লেবীয় 18
18
কিয়্যেদি মিজেনা পৌইদ্যেনে মানা
1-2লগেপ্রভু মোশির মাধ্যমে ইস্রায়েলীয়গুনোরে কবাত্তে কলঅ, মুই লগেপ্রভু তমার গোজেন। 3সেনত্তেই তুমি যিয়েনত্ বজত্তি গুরিদা সে মিসর দেজর্ মানুচ্চুনে যিয়েন্ গুরিদাক্ তুমি সিয়েন্ ন-গুরিবা আর মুই যিয়েনত্ তমারে নেযাঙর্ সে কনান দেজর্ মানুচ্চুনে যিয়েন্ গরন্ সিয়েন তুমি ন-গুরিবা। তুমি সেই মানুচ্চুনোর্ চালচলন মজিম্ ন-চলিবা। 4তমার্ চলা পুরিবো মর্ রীদি-সুদোম মজিম। মর্ দিয়্যে সুদোম তমাত্তুন্ যত্তন্ গুরি পালা পুরিবো। মুই লগেপ্রভু তমার গোজেন। 5মর্ সুদোম আর রীদি-সুদোমানি তমাত্তুন্ পালন গরা পুরিবো, কিত্তে যে সিয়েনি পালন গুরিবো তে তার্ মাধ্যমে জীংকানি পেবঅ। মুই লগেপ্রভু।
6কনঅ কুদুম্মো সমারে কিয়্যেদি মিজেনা ন-চুলিবো। মুই লগেপ্রভু।
7তমা ভিদিরে কনজনে যেন নিজোর্ মাবো সমারে কিয়্যেদি মিজেইনে বাবর্ অসর্মান্ ন-গরন। তে তার্ মা; মা সমারে কিয়্যেদি মিজেনা ন চলিবো। 8সাদাঙা মা-সমারে কিয়্যেদি মিজেনা ন-চলিবো। সিয়েন্ গুরিলে বাপ্পোরে অগমান গরা অবঅ। 9নিজোর বোন বা সাদাঙা বোনো সমারে কিয়্যেদি মিজেনা ন-চলিবো-তে বাপ্পোর্ ঝি ওক্ বা মাবোর্ ঝি ওক্, আর তারার্ জর্ম একই ঘরত্ ওক্ বা যুদো যুদো জাগাদই ওক্। 10পূঅ বা ঝি ঘরর্ নাদিনো সমারে কিয়্যেদি মিজেনা ন-চলিবো; সেক্কে নিজোর্ অসর্মান অবঅ। 11সাদাঙা মার্ পেদত্ যে বোন্নোর্ জর্ম ওইয়্যে তা সমারে কিয়্যেদি মিজেনা ন-চলিবো। তে বোন। 12পিজেঙা সমারে কিয়্যেদি মিজেনা ন-চলিবো, কিত্যে তা সমারে বাপ্পোর্ লো-গান মিল্ আঘে। 13মজেঙা সমারে কিয়্যেদি মিজেনা ন-চলিবো, কিত্যেই তা সমারে মাবোর্ লো-গানর্ মিল্ আঘে। 14বাবর্ কনঅ ভেইয়ো মোগো সমারে কিয়্যেদি মিজেনা ন-চলিবো, কিত্যেই তে কুরঙা বা জেদেঙা। 15পুদোবো সমারে কিয়্যেদি মিজেনা ন-চলিবো। তে পূঅবোর্ মোক্ বিলিনে তা সমারে কিয়্যেদি মিজেনা ন-চলিবো। 16ভেইয়োর্ মোগো সমারে কিয়্যেদি মিজেনা ন-চলিবো। সিয়েন্ গুরিলে ভেইবোরে অগমান গরা অবঅ। 17এক সমারে কনঅ মিলেমানুচ্ আর তার্ ঝিবো সমারে কিয়্যেদি মিজেনা ন-চলিবো। সেই মিলেবোর্ পূঅ বা ঝিবো ঘরর্ নাদিনো সমারে কিয়্যেদি মিজেনা ন-চলিবো, কিত্যে সেই মিলেবো সমারে তারার্ লো-গানন্দি মিল্ আঘে। ইয়েন্ এক্কান্ বজং কাম্। 18মোক্কো বাঁজি থাগদে মোগো বোন্নোরে সুদিন ইজেবে মোগ্ লনা ন-চলিবো।
