লেবীয় 13
13
ফারাঙি রোগ পৌইদ্যেনে সুদোম
1ইয়েন পরেদি লগেপ্রভু মোশি আর হারোণরে কলঅ, 2যুনি কনজনর্ কিয়্যের্ চামাড়াত্ কনঅ জাগাত্ ফুলি উদে বা ফজা দেগা যায় বা কয়েক্কান্ জাগাত্ জোল্-জোল্যে বিলি মনে অয় যিয়েন পরেদি কনঅ বজং চামাড়ারুগ্ ওই পারে, সালে তাত্তুন ধর্মগুরু হারোণ অথবা তার্ পূঅগুনো ইদু, অত্তাৎ ধর্মগুরুগুনোর্ যে কনঅ ইদু নেযা পুরিবো। 3ধর্মগুরুবো তার্ চামাড়াগানর্ সেই জাগায়ান্ চেবঅ। সেই জাগায়ানর্ কেশ্চান্ যুনি ধুব্ ওই থায়্ আর রুগ্কান্ চামাড়া বাদে আরঅ ভিদিরে যেই থায়্ বিলি মনে গরঅ সালে বুঝা পুুরিবো সিয়েন্ এক্কান বজং চামাড়ারুগ্। ধর্মগুরুবো তারে চেবার পরেদি ফিবলা বিলি ফগদাঙ্ গুরিবো। 4মাত্তর্ তার চামাড়ায়ানর্ সেই জোল্-জোল্যে জাগায়ান্ যুনি ধুব্ অয় মাত্তর্ চামাড়াগান ইন্দি গভীনোত্ ন-যেই থায়্ আর সেই জাগায়ানর্ কেশ্চান্ যুনি ধুব্ ন-ওই থায়্, সালে ধর্মগুরুবো সেই মানুচ্চোরে সাত দিন সং অন্য মানুচ্চুনোত্তুন্ দূরোত্ ফারগ্গুরি রাগেব। 5সেই সাত দিনোর্ পরেদি দিন্নোত্ ধর্মগুরুবো তারে আরঅ চেবঅ। যুনি এ ভিদিরে সেই রুগ্কান চামাড়া উগুরে ছিদি ন-পুড়িনে যেধোক্ক্যেন এলঅ সেধোক্ক্যেন থেই যায় সালে তে আরঅ সাত দিন সং তারে ফারগ্গুরি রাগেবা। 6সেই সাত দিনোর্ পরেদি দিন্নোত্ ধর্মগুরুবো তারে আরঅ চেবঅ। যুনি এ ভিদিরে তার্ রুগ্কান্ চামাড়া উগুরে ছিদি ন-পুড়িনে প্রায় মু মরা অয় সালে তে তারে শুদ্ধো-সাংগ বিলি ফগদাঙ্ গুরিবো, কিত্তে সিবে বানা এক্কো চিগোন ফোড়া, আর কিচ্চু নয়। সেক্কে মানুচ্চোর তার্ কাবড়-চুগোর্ ধোই ফেলা পুরিবো আর সে পরেদি তে শুদ্ধো-সাংগ অবঅ।
7মাত্তর্ ধর্মগুরুবো তারে শুদ্ধো-সাংগ বিলি ফগদাঙ্ গুরিবার্ পরেদি যুনি সেই ফোড়াবো তার্ চামাড়া উগুরে ছিদি পড়ে সালে আরঅ তাত্তুন্ ধর্মগুরুগুনো ইদু যাহ্ পুরিবো। 8সেক্কে ধর্মগুরুবো তারে আরঅ চেবঅ। যুনি এ ভিদিরে হামাক্কায়্ সিবে চামাড়া উগুরে ছিদি পুড়ি থায়্ সালে তে তারে ফিবলা বিলি ফগদাঙ্ গুরিবো, কিত্তে সিয়েন এক্কান্ বজং চামাড়ারুগ্।
9-10কারর্ যুনি চামাড়ারুগ্ অয়্ সালে তারে ধর্মগুরুগুনো ইদু নেযা পুরিবো আর ধর্মগুরুবো তারে চেবঅ। যুনি সেই রোগ্কানর্ লক্ষণান্ এধোক্ক্যেন অয়্, চামাড়া উগুরে কনঅ জাগা ধুব্ ওইনে ফুলি উঠ্যে আর সেই জাগায়ানর্ কেশ্ছানি ধুব্ ওই গেলে আর সেই ফুল্যে জাগানত্ কাজা ঘা থেলে, 11মাত্তর্ বুঝো পুরিবো সিয়েন্ এক্কান্ পূরোণ বজং চামাড়ারুগ্। সেক্কে ধর্মগুরুবো তারে ফিবলা বিলি ফগদাঙ্