গণাণা 19
19
সিজি গুরিবার্ পানিগান্
1ইয়েনর্ পরেদি লগেপ্রভু মোশি আর হারোণরে কলঅ, 2ইবে অলঅ মর্ দিয়্যে রীদি-সুদোমর্ এক্কো ধারা; তুমি ইস্রায়েলীয়গুনোরে এন্ এক্কো রাঙা বাবোত্ত্যা মাদাম্ গোরু তমা ইদু আনিবাত্তে কবা যিবের্ কিয়্যেনত্ কন থুদো বা দাগ্-পোজ্যে নেই আর যিবের্ কাঁনাদ্ কনদিনঅ জুঙোল্ চাবি দিয়্যে ন-অয়। 3সিবে তুমি ধর্মগুরু ইলীয়াসররে দিবা। তাম্বুলো বারেন্দি নেযেইনে তা মুজুঙোত্ ইবে কাবা পড়িবো। 4সে পরেদি ধর্মগুরু ইলীয়াসরে তা আঙুল্লোই কিজু লো নেযেইনে মিলন-তাম্বুলোর মুজুঙোন্দি সাত বার্ ছিদি দিবো। 5তা মুজুঙোত্ গোরুবোর্ চামাড়াগান, য়েরাগান, লো-গান আর আদুরি সুদ্দো গবরানি পুড়ি ফেলা পুরিবো। 6গোরুবো যেক্কে পুড়ো ধুরিবাক্ সেক্কে ধর্মগুরুবোত্তুন্ কিজু এরস গাজর তক্তা, এসোব আর রাঙা রঙয়র্ কেশ্ তা উগুরে ফেলে দিয়্যে পুরিবো। 7ইয়েনর পরেদি ধর্মগুরুবোত্তুন্ তার্ কাবড়-চুগোরানি ধোয় নেযেইনে পানিলোই গাদা পুরিবো। পরেদি তে তাম্বুলো ভিদিরে যেই পারিবো, মাত্তর্ সাজোন্যা সং তাত্তুন্ অসিজি অবস্থায় থাহ্ পুরিবো। 8যে সেই গোরুবো পুড়িবো তাত্তুনো তার্ কাবড়-চুগোরানি ধোইনে পানিলোই গাদা পুরিবো আর সাজোন্যা সং তে অসিজি অবস্থায় থেবঅ। 9সিজি অবস্থায় আঘে এধোক্ক্যেন কনঅ মান্জ্যে সেই গোরুবোর্ ছেইয়ান তুলি নেযেইনে তাম্বুলোর্ বারেন্দি কনঅ সিজি জাগাত্ রাগেব। সেই ছেইয়ান্ ইস্রায়েলীয়গুনে সিজি গুরিবার্ পানি বানেই রাগেবাত্তে থোই দিবাক্। ইয়েন্ অসিজিত্তুন্ সিজি অবাত্তে বেবহার গরা পুরিবো। 10যে মানুচ্চো সেই গোরুবোর্ ছেইয়ান্ তুলি নিবো তাত্তুনো তার্ কাবড়-চুগোরানি ধোই ফেলা পুরিবো আর তেয়ো সাজোন্যা সং অসিজি অবস্থায় থেবঅ। ইবে অবঅ ইস্রায়েলীয় আর তারা ভিদিরে বজত্তি গোজ্যে অন্য জাদর্ মানুচ্চুনোত্তে এক্কো থিদেবর্ গোজ্যে সুদোম।
11যুনি কনজনে কারর্ মরাকিয়্যে ধরন সালে তে সাতদিন সং অসিজি অবস্থায় থেবঅ। 12তিন দিনোত্ আর সাত দিনোত্ তাত্তুন্ সিজি গুরিবার পানিলোই নিজোরে সিজি গরা পুরিবো আর সে পরেদি তে সিজি অবঅ। মাত্তর্ যুনি তে তিন দিনোত্ আর সাত দিনোত্ এধোক্ক্যেনগুরি নিজোরে সিজি গুরি ন-নেযায় সালে তে অসিজি অবস্থায় থেই যেবঅ। 13যুনি কনজনে কারঅ মরাকিয়্যেগান্ ধরানার পরেদি নিজোরে সিজি গুরি ন-নেযায় সালে তে লগেপ্রভুর থেবার্-তাম্বুলান অসিজি গরে। সেই মানুচ্চোরে ইস্রায়েলীয়গুনো ভিদিরেত্তুন্ বাদ দিয়্যে পুরিবো। তার্ কিয়্যেত্ সিজি গুরিবার্ পানি ছিদি দিয়্যে ন-অয় বিলি তে অসিজি থেবঅ আর তার্ অসিজিগান্ তা উগুরে থেই যেবঅ।
