গণাণা 13
13
চর্ পাদানা
1ইয়েনর্ পরেদি লগেপ্রভু মোশিরে কলঅ, 2“যে কনান দেজ্চান্ মুই ইস্রায়েলীয়গুনোরে দিবাত্তে যাঙর্ সিয়েন পৌইদ্যেনে খোঁজ-খবর লোই আনিবাত্তে তুই পত্তি বারবো গুট্টিত্তুন এক্কো গুরিনে নেতা পাধেই দে।”
3লগেপ্রভুর উগুম্ পেইনে মোশি সিয়েনোই গুরিলো। তে পারণ ধূল্যেচর-চাগালাত্তুন্ যিগুনোরে পাদেই দিলো তারা বেক্কুনে অলাক ইস্রায়েলীয়গুনোর নেতা। 4ইগুনে অলাক, রূবেণ-গুট্টির সক্কূরোর পূঅ শম্মূয়; 5শিমিয়োন-গুট্টির হোরির পূঅ শাফট; 6যিহূদা-গুট্টির যিফুন্নির পূঅ কালেব; 7ইষাখর-গুট্টির যোষেফর পূঅ যিগাল; 8ইফ্রয়িম-গুট্টির নূনোর পূঅ হোশেয়: 9বিন্যামীন-গুট্টির রাফূর পূঅ পল্টি; 10সবূলূন-গুট্টির সোদির পূঅ গদ্দীয়েল; 11যোষেফ-গুট্টির, অত্তাৎ মনঃশি-গুট্টির সূষির পূঅ গুদ্দি; 12দান-গুট্টির গমল্লির পূঅ অম্মীয়েল; 13-15আশের-গুট্টির মীখায়েলর পূঅ সথুর; নপ্তালি-গুট্টির বপ্সির পূঅ নহ্বি আর গাদ-গুট্টির মাখির পূঅ গ্যূয়েল। 16মোশি এই মানুচ্চুনোরে কনান দেজর্ খোঁজ-খবর লোই আনিবাত্তে পাদেয়্যে। তে নূনোর পূঅ হোশেয়র নাঙান দিয়্যেদে যিহোশূয়ো।
17কনান দেজত্ পাদেবার্ সময় মোশি তারারে কোই দিলো, “তুমি নেগেভর ভিদিরেন্দি যেইনে মুড়োমুড়ি চাগালাত্ চুমিবা। 18দেজ্চান্ কেধোক্ক্যেন সিয়েন্ তুমি চেবা এবা। তুমি চেই এবা, সিয়েনত্ যিগুনে বজত্তি গত্তন তারা মনমরা নাহি বোলী আর সোংখ্যেদি তারা বেশ্ না-কি কম, 19কেধোক্ক্যেন দেজত্ তারা বজত্তি গত্তন আর সিয়েন্ গম্, না-কি ভান্ন্যেই। যেদক্কানি শঅরত্ তারা বজত্তি গত্তন্ সিয়েনি কি দেবাল ছাড়া, না-কি দেবাল্লোই ঘিজ্যে? 20সিদুগোর্ মাদিত্ কি গম্ ক্ষেত-ক্ষেত্তি জর্মায়, না-কি ন-জর্মায়? সিয়েনত্ গাজবাজ্ আগন্, না-কি নেই? সে জাগানত্তুন্ কয়েক্কো গুলো-গুলি লোই আনিবাত্তে তুমি অমকদ চেট্টা গুরিবা।” সে অক্তত্ বানা আংগুর্ তুলোনা আরাম্ভ ওইয়্যে।
21সেক্কে তারা যেইনে সীন ধূল্যেচর চাগালাত্তুন আরাম্ভ গুরিনে হমাতর ইন্দি রহোব সং দেজ্চানর্ খোঁজ খবর লোই আনিলাক্। 22তারা নেগেভর ভিদিরেন্দি যেইনে হিব্রোণ শঅর ইদু আঝিল্ অলাক। হিব্রোণ শঅরান্ তুলো ওইয়্যেদে মিসরর্ সোয়ন শঅরান্ তুলিবার্ সাত বজর আগে। সিয়েনত্ অনাকর্ বংশর্ অহীমান, শেশয় আর তল্ময় নাঙে তিন্নো মানুচ্ এলাক। 