গণাণা 20
20
পাত্তরত্তুন্ পানি
1বজরর্ পত্তম মাজত্ বেক্ ইস্রায়েলীয়গুনে সীন ধূল্যেচর-চাগালাত্ লুমিনে কাদেশ ইদু যেইনে থেলাক। মরিয়মে সেই জাগানত্ মুরি গেলঅ আর তারে গোর্ দিয়্যে অলঅ। 2সেই জাগানত্ পানি ন-থানায়্ ইস্রায়েলীয়গুনে মোশি আর হারোণর বিরুদ্ধে দল পাগেলাক্। 3তারা মোশির লগে কোল্-কোজ্জ্যে বাজেইনে কলাক্, “আমা ভেইয়ুনে যেক্কে লগেপ্রভুর মুজুঙোত্ মুরি গেলাক্ সেক্কে যুনি আমিয়ো মত্তং সালে গম্ অদঅ। 4কিত্তে তুই লগেপ্রভুর মানুচ্চুনোরে এই ধূল্যেচর-চাগালাত্ আনিলে যেনে য়েমানপাল সুদ্দো আমি মুরি যেই? 5মিসর দেজত্তুন্ কিত্তে তুই আমারে এই দর্গরেপারা জাগানত্ আনিলে? এই জাগানত্ নেই কনঅ শোজ্য বা ডোমোর্ গুলো, নেই কনঅ আংগুরো লুদি বা ডালোম; সিগুন বাদে হেবার্ পানিয়ো ইয়েনত্ নেই।”
6সেক্কে মোশি আর হারোণে তারার ইত্তুন্ মিলন-তাম্বুলো দোরান ইদু যেইনে আদু পাড়িনে পড়িলাক্। সেক্কে লগেপ্রভুর মহিমাগান্ তারা মুজুঙোত্ ফগদাং অলঅ। 7লগেপ্রভু মোশিরে কলঅ, 8“তুই সেই লুুদিক্কো নেযা আর তুই আর তর্ ভেই হারোণে ইস্রায়েলীয়গুনোরে এক্কান জাগাত্ এগত্তর্ গরঅ। উই যে দাঙর্ পাত্তর্বো আঘে তুই ইস্রায়েলীয়গুনো মুজুঙোত্ সিবেরে কঅ আর সেক্কে সিবে পানি দিবো। ইস্রায়েলীয়গুনে আর তারার্ য়েমানপালুন্ যেনে খেই পারন্ সেনত্তে তুই তারাত্তে পাত্তরত্তুন্ পানি নিগিলেই আনিবে।”
9লগেপ্রভুর উগুম মজিম তা মুজুঙোত্তুন্ মোশি সেই লুদিক্কো তুলি নেযেল। 10মোশি আর হারোণে সেই পাত্তর্বো ইদু মানুচ্চুনোরে এক সমারে এগত্তর্ গুরিলো। সে পরেদি মোশি তারারে কলঅ, “উল্লোমীগুন্ শুনো, আমি কি তমাত্তে এই পাত্তর্বোত্তুন্ পানি নিগিলেই আনিবোং?” 11এই কধাগান্ কোইনে মোশি আত্ তুলিনে তার্ লুদিক্কোলোই সেই পাত্তর্বোরে দ্বিবার্ বারি দিলো; সেক্কে সিয়োত্তুন্ জোরে বোউত্ পানি নিগিলি এজা ধুরিলো আর ইস্রায়েলীয়গুনে আর তারার্ য়েমানপালুনে সিয়েন্ খেলাক।
12মাত্তর্ লগেপ্রভু মোশি আর হারোণরে কলঅ, “তুমি মঅ উগুরে বিশ্বেজ্ ন-গরঅ আর ইস্রায়েলীয়গুনোর মুজুঙোত্ মরে সুদ্ধো-সাংগ বিলি ন-মানঅ। সেনত্তে যে দেজ্চান্ মুই ইস্রায়েলীয়গুনোরে দিম্ তুমি তারারে সিয়েনত্ নেযেই ন-পারিবা।”
13সেই পানিগানরে কুয়া অলঅ মরীবা (যিয়েনর্ ভেদ্তান “কোল্বাজানা”)। ইয়েনত্ ইস্রায়েলীয়গুনে লগেপ্রভুর লগে কোল্ বাজেয়োন্ আর লগেপ্রভু ইয়োদোই তারা ভিদিরে নিজোর পবিত্রতাগান্ ফগদাং গোজ্যে।
ইদোম দেজর্ ভিদিরেন্দি যেবার্ পদথ্ মানা