19মাসিগোর্ ফি-বলা অবস্থায় কনঅ মিলে সমারে কিয়্যেদি মিজেবাত্তে যানাগান ন-চলিবো। 20অন্য কার মোগো সমারে কিয়্যেদি মিজেইনে নিজোরে ফি-বলা গরানা ন-চলিবো।
21তমা ভিদিরেত্তুন কনজনে যেন তার্ পূঅ বা ঝিয়োরে মোলক দেবেদা ইদু আগুনোত্ পুড়িনে উৎসর্ব ন-গরন বা অন্য কনঅ বাবদে নিজোর্ গোজেনর্ নাঙে পবিত্রতাগান্ বর্বাদ্ ন-গরন। মুই লগেপ্রভু।
22মিলে সমারে কিয়্যেদি মিজেইদ্যে ধোক্ক্যেন গুরি মরদ সমারে মরদর্ কিয়্যেদি মিজেনাগান ন-চলিবো। ইয়েন্ এক্কান্ জঘন্য কাম। 23য়েমান সমারে কিয়্যেদি মিজেইনে কনঅ মরদে নিজোরে ফি-বলা গরানা ন-চলিবো। কনঅ য়েমান সমারে কনঅ মিলের্ কিয়্যেদি মিজেনা ন-চলিবো। এ মিজেনাগানি সুদোমর্ বিরুদ্ধে।
24এবাবোত্যে কনঅ কাম্ গুরিনে তমা ভিদিরেত্তুন্ কনজনে যেন নিজোরে ফি-বলা ন-গরন, কিত্যে তমা মুজুঙোত্তুন্ যিদুক্কুন জাদরে মুই দাবেই দিম্ তারায়ো সেবাবোত্যেগুরি নিজোরে ফি-বলা গোজ্যন্। 25ইয়েনত্তে তারার্ দেজ্চানঅ ফি-বলা ওই যেইয়্যে। সেনত্তে অন্যেয়র্ কারনে দেজ্চানরে মুই সাজা দুয়োঙর্ আর দেজ্চানেয়ো তা মানুচ্চুনোরে উগুলিনে ফেলেই দিবাত্তে যার্। 26মাত্তর্ তুমি মর্ সুদোম আর রীদি-সুদোমানি মানি চলিবা। তমার জাদর্ বা তমা ভিদিরেত্তুন বজত্তি গোজ্যে অন্য জাদর্ কনঅ মানুচ্ যেন এবাবোত্যে কনঅ জঘন্য কাম ন-গরন্। 27আগেত্তুন্ ধুরি যিগুনে সেই দেজত্ বজত্তি গুরি এত্তন্ তারা সেই কামানি গুরিনে দেজ্চানরে ফি-বলা গুরি ফেল্যন্। 28তুমিয়ো যুনি দেজ্চান ফি-বলা গরঅ সালে সিদুগোর্ আগঅ জাদ্তুনো ধোক্ক্যেন দেজ্চানে তমারেয়ো উগুলিনে ফেলেই দিবো।
29“যুনি কনজনে এবাবোত্যে কনঅ জঘন্য কাম্ গরন্ সালে তারে জাদ ভিদিরেত্তুন তুলি দিয়্যে পুরিবো। 30মর্ উগুমানি তুমি মানি চলিবা আর সিদু লুমিনেই আগ আদাম্মেগুনোর্ জঘন্য চালচলনর্ এক্কানঅ তুমি ন-গুরিবা। ইয়েনিলোই তুমি নিজোরে ফি-বলা ন-গুরিবা। মুই লগেপ্রভু তমার গোজেন।”
Currently Selected:
লেবীয় 18: CBT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 Bangladesh Bible Society