14কনঅ মানুচ্ তাম্বুলো ভিদিরে মুরি গেলে এই আইনান্ মানা পুরিবো-যিগুনে সেই তাম্বুলো ভিদিরে চোমেবাক্ আর যিগুনে সেই তাম্বুলোত্ এলাক্ তারা সাত দিন সং অসিজি অবস্থায় থেবাক্। 15সে জাগানত্ যিদুক্কুন্ পানির ড্রাম ঢাগনি দিইনে বন্ধ গরা ন-অয় বিলি খুলো অবস্থায় এলাক সিগুনও অসিজি ওই যেইয়োন।
16যুদ্ধোত্ বা এনেবাদে মুরি যেইনে খোলা মাদত্ পড়ি আগন্ এধোক্ক্যেন কাররে যুনি কনজনে ধরন্ সালে তে সাত দিন সং অসিজি অবস্থায় থেবঅ। কনজনে যুনি মান্জ্যর্ হাড়্ বা গোর্ ধরন্ সালে তেয়ো সাত দিন সং অসিজি অবস্থায় থেবঅ।
17এই বেক্ অসিজি মানুচ্চুনোরে অসিজিত্তুন্ সিজি গুরিবার্ আজাই যে য়েমানুন্ পুড়ো ওইয়্যে সিত্তুন্ কিজু ছেই এক্কো পানিকুমো ভিদিরে রাগেইনে সিবে উগুরে গঙার্ পানি ঢালি দিয়্যে পুরিবো। 18সে পরেদি সিজি অবস্থায় আঘে এধোক্ক্যেন এক্কো মানুচ্ এসোবর্ কয়েক্কো ডেলা সেই পানিগানত্ ভুরেইনে সেই তাম্বুলোত্, সে ভিদিরে পজাপিরানিত্ আর মানুচ্চুনো উগুরে সিয়েন্ ছিদি দিবো। মান্জ্যর হাড়্ বা গোর্ বা মারে ফেলেয়্যে বা মুরি যেইয়্যে মান্জ্যরে ধোজ্যে এধোক্ক্যেন মান্জ্য উগুরেয়ো সেই পানিগান্ ছিদি দিয়্যে পুরিবো। 19সিজি অবস্থায় আগেদে মানুচ্চো অসিজি অবস্থায় পোজ্যে মানুচ্চো উগুরে তিন দিনোত্ আর সাত দিনোত্ সেই পানিগান্ ছিদি দিবো আর সাত দিনোত্ তে তারে সিজি গুরিবো। যিবেরে সিজি গরা অর্ তাত্তুুন্ তা কাবড়-চুগোরানি ধোয়্ ফেলেইনে পানিলোই গাদা পুরিবো আর্ সেদিন্যে তে সাজোন্যাত্তুন্ ধুরি সিজি অবঅ। 20অসিজি অনার পরেদি যুনি কনজনে নিজোরে সিজি গুরি ন-নেযায় সালে তারে তার্ সমাজ ভিদিরেত্তুন্ সমাজ বাড়া গরা পুরিবো, কিত্যে নিজোরে সিজি ন-গুরিনে তে লগেপ্রভুর পবিত্র তাম্বুলান অসিজি গোজ্যে। সিজি গুরিবার্ পানিগান্ তা উগুরে ছিদেনা ন-অয় বিলি তে অসিজি। 21ইস্রায়েলীয়গুনোত্তে ইবে অবঅ এক্কো থিদেবর্ গোজ্যে সুদোম।
“যে মানুচ্চো এই সিজি গুরিবার্ পানিগান্ ছিদিবো তাত্তুনো তার্ কাবড়-চুগোরানি ধোই ফেলা পুরিবো। যুনি কনজনে এই সিজি গরেদে পানিগান্ ধরন্ সালে তে সাজোন্যা সং অসিজি অবস্থায় থেবঅ। 22অসিজি অবস্থায় আগেদে মানুচ্চো যিয়েনি ধুরিবো সিয়েনি অসিজি ওই যেবঅ আর তার্ ধোজ্যে জিনিস্ছানি যে ধুরিবো তেয়ো সাজোন্যা সং অসিজি অবস্থায় থেবঅ।”
Copyright © 2021 Bangladesh Bible Society