14পরেদি মোশি কাদেশত্তুন্ মানুচ্ পাদেইনে ইদোম দেজর্ রাজাবোরে কোই পাদেল, “আমি, তর্ ইস্রায়েলীয় ভেইয়ুন, তরে এক্কান্ কধা কবাত্তে চেই। তুই আমার্ দুঘ-কষ্টর্ কধা জানচ্। 15-16আমা পুরোণি মানুচ্চুনে মিসর দেজত্ যেইয়োন্ আর আমি বোউত্ বজর্ সিয়েনত্ বজতি গোজ্যেই। মিসরীয়গুনে আমার্ আর আমা পুরোণি মানুচ্চুনো উগুরে ভান্ন্যেই বেবহার্ গরানায় আমি লগেপ্রভু ইদু কানাকুদি গোজ্যেই। তে আমা কানাকুদি শুনিনে তার্ দূত পাদেইনে মিসরত্তুন্ আমারে নিগিলেই আন্যে। 17তুই তর্ দেজর্ ভিদিরেন্দি আমারে যেবাত্তে দে। আমি কনঅ শোজ্য ক্ষেত বা আংগুর্ ক্ষেদর্ ভিদিরেন্দি ন-যেবং, বা কনঅ কূয়োত্তুন্ পানিয়ো ন-খেবং। আমি রাজ্পদন্দি আদি যেবং আর তর্ রেজ্যগান্ পার্ ওই ন-যানা সং ডেনে-বাঙে টেং ন-বাড়েবং।”
18মাত্তর্ জোবত্ ইদোমর্ রাজাবো কলঅ, “না, তুমি ইয়েনন্দি যেই ন-পারিবা। যুনি তুমি যেবার্ চেট্টা গরঅ সালে আমি যুদ্ধো গুরিবাত্তে নিগিলিনেই তমারে আক্রমণ গুরিবোং।”
19ইস্রায়েলীয়গুনে তার্ জবাবত্ কোই পাদেলাক্, “আমি দাঙর্ পদ্থান্ ধুরিনে যেবং। আমার্ য়েমানপালুন্ বা আমি যুনি তর্ দেজত্তুন্ কনঅ পানি খেই সালে আমি তার্ দামান্ দি দিবোং। আমি বানা টেংগোই আদিনে পার্ ওই যেবাত্তে চেই, আর কিচ্চু নয়।”
20ইদোমীয়গুনে আরঅ্ কোই পাদেলাক্, “না, ইয়েনন্দি তুমি যেই ন-পারিবা ।”
ইয়েনর পরেদি ইদোমীয়গুনে বোউত্ সৈন্য নেযেইনে তারার্ খেমতা বাহাদুরি গুরি ইস্রায়েলীয়গুনোর বিপক্ষে নিগিলি এলাক। 21ইদোমীয়গুনে তারার্ দেজর্ ভিদিরেন্দি যেবাত্তে দিবার্ রাজী ন-অলে ইস্রায়েলীয়গুনে তারার্ কায়-কুরেত্তুন্ ফিরি গেলাক্।
হারোণর মরাণা
22ইয়েনর্ পরেদি ইস্রায়েলীয়গুনে কাদেশত্তুন্ আদা মারিনে হোর মুড়োবো ইদু যেইনে লুমিলাক্। 23সিয়েনত্ ইদোমর্ দুঝিবো ইদু লগেপ্রভু মোশি আর হারোণরে কলঅ, 24“হারোণত্তুন্ তার্ পুরোণি মানুচ্চুনোর ইদু যাহ্ পুরিবো। যে দেজ্চান্ মুই ইস্রায়েলীয়গুনোরে দিম্ তার্ সিদু যানা ন-অবঅ, কিত্যে মরীবাদত্ সেই পানিগানর্ পৌইদ্যেনে তুমি মর্ উগুমোর্ বিরুদ্ধে কাম্ গোজ্য। 25হারোণ আর তার্ পূঅ ইলীয়াসররে নেযেইনে তুই হোর মুড়োবো উগুরে যাহ্। 26সিদু হারোণর্ কিয়্যেত্তুন্ ধর্মগুরুবোর্ পোজাক্কান্ খুলি নেযেইনে সিবে তার্ পূঅ ইলীয়াসররে উরে দুয়ো, কিত্যে হারোণে তার্ পুরোণি মানুচ্চুনো ইদু যেবগোই; তে সিয়োদোই মুরি যেবঅ।”
27মোশি লগেপ্রভুর উগুম মজিম কাম্ গুরিলো। তারা বেক্ ইস্রায়েলীয়গুনো মুজুঙোত্ হোর মুড়োবোত্ উদি গেলাক্। 28সে পরেদি মোশি হারোণর কিয়্যেত্তুন্ ধর্মগুরুর্ পোজাক্কান্ খুলি নেযেইনে সিয়েনি তার্ পূঅ ইলীয়াসররে উরে দিলো। হারোণে সেই মুড়োবো উগুরে মুরি গেলঅ। পরেদি মোশি আর ইলীয়াসরে মুড়োবোত্তুন্ লামি এলাক্। 29ইস্রায়েলীয়গুনে বেক্কুনে যেক্কে জানি পারিলাক, হারোণে মুরি যেইয়্যে সেক্কে গোদা ইস্রায়েল জাদ্তো ত্রিশ দিন সং তাত্তে আবিলেস্ খেলাক।
Copyright © 2021 Bangladesh Bible Society