মথি 26
26
প্রভু যীশুরে মারে ফেলেবার্ কুজুরোমি
(মার্ক ১৪:১,২; লূক ২২:১,২; যোহন ১১:৪৫-৫৩)
1এই বেক্ কধানির্ শেজদি যীশু তা শিচ্চ্যগুনোরে কলঅ, 2“তুমি দঅ হবর্ পঅ আর দ্বিদিন্ পরেদি উদ্ধোর-পরব্, আর মান্জ্য পুয়োবোরে ক্রুশোত্ দিবাত্তে ধুরি দিয়্যে অবঅ।”
3-4সেই সময়োত্ দাঙর্ ধর্মগুরু কাইয়াফার ঘরত্ আজল্ ধর্মগুরুগুনে আর যিহূদীগুনোর্ বুড়ো নেতাগুনে এগত্তর্ অলাক্ আর যীশুরে গোপনে ধুরি আনিনে মারে ফেলেবার্ কুজুরোমি গুরিলাক্। 5মাত্তর্ তারা কলাক্, “পরবর্ সময়োত্ নয়; সেক্কে মানুচ্চুনো ইধু অয়ত কোল্-কোজ্যে আরাম্ভ অবঅ।”
প্রভু যীশুর মাঢাবোত্ আতর্ ঢালানা
(মার্ক ১৪:৩-৯; যোহন ১২:১-৮)
6যীশু যেক্কে বৈথনিয়াত্ ফারাঙিরুগি শিমোন ঘরত্ এলঅ সেক্কে এক্কো মিলে তাইধু এলঅ। 7সেই মিলেবো এক্কো ধুব্ পাত্তর পিলেত্ গুরিনে অমকদ মংগা আতর্ আনিলো। যীশু যেক্কে হেবাত্তে বুজিলো সেক্কে তে তা মাঢাবোত্ সেই তুম্বাজ্ তেলান্ ঢালি দিলো।
8শিচ্চ্যগুনে সিয়েন্ দেগিনে কাঙেলেত্যে পেইনে কলাক্, “এই মংগা জিনিস্চান কিত্তে বর্বাদ গরা অর্? 9ইয়েন্ দঅ বোউত্ দামে বিজিনে টেঙাগুন্ নাঢা মানুচ্চুনোরে দিয়্যে যেদঅ।”
10যীশু এ কধাগান্ বুঝি পারিনে শিচ্চ্যগুনোরে কলঅ, “তুমি এ মিলেবোরে দুঘ্ দুয়োর্ কিত্যে? তে দঅ মত্তে গম্ কাম্ গোজ্যে। 11নাঢা মানুচ্চুনে দঅ নিত্য তমা ইধু আগন্, মাত্তর্ মরে তুমি নিত্য ন-পেবা। 12তে মঅ কিয়্যেগান উগুরে এ আতরান্ ঢালি দিইনে মরে কবরত্তে যুক্কোল্ গোজ্যে। 13ইক্কিনে, মুই তমারে ঘেচ্চেকগুরি কঙর্, জগদর্ যে কনঅ জাগাত্ গম্ হবর্ ফগদাং গরা অবঅ সিধু এ মিলেবোর্ কধাগান্ ইদোত্ তুলি দিবাত্তে তার্ এ কামর্ কধাগান্অ কুয়ো অবঅ।”
তিরিচ্চো টেঙার্ লুভে
(মার্ক ১৪:১০,১১; লূক ২২:৩-৬)
14সে পরেদি সেই বারজন শিচ্চ্যত্তুন্-এক্কো শিচ্চ্য যিহূদা ইষ্কারিয়োৎ নাঙে শিচ্চ্যবো আজল্ ধর্মগুরুগুনো ইধু গেলঅ, 15আর পুযোর্ গুরিলো, “যুনি মুই বেঈমানী গুরিনে যীশুরে তমা আঢত্ ধুরি দুয়োং তুমি মরে কি দিবা?”
আজল্ ধর্মগুরুগুনে তিরিচ্চো রুবোর টাকা গুণিনে তারে দিলাক্। 16সেক্কেত্তুন্ ধুরি যিহূদা যীশুরে ধুরি দিবাত্তে সুযোগ তগা ধুরিলো।
শেজ্ উদ্ধোর্-পরবর্ হানা
(মার্ক ১৪:১২-২৬; লূক ২২:৭-২০; যোহন ১৩:২১-৩০)
17সদানেইয়্যে রুটি পরবর্ পত্তম্ দিনোত্ শিচ্চ্যগুনে যীশু ইধু এইনে কলাক্, “তত্তে উদ্ধোর্-পরবর্ হানা আমি কুদু যুক্কোল্ গুরিবোং?”
