গণাণা 12
12
মোশির বিপক্ষে মরিয়ম আর হারোণে
1মোশি এক্কো কূশীয়ো বংশর মিলেরে মোগ্ লোইয়্যে। এই কূশীয়ো মিলেবোর্ কারনে মরিয়ম আর হারোণে মোশির বিপক্ষে কূয়ো ধুরিলাক, 2“লগেপ্রভু কি বানা মোশিরে দিইনে কধা কোইয়্যে? আমারে দিইনে কি তে কনঅ কধা ন-হয়?” লগেপ্রভুর এই বেক্ কধানি শুনিলো। 3আসলে মোশি এলদে এক্কো সিদে মানুচ্, পিত্থিমীর্ যে কনঅ মান্জ্যত্তুন্ বেশ্ সিদে।
4হারোণ আর মরিয়মর্ কধা শুনোনার্ লগে লগে লগেপ্রভু মোশি, হারোণ আর মরিয়মরে কলদে, “তুমি তিনজনে নিগিলি এইনে মিলন-তাম্বুলো ইদু এজঅ।” এই কধাগান্ শুনিনে তাঁরা তিনজনে নিগিলি এলাক। 5-6সেক্কে লগেপ্রভু মেঘ মাধ্যমে আঝিল্ ওইনে লামি এলঅ আর মিলন-তাম্বুলোর দোরো ইদু থিয়্যেইনে হারোণ আর মরিয়মরে ডাগিলো। তাঁরা দ্বিজনে উজেই এজানার্ পরেদি লগেপ্রভুর কলদে, “তুমি মঅ কধাগান্ শুনো। তমা ভিদিরে কনঅ নবী থেলে মুই লগেপ্রভুর দিব্য জ্ঞানর্ ভিদিরেন্দি নিজোরে তাইদু ফগদাং গরং আর স্ববন্দোই কধা কং। 7মাত্তর্ মর্ চাগর্ মোশি সমারে মুই সিয়েন্ ন-গরং। তে মঅ পরিবারর্ বেক্ কামানি বিশ্বেজ্ গুরিনে গরে। 8মুই তা সমারে মুজুঙো-মুজুঙি দোলেডালে কধা কং, কনঅ ভানালোই নয়। লগেপ্রভু যেধোক্ক্যেনগুরি দেগা দে তে সিয়েন্ দেগে। ইয়েনর পরেদিয়ো তুমি মর্ চাগর্ মোশির্ বিপক্ষে কধা কধে ন-দোরেলা?”
9হারোণ আর মরিয়ম উগুরে লগেপ্রভু রাগে জুলি উদিলো। পরেদি তে গেলগোই। 10সেই মেঘকান্ যেক্কে মিলন-তাম্বুলান ছাড়িনে উগুরে উদি গেলঅ সেক্কে দেগা গেল, মরিয়মর্ কিয়্যেগান্ ভান্ন্যেই চামারা রুগে বরফ ধোক্ক্যেন ধুব্ ওই যেইয়্যে। হারোণে মরিয়ম ইন্দি ফিরি চেলে তা কিয়্যেত্ চামাড়া রুগ্কান ন্ দেগিলো। 11এই অবস্থা দেগিনে তে মোশিরে কলঅ, “ও মর্ প্রভু, আমি ভুল্ গুরিনে যে পাপ গোজ্যেই সিয়েন্ আমা বিরুদ্ধে তুই ন-ধুরিচ্। 12যে চিঝিবো মরা অবস্থায়্ অদ্দেক্ নেইয়্যে কিয়্যেলোই জোর্মেয়ে মরিয়মরে তুই সেধোক্ক্যেন থেবাত্তে ন-দিচ্।”
13সেক্কে মোশি জগার পারিনে লগেপ্রভুরে ডাগিনে কলঅ, “ও গোজেন, তুই তারে গম্ গুরি দে।”
14জোবত্ লগেপ্রভু মোশিরে কলঅ, “তা বাপ্পো যুনি তার্ মুয়োনত্ শেফ্ ফেলে দিদো সালে কি তে সাত দিন সং সে লাচ্ছান্ কুদু তদঅ? সাত দিন তারে তাম্বুলো বারেন্দি বানি রাগঅ, সে পরেদি তারে ফিরেই আনা যেবঅ।” 15সেনত্তেই মরিয়মরে সাত দিন সং তাম্বুলো বারেন্দি বানি রাগা অলঅ। তারে ফিরি ন-আনানা সং মানুচ্চুনে আদা ন-মারিলাক্।
16ইয়েনর্ পরেদি ইস্রায়েলীয়গুনে হৎসেরোৎ ছাড়িনে পারণ ধূল্যেচর চাগালাত্ যেইনে তাম্বুলান্ ফেলেলাক।
Copyright © 2021 Bangladesh Bible Society