
পূগেদি মুড়োগুনোর্ কায়-কুরেত্তুন্
মোয়াব-রাজা মরে লোই আনিলো।
তে কলঅ, ‘মর্ পক্কে তুই
যাকোবরে অভিশাব্ দিচ্,
ইস্রায়েলর্ বিপক্ষে ভান্ন্যেয়ানিত্যে
কধা কঅ।’
8গোজেনে যিগুনোরে কনঅ অভিশাব ন-দে,
কেন্জান্ গুরি মুই তারারে অভিশাব দিম্?
লগেপ্রভু যিগুনোর বিরুদ্ধে কুমংগলর্ কধা
ন-কয়,
কেন্জান্ গুরি মুই তারার্ বিরুদ্ধে
কুমংগলর্ কধা কোম্?
9মুড়ো উগুরেত্তুন্ মুই তারারে দেখ্যং;
তারারে মুই মুড়ো উগুরেত্তুন্
দেখ্যং।
মুই এন্ এক্কো জাদরে দেখ্যং
যে অন্যগুনোত্তুন্ দূরোত্ থায়;
অন্য বেক্ জাদ্তুনো সমারে নিজোরে
এক গুরি ন-দেগে।
10যাকোবর্ বংশধরুনে
ধূল্যেকণা ধোক্ক্যেন গুণি ন-পুড়েইয়্যে,
কন্না তারারে গুণিই পারে?
ইস্রায়েলের্ চের্ভাগর্ একভাগঅ কি
কারঅ পক্ষে গুণোনা সম্ভব?
উই গম মানুচ্চুনো ধোক্ক্যেন
যেন মর্ মরন্ অয়;
মর্ থুমান যেন অয় তারা ধোক্ক্যেন।” 11এই কধাগান শুনিনে বালাকে বিলিয়মরে কলঅ, “তুই মরে ইয়েন্ কি গুরিলে? মর্ শত্রুগুনোরে অভিশাব দিবাত্তে মুই তরে আনিলুং আর তুই কি-না তারারে আশিদবাদ্ গুরিলে।”
12জোবত্ বিলিয়মে কলঅ, “লগেপ্রভু মর্ মুয়োনত্ যে কধাগান্ যুগেই দিয়্যে সিয়েনি কি মুই ন-কোইনে থেই পারং?”
বিলিয়মর্ মুয়োনত্ গোজেনর্ দিয়্যে দ্বিলম্বর আগাম কধা
13পরেদি বালাকে বিলিয়মরে কলঅ, “তুই মঅ লগে আর্ এক্কান্ জাগাত্ আয়। সিয়েনত্তুন্ তুই ইস্রায়েলীয়গুনোরে দেগিবে। তুই তারারে বেক্কুনোরে যে দেগিবে সিয়েন নয়, বানা তারার্ এক্কো ভাগ্ দেগিবে। সিয়েনত্তুন্ তুই মর্ পক্কত্তুন্ তারারে অভিশাব দিবে।” 14ইয়েন্ কোইনে বালাকে তারে পিস্গা মুড়োবো উগুরে যে সোফীম নাঙে মাদ্তো আঘে সিয়েনত্ নেযেল। সিয়েনত্ তে সাত্তো পূজো বানেইনে এক এক্কো উগুরে এক্কো গুরি দামাড়া গোরু আর এক্কো গুরি ভেড়াছাগল উৎসর্ব গুরিলো।
15সে পরেদি বিলিয়মে বালাকরে কলঅ, “যে য়েমানুন্ দিইনে পুজ্যে-উৎসর্বর অনুষ্ঠানান গরা অলঅ তুই সিগুনো ইদু থাক্, আর মুই ইন্দি যেইনে লগেপ্রভু সমারে দেগা গরং।”
16লগেপ্রভু বিলিয়ম সমারে দেগা গুরিনে তার্ মুয়োন্দি কদক্কানি কধা যোগেই দিইনে কলঅ, তুই বালাক ইদু ফিরি যেইনে তারে এই কধানি কঅ।
17সেনত্তে বিলিয়মে বালাক ইদু গেলঅ। তে দিগিলদে বালাকে মোয়াবর্ নেতাগুনোরে নেযেইনে তার্ উৎসর্ব গোজ্যে য়েমানুনো ইদু থিয়্যেই আঘে। বালাকে তারে পুযোর্ গুরিলো, “লগেপ্রভু তরে কি কোইয়্যে?”