18যীশু তারারে কলঅ, “শঅর ভিদিরে যেইনে সে মানুচ্চোরে কঅ, মাষ্টরবাবু কত্তে, ‘মঅ সময়ান্ কায়কুরে লুম্মেগি। মঅ শিচ্চ্যগুনো সমারে মুই তঅ ঘরত্ উদ্ধোর্-পরব্ পালন্ গুরিম্।’ ” 19যীশু শিচ্চ্যগুনোরে যে উগুমান্ দিলো শিচ্চ্যগুনে সেবাবোত্যেগুরি উদ্ধোর্-পরবর্ হানাগান্ যুক্কোল্ গুরিলাক্।
20যেক্কেনে সাজোন্যে অলঅ যীশু সেই বারজন্ শিচ্চ্যরে নিইনে হেবাত্তে বুজিলো। 21হেবার্ অক্তত্ তে কলঅ, “মুই তমারে ঘেচ্চেক্গুরি কঙর্, তমা ভিদিরেত্তুন্ একজনে মরে শত্রুগুনো আঢত্ ধুরি দিবো।”
22সেক্কেনে শিচ্চ্যগুনে অমকদ দুঘ্ পেইনে একজনর্ পর একজন যীশুরে পুযোর্ গরা ধুরিলাক্, “সিবে কি মুই, প্রভু?”
23জোবত্ তে তারারে কলঅ, “যে মঅ সমারে পিলেবোত্ আঢ্তান দের্ তেয়ই মরে ধুরি দিবো। 24মান্জ্য পুয়োবো পৌইদ্যেনে পবিত্র বোইয়োত্ যেবাবোত্যেগুরি লেগা আঘে ঠিগ্ সেবাবোত্যেগুরি তে মুরি যেবঅ ঠিগ্, মাত্তর্ কি দর্গরেপারা সেই মানুচ্চো, যে মান্জ্য পুয়োবো লগে বেঈমানী গরে! তে মান্জ্যর্ জর্ম ন-অলে বরং তাত্যেই গম্ অদঅ।”
25যিহূদা, বেঈমান, তে কলঅ, “প্রভু, সিবে কি মুই?”
যীশু তারে কলঅ, “তুই ঠিগ্ কধা কলে।”
26হানা-দানা চলের্, এমন্ সময়োত্ যীশু রুটি লোইনে গোজেনরে ভালেদি জানেল। পরেদি তে সেই রুটিগান্ কট্টা কট্টা গুরিলো আর শিচ্চ্যগুনোরে দিইনে কলঅ, “এইয়্যে লঅ, হঅ; ইয়েন্ মর্ কিয়্যে।”
27ইয়েনর্ পরেদি তে গলচ্চো লোইনে গোজেনরে ভালেদি জানেল আর সিবে শিচ্চ্যগুনোরে দিইনে কলঅ, “গলচ্চোর্ এই আংগুর-রস্চান তুমি বেক্কুনে হঅ, 28কিয়া ইয়েন্ মর্ লো যিয়েন্ ভালোক্কুন্ মান্জ্যর্ পাপর্ খেমাত্তে দিয়্যে অবঅ। মান্জ্যত্তে গোজেনর্ নুয়ো সুদোম মর্ এই লো-গান্দোই সুজো অবঅ। 29মুই তমারে কঙর্, ইক্কেত্তুন্ ধুরি যেদক্ বিলোন্ সং মুই মঅ বাব রেজ্যত্ তমা সমারে আংগুর-ফলর্ রস্ নুয়ো গুরি ন-হাং সেদকদিন সং মুই আরঅ কনদিন্অ সিয়েন্ ন-হেম্।”
30পরেদি তারা এক্কো গীদ্ গেই গেই নিগিলিনে জৈতুন্ মুড়োবোত্ গেলাক্।
পিতরর্ অস্বীগের্ গুরিবার্ কধা
(মার্ক ১৪:২৭-৩১; লূক ২২:৩১-৩৪; যোহন ১৩:৩৬-৩৮)
31পরেদি যীশু তা শিচ্চ্যগুনোরে কলঅ, “এচ্চ্যে রেদোত্ মরে নিইনে তমা বেক্কুনো মনত্ মানা এবঅ। পবিত্র বোইবোত্ লেগা আঘে, ‘মুই গরগ্কোরে মারে ফেলেম্, সেক্কে পাল ভেড়াগুন্ ছিদি পড়িবাক্।’ 32মাত্তর্ মুই মরণত্তুন্ জেদা অনার্ পরেদি মুই তমা আগে আগে গালীলোত্ যেম্।”