23নেতাগুনে ইষ্কোল কিঝিঙোত্ যেইনে এক থৈল্যে আংগুরসুদ্দো এক্কো ডেলা কাবি নিলাক। তারা ভিদিরে দ্বিজনে সিগুন লুুদিগোত্ বানিনে লোই এলাক। ইগুন বাদেয়ো তারা কয়েক্কো ডালোম আর ডোমোর গুলোয়ো লোই আনিলাক। 24ইস্রায়েলীয়গুনে সিয়েনত্ সেই আংগুরোর থৈল্যেবো কাপ্পোন্ বিলি সে জাগায়ানর্ নাঙান্ ওইয়্যে ইষ্কোল কিঝিং। 25দেজ্চানর্ খোঁজ-খবর লোইনে তারা চোল্লিশ দিন পরেদি ফিরি এলাক।
কনান দেজ্চান
26সেই নেতাগুনে পারণ ধূল্যেচর চাগালার্ কাদেজত্ মোশি, হারোণ আর বেক্ ইস্রায়েলীয়গুনো ইদু ফিরি এলাক। তারা মোশি, হারোণ আর অন্য মানুচ্চুনোর ইদু বেক্ কধানি জানেলাক আর সেই দেজর্ গুলোগুলিগুন দেগেলাক। 27তারা মোশিরে কলাক্, “তুই আমারে যে দেজত্ পাদেয়োচ্ আমি সিয়োদোই যেইয়্যেই। দেজ্চানত্ আজলে দুধ, মধু আর কনঅ কিজুর অভাব নেই। ইগুনোই অলাক সিদুগোর্ গুলোগুলি। 28মাত্তর্ যিগুনে সেই জাগানত্ বজত্তি গত্তন্ তারার্ কিয়্যেত্ বল্ বেশ্ আর তারার শঅরানিয়ো অমহদ দাঙর্ দাঙর্ আর দেবাল্লোই ঘিজ্যে। অনাকর বংশর মানুচ্চুনোরেয়ো আমি সিয়েনত্ দেক্ক্যেই। 29অমালেকীয়গুনে থান্দে নেগেভত; হিত্তীয়, যিবূষীয় আর ইমোরীয়গুনে থান্দে মুড়ো-মুরি চাগালাত্ আর কনানীয়গুনে থান্দে বড়সাগর ইদু আর যর্দন গাঙর্ পাড়ত্।”
30সেক্কে মোশি মুজুঙোত্ যিদুক্কুন্ মানুচ্ এলাক্ কালেবে তারারে কোল্-কোজ্যে থামেইনে কলঅ, “সিদু যেইনে দেজ্চান্ আমার্ গজক্ গুরি নেযানা উজিত। আমি সিয়েন্ হামাক্কায়্ গুরি পারিবোং।”
31মাত্তর্ যিগুনে তা সমারে যেইয়োন তারা কলাক্কে, “সে মানুচ্চুনো সমারে যুদ্ধো গরানা আমার বেলায় সম্ভব নয়; আমাত্তুন্ তারার্ কিয়্যেত্ বল্ বেশ্।” 32তারা যে দেজ্চানর খোঁজ-খবর লোই এচ্ছ্যন্ ইস্রায়েলীয়গুনো ইদু সেই দেজ্চানর্ পৌইদ্যেনে এক্কান্ বাজে কধা উড়ে দিইনে কলাক্কে, “আমি যে দেজচানর্ খোঁজ-খবর লোই এচ্ছ্যেই সেই দেজ্চানে তার্ আদাম্মেগুনোরে গিলিনে খেই ফেলায়। যিদুক্কুন্ মানুচ্ আমি সিয়েনত্ দেক্ক্যেই তারারে দেগদে অমহদ দাঙর্। 33আমি সিয়েনত্ নেফিলীয়গুনোরে দেক্ক্যেই। অনাকর্ বংশর মানুচ্চুনে দঅ জাদত্ নেফিলীয়। তারারে দেগিনে আমি নিজোরে মনে গুরিলোং ঘাস-ফিরিং আর তারায়ো আমারে সেধোক্ক্যেন মনে গুরিলাক।”
Copyright © 2021 Bangladesh Bible Society