লেবীয় 17
17
লো-গানই কিয়্যেগানর্ পরান্
1লগেপ্রভু মোশিরে কোইয়েদে, 2লগেপ্রভুর্ এ উগুমান্ তুই হারোণরে আর তার্ পূঅগুনোরে আর বেক্ ইস্রায়েলীয়গুনোরে জানেই দে। তারারে কঅ, 3-4যুনি কনঅ ইস্রায়েলীয় কনঅ গোরু, ছাগল বা ভেড়া কাবিবাত্তে চায় সালে তাত্তুন্ লগেপ্রভু থেবার-তাম্বুল মুজুঙোত্, অত্তাৎ মিলন-তাম্বুল দোরান ইদু লগেপ্রভুর্ নাঙে উৎসর্ব ইজেবে সিগুন্ কাবা পুরিবো। যুনি তে সিয়েন্ ন-গুরিনে ঘর ভিদিরে বা বাইরে কাবে সালে তারে লো-ঝরানাত্তে দায়ী গরা অবঅ। সেই লো-ঝরানাত্তে তা জাদ ভিদিরেত্তুন্ তারে বাদ দিয়া পুরিবো। 5ইস্রায়েলীয়গুনে ইক্কুনি যিদুক্কুন য়েমান মাদত্-উদোনত্ উৎসর্ব গোজ্যন সিগুন্ যেন তারা লগেপ্রভু ইদু নেযান্ সেনত্তে এ উগুমান্ দিয়া অলঅ। তারা সিগুন্ মিলন-তাম্বুল দোরানত ধর্মগুরুগুনো ইদু আনিনে লগেপ্রভুর নাঙে উদোলোলি-উৎসর্ব ইজেবে উৎসর্ব গরা পুরিবো। 6মিলন-তাম্বুল দোরান ইদু লগেপ্রভু যে পূজোবো রোইয়ে তার্ কিয়্যেত্ সে য়েমানর্ লো-গান্ ধর্মগুরুবোরে ছিদি দিয়া পুরিবো আর লগেপ্রভুরে হুজি গুরিবার্ তুম্বাজ্ ইজেবে সে য়েমানর্ তেলান্ পুড়ি ফেলা পুরিবো। 7লগেপ্রভু উগুরে অবিশ্বেজি ওইনে ছাগল-দেবেদাগুনোর্ নাঙে য়েমান্ উৎসর্ব গুরিনে তারাত্তুন আর নিজোরে বিজি দেনা ন-চলিবো। ইয়েন্ এক্কান্ থিদেবর্ গোজ্যে সুদোম ইজেবে বংশর্ পর বংশ ধুরিনে তারাত্তুন্ পালা পুরিবো।
8-9তারারে কঅ, কনঅ ইস্রায়েলীয় অথবা তারা ভিদিরে বজত্তি গোজ্যে অন্য জাদর্ কনঅ মানুচ্ যুনি পুজ্যে-উৎসর্ব বা অন্য কনঅ উৎসর্ব গুরিবাত্তে যেইনে সিবে লগেপ্রভুর্ নাঙে উৎসর্ব গুরিবাত্তে মিলন-তাম্বুল দোরান কুরে ন-আনন্, সালে সে মানুচ্চোরে তার জাদর্ ভিদিরেত্তুন্ তুলি ফেলা পুরিবো।
10কনঅ ইস্রায়েলীয় বা তারা ভিদিরে বজত্তি গোজ্যে অন্য জাদর্ কনঅ মানুচ্ যুনি লো খায় সালে তা সিত্তুন্ মুই মর্ মুয়োন্ ফিরেই নেযেম আর তা জাদত্তুন্ তারে তুলি ফেলেম, 11কিত্তে লো-গান ভিদিরে থাইদে পরাণবলাগুনোর্ পরানান্। সেনত্তেই তমার্ পরানর্ বদলে মুই সিয়েন্দোই পূজোবো উগুরে তমা পাপ্পানি ঢাগি দিবার্ বেবস্থা দুয়োং। লো-গান ভিদিরে পরানান্ আঘে বিলিই সিয়েন্ পাপ কাদেই দে। 12সেনত্তে মুই ইস্রায়েলীয়গুনোরে কঙর্, তারা আর তারা সমারে বজত্তি গোজ্যে অন্য জাদর্ কনঅ মান্জ্যে যেন লো-ন খান। 13কনঅ ইস্রায়েলীয় বা তারা ভিদিরে বজত্তি গোজ্যে অন্য জাদর্ কনঅ মানুচ্ যুনি খাইদে ধোক্ক্যেন কনঅ য়েমান্ বা পেখ্ শিগের্ গুরি আনন্ সালে তাত্তুন্ সিবের লো-গান্ নিগিলেনে সে লো-গান্ মাদি জাবে দিই রাগা পুরিবো, 14কিত্তে বেক্ পরাণবলাগুনোর্ পরান্ আঘে তারার্ জেদা কিয়্যেগানর্ লো-গান্দোই। সেনত্তে মুই ইস্রায়েলীয়গুনোরে কঙর্ যেন তারা কনঅ প্রাণীর্ লো-ন খান, কিত্তে লো-গান অলঅ বেক্ পরাণবলাগুনোর্ পরান্। যে সেই লো-গান্ খেব তারে তার্ জাদর্ ভিদিরেত্তুন্ উদেই দিয়া পুরিবো।
15“কনঅ জনে যুনি মরা য়েমানর্ বা ঝার্বো য়েমানে ছিনি ফেলেয়্যে য়েমানর্ য়েরা খায়-তে ইস্রায়েলীয় ওক্ বা তারার্ ভিদিরে বজত্তি-গোজ্যে জাদর্ মানুচ্ ওক্-তাত্তুন্ তার্ কাবড়-চুগোর্ ধোয়নে পানিলোই গাদা পুরিবো। তে সাজোন্যে সং ফি-বলা অবস্থায় থেবঅ, সে পরেদি তে সুদ্ধো-সাংগ অবঅ। 16মাত্তর্ তে যুনি কাবড়-চুগোর্ ন-ধয়্ আর ন-গাদে সালে তারে তার অন্যেয়ানত্তে দায়ী গরা অবঅ।”
Currently Selected:
লেবীয় 17: CBT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 Bangladesh Bible Society