33সেক্কে পিতরে তারে কলঅ, “তরে নিইনে বেক্কুনো মনত্ মানা এলেয়ো মঅ মনত্ কনদিন্অ মানা ন-এবঅ।”
34যীশু তারে কলঅ, “মাত্তর্ মুই তরে ঘেচ্চেক্গুরি কঙর্, এচ্চ্যে বেন্যেপোত্যে রাদা কুরো ডাগ্ কারিবার্ আগেদি তুই তিনবার্ কবে, তুই মরে ন-চিনোস্।”
35পিতরে কলঅ, “মত্তুন্ যুনি তঅ সমারে মরায়ো পড়ে তো মুই কনদিন্অ ন-কোম্, মুই তরে ন-চিনোং।” সেক্কেনে অন্য শিচ্চ্যগুনেয়ো বেক্কুনে সেই একই কধা কলাক্।
গেৎশিমানী বাগানত্
(মার্ক ১৪:৩২-৪২; লূক ২২:৩৯-৪৬)
36পরেদি যীশু তা শিচ্চ্যগুনো সমারে গেৎশিমানী নাঙে এক্কান্ জাগাত্ গেলঅ আর শিচ্চ্যগুনোরে কলঅ, “মুই সিয়েনত্ যেইনে যেদক্কন্ সং তবনা গরং সেদক্কন্ সং তুমি ইয়েনত্ বুয়োই থাগঅ।”
37ইয়েন্ কোইনে তে পিতর আর সিবদিয়র্ দ্বিবে পুয়োরে সমারে নেযেল। তে মনত্ দুঘ্ আর কষ্ট পেলঅ। 38তে তারারে কলঅ, “দুঘে যেন মঅ পরাণান্ নিগিলি যার্। তুমি ইয়েনত্ থাগঅ আর মঅ সমারে জাগি থাগঅ।”
39পরেদি তে কিজু দূরোত্ যেইনে মাদিত্ মাঢা নিগুরিনেই পড়িলো আর তবনা গুরিনে কলঅ, “মর্ বাবা, যুনি সম্ভব্ অয় সালে এই দুঘোর্ গলচ্চো মত্তুন্ দূরোত্ যোক্। তো মর্ আওজ্ মজিম ন-ওক্, তঅ অায়োজ্ মজিম ওক্।”
40ইয়েনর্ পরেদি তে তার্ তিনজন শিচ্চ্য ইধু ফিরি এইনে দেগিলো তারা ঘুমোত্ পোজ্জ্যন্। তে পিতররে কলঅ, “ইয়েন্ কি! তুমি তিনজনে মঅ সমারে এক ঘণ্টায়ো কি জাগি থেই ন-পারিলা? 41জাগি থাগঅ আর তবনা গরঅ যেন পোরোক্ষ্যেত্ ন-পড়অ। আত্মায় আওজ্ আঘে ঠিগ্, মাত্তর্ কিয়্যেদি বল্পোজ্যে।”
42তে ফিরি যেইনে দ্বিবারত্ তবনা গুরিনে কলঅ, “ও বাহ্, মুই ন-গুজিলেয়ো যুনি এই দুঘোর্ গলচ্চো দূর্ ন-অয় সালে তঅ আওজ্চান পূরোণ্ ওক্।” 43তে কয়েকবার ফিরি এলঅ আর তে দেগিলো তা শিচ্চ্যগুনে ঘুমোত্ পোজ্জ্যন্, কিয়া তারা এদক্ অঘোর্ ঘুমোত্ যে চোগ্কুন্ খুলি ন-পারদন্।
44তে আরঅ তারারে ছাড়ি যেইনে তিন্ বার্ সেই একই কধা কোইনে তবনা গুরিলো। 45পরেদি তে শিচ্চ্যগুনো ইধু এইনে কলঅ, “তুমি কি এজঅ ঘুম যর্ আর জিরোর্? চঅ, সময়বো লুম্মেগি, মান্জ্য পুয়োবোরে পাপীগুনো আঢত্ ধুরি দিয়্যে অবঅ। 46উদো, আঢঅ আমি যেই। চঅ, যিবে মল্লোই বেঈমানী গরের্ এইয়্যে সে মানুচ্চো।”
শত্রুগুনো আঢত্ প্রভু যীশু
(মার্ক ১৪:৪৩-৫০; লূক ২২:৪৭-৫৩; যোহন ১৮:৩-১২)