18বিলিয়মে সেক্কে গোজেনর্ দিয়্যে এই কধানি কুয়া ধুরিলো;
“বালাক রাজা উঠ্, শুনিচ্;
ও সিপ্পোরর পুয়ো,
মঅ কধানি শুনিচ্।
19গোজেনে দঅ মানুচ্ নয়দে যে,
মিজে কধা কবঅ;
মানুজোত্তুন্ তার্ জর্ময়ো নয় যে,
তে মন বোদোলেব।
তে যিয়েনি কবঅ সেধোক্ক্যেন গুরিবো,
তার এগেমানি তে আমিঝে পূরোণ গরে।
20মুই আশিদ্বাদ গুরিবাত্তে
উগুম্ পেইয়োং।
তে ইস্রায়েলরে আশিদ্বাদ গোজ্যে,
মুই সিয়ান্ বুদুলি ন-পারং।
21যাকোবরে তে কনঅ অন্যেয় গত্যে
ন-দেগে,
ইস্রায়েলর্ ভাগ্যত্ কনঅ দুখ্ ন রাগায়।
তারার্ গোজেন লগেপ্রভু তারা
সমারে আঘে,
আর তারার্ রাজার্ জয়র্ কধানি
তারা ভিদিরে আঘে।
22মিসরত্তুন্ তে তারারে
নিগিলেই আন্যে,
তে তারার্ পক্ষেন্দি ঝাড়্বো গভর্
বলঅ ধোক্ক্যেন ।
23যাকোব উগুরে কনঅ যাদুবিদ্যে
ন-খাদেব;
ইস্রায়েল উগুরে ন-খাদেবে
কনঅ তন্ত্রমন্ত্র।
যাকোব, অত্তাৎ ইস্রায়েল পৌইদ্যেনে
ইক্কিনে এই কধানি কুয়া যায়,
‘গোজেনে যিয়েনি গোজ্যে সিয়েনি চাহ্।’
24এই বেক্ মানুচ্চুনে থিয়্যেই উদিবাক্ সিংহ
ধোক্ক্যেন গুরি,
আর সিংহ ধোক্ক্যেন গুরি নিজোরে
দেগেবাক।
শিগের্ গোজ্যে য়েমানর্ লো আর য়েরা
খেই ন-পানা সং
তারা ন-জিরেবাক্।”
25এই কধাগান শুনিনে বালাকে কোই উদিলো, “থামঅ, তুই তারারে অভিশাবঅ ন-দিবে, আশিদ্বাদ ন-গুরিবে।”
26জোবত্ বিলিয়মে কলঅ, “মুই কি তরে ন-কং, লগেপ্রভু যিয়েনি কবঅ সিয়েনি মত্তুন্ গরা পুরিবো?”
বিলিয়মর্ মুয়োনত্ গোজেনে দিয়্যে তিন লম্বর আগাম কধা
27পরে বালাকে বিলিয়মরে কলঅ, “আদিচ্, মুই তরে আর এক জাগাত্ লোই যাঙ্। দগেনলে গোজেনে খুজি ওইনে সিয়েনত্তুন্ তরে মর্ পক্কত্তুন্ তারারে অভিশাব দিবাত্তে দিবো।” 28ইয়েন্ কোইনে বালাকে তারে পিয়োর মুড়োবো উগুরে নেযেল যিয়েনত্তুন্ ধূল্যেচর-চাগালার্ যিশীমোন জাগায়ান দেগা যায়।
29সেক্কে বিলিয়মে কলঅ, “ইয়েনত্ মত্তে সাত্তো পূজো বানেচ্ আর সাত্তো বলদ গোরু আর সাত্তো ভেড়াছাগল উৎসর্ব গুরিবাত্তে যুক্কোল গুরিচ্।” 30বিলিয়মর্ কধা মজিম বালাকে সিয়েনোই গুরিলো। তে পত্তি পূজো উগুরে এক্কোত্ দরে বলদ গোরু আর এক্কোত্ দরে ভেড়াছাগল উৎসর্ব গুরিলো।
Copyright © 2021 Bangladesh Bible Society