47যীশু সেক্কেয়ো কধা কর্, এমন্ সময়োত্ যিহূদা সিয়েনত্ এলঅ। তে সেই বারজন শিচ্চ্য ভিদিরে একজন এলঅ। তা সমারে বোউত্ মানুচ্ ছুরি আর মুগোর্লোই এলাক্। আজল্ ধর্মগুরুগুনে আর বুড়ো নেতাগুনে ইগুনোরে পাধেয়োন। 48সেই বেঈমান্নো মানুচ্চুনো সমারে এক্কান্ চিহ্নো ঠিগ্ গোজ্যে; তে কোইয়্যেদে, “যিবেরে মুই চুমিম্ তেয়ই সেই মানুচ্চো; তুমি তারে ধুরিবা।”
49সেনত্তে যিহূদা সোজা যীশু ইধু যেইনে কলঅ, “মাষ্টরবাবু, তর্ শান্তি ওক্।” আর তে তারে চুমিলো।
50যীশু তারে কলঅ, “দাংগু, যিয়েন্ গুরিবাত্তে এচ্চ্যস্, সিয়েন গর্।”
মানুচ্চুনে লগে লগে এইনে যীশুরে ধুরিলাক্। 51যিগুনে যীশু সমারে এলাক্ তারা ভিদিরে একজনে তা ছুরিগান্ নিগিলেল আর তা দাঙর্ ধর্মগুরুবোর্ চাগরর্ এক্কান্ কান্ কাবি ফেলেল। 52সেক্কে যীশু তারে কলঅ, “তঅ ছুরিগান্ খাবত্ থঅ। ছুরি যিগুনে ধরন্ তারা ছুরিলোই মরন্। 53তুই কি মনে গরচ্, মুই মঅ বাপ্পোরে ডাগিলে তে ইক্কিনে মরে আজার্ আজার্ স্বর্গদূত্ পাধেই ন-দিবো? মাত্তর্ সালে পবিত্র বোইবোর্ কধাগান্ কেধোক্ক্যেন্ গুরি পূরোণ্ অবঅ? 54বোইবোত্ দঅ লেগা আঘে ইয়েনি বেক্কানি এবাবোত্যে অবঅ।”
55পরেদি যীশু মানুচ্চুনোরে কলঅ, “মুই কি ডাগেত্, তুমি ছুরি আর মুগোর্লোই মরে ধুরিবাত্তে এচ্চো? মুই পত্তিদিন্ উবোসনা-ঘরত্ বুয়োইনে শিক্ষ্যে দিদুং, আর সেক্কে দঅ তুমি মরে ন-ধরঅ। 56মাত্তর্ ইয়েনি বেক্কানি ঘুদিলো যেন পবিত্র বোইবোত্ ভাববাদীগুনে যিয়েনি লেখ্যন্ সিয়েনি পূরোণ্ অয়।” শিচ্চ্যগুনে বেক্কুনে সেক্কে যীশুরে ফেলেইনে ধেই গেলাক্।
দাঙর্ তেম্মাঙ মুজুঙোত্
(মার্ক ১৪:৫৩-৬৫; লূক ২২:৫৪-৫৫,৬৩-৭১; যোহন ১৮:১৩-১৪,১৯-২৪)
57যিগুনে যীশুরে ধোজ্যন্ তারা তারে দাঙর্ ধর্মগুরু কাইয়াফা ইধু নেযেলাক্। সিদু ধর্ম-মাষ্টরুনে আর বুড়ো নেতাগুনে এক সমারে এগত্তর্ ওইয়োন্। 58পিতরে দূরোত্তুন্ যীশুর পিজে পিজে দাঙর্ ধর্মগুরুবোর্ উদোনান সং গেলঅ আর যেরেদি কি অয় সিয়েন্ চেবাত্তে ভিদিরে সোমেইনে চুগিদারুনো লগে বজিলো।
59যীশুরে মারে ফেলেবাত্যে আজল্ ধর্মগুরুগুনে আর তেম্মাঙর্ বেক্ মানুচ্চুনে তা বিরুদ্ধে কিজু মিজে সাক্ষী তগা ধুরিলাক্। 60মাত্তর্ তারা কনঅ মিজে সাক্ষী ন-পেলাক্, যুনিয়ো বোউত্ মিজে সাক্ষী তা পৌইদ্যেনে কবাত্যে এচ্চোন্। যেরেদি দ্বিজন্ মানুচ্ উজেই এইনে কলাক্, 61“এ মানুচ্চো কোইয়্যেদে, মুই গোজেন ঘরান্ ভাঙি ফেলেইনে তিন দিনো ভিদিরে আরঅ সিয়েন্ বানেই দি পারং।”
62সেক্কে দাঙর্ ধর্মগুরুবো থিয়্যেল আর যীশুরে কলঅ, “ইগুনে তঅ বিরুদ্ধে যিয়েনি কদন্ সে পৌইদ্যেনে তুই কি কনঅ জোব্ ন-দিবে ?” 63মাত্তর্ যীশু অলর্ গুরি থেলঅ।
দাঙর্ ধর্মগুরুবো আরঅ তারে কলঅ, “তুই জেদা গোজেনর্ নাঙে শমক্ হেইনে আমারে কঅ, তুই কি সেই মশীহ, অত্তাৎ গোজেনর্ পুয়ো না হি।”
64সেক্কে যীশু তারে কলঅ, “অয়, তুই ঠিগই কোইয়োচ্। মাত্তর্ মুই তমারে ইয়েন্অ কঙর্, ইয়েনর্ পরেদি তুমি মান্জ্য পুয়োবোরে বেগত্তুন্ খেমতাবলা গোজেন ডেনেদি বুয়োই থাগদে আর মেঘ সমারে এত্তে দেগিবা।”
65সেক্কে দাঙর্ ধর্মগুরুবো তা কাবড়ান্ ফাদি ফেলেইনে কলঅ, ইবে গোজেনরে অগমান্ গুরিলো। আমাত্তুন্ আরঅ বেশ্ সাক্ষীর দরকার্ নেই? ইক্কিনে দঅ তুমি শুনিলা, তে গোজেনরে অগমান্ গোজ্জ্যে। 66তুমি কি মনে
তারা জোব্ দিলাক্, “তে দুষী আর হামাক্কায় মারে ফেলা ওক্।”
67সেক্কে মানুচ্চুনে যীশুর মুয়োনত্ সেফ্ ফেলেই দিলাক্ আহ্ ঘুষি চোড়্ মারিলাক্। 68তারা কলাক্, “এই মশীহ, কধে চেই, কন্না তরে মারিলো?”
পিতরর্ অস্বীগের্
(মার্ক ১৪:৬৬-৭২; লূক ২২:৫৬-৬২; যোহন ১৮:১৫-১৮,২৫-২৭)
69সেই অক্তত্ পিতরে বারেদি উদোনত্ বুয়োই এলঅ। এক্কো চাগরানী তাইধু এইনে কলঅ, “গালীল যীশু সমারে দঅ তুইয়ো এলে।”
70মাত্তর্ পিতরে বেক্কুনো মুজুঙোত্ অস্বিগের্ গুরিনে কলঅ, “তুই কি কর্ সিয়েন্ মুই হবর্ ন-পাং।”
71ইয়েনর্ পরেদি পিতরে বারেদি গেদো কুরে গেলঅ। তারে দেগিনে আর এক্কো চাগরানীয়ে সিদুগোর্ মানুচ্চুনোরে কলঅ, “এ মানুচ্চো নাসরদত্ যীশু সমারে এলঅ।”
72সেক্কে পিতরে শমক্ হেইনে আরঅ অস্বিগের্ গুরিনে কলঅ, “মুই সে মানুচ্চোরে ন-চিনোং।”
73যে মানুচ্চুনে সিয়েনত্ থিয়্যেই এলাক্ তারা হানক্কণ্ পরেদি পিতররে এইনে কলাক্, “হামাক্কায় তুই সিগুনোত্তুন্ একজন; তঅ কধানিয়ে তরে ধুরি দের্।”
74সেক্কে পিতরে নিজোরে অভিশাব্ দিলো আর শমক্ হেইনে কুয়ো ধুরিলো, “মুই সে মানুচ্চোরে মোটেই ন-চিনোং।” আর সেক্কেনে এক্কো রাদাকুরো ডাগ্কারি উদিলো।
75যীশু যিয়েনি কোইয়্যে সিয়েনি পিতরর্ মনত্ পড়িলো, “রাধাকুড়ো ডাগ্ কারিবার আগেদি তুই তিন পল্লা কবে, তুই মরে ন-চিনোস্।” সেক্কে পিতরে বারেদি যেইনে জদবদে কানা ধুরিলো।
Currently Selected:
মথি 26: CBT
Highlight
Share
Copy
Want to have your highlights saved across all your devices? Sign up or sign in
Copyright © 2021 Bangladesh Bible Society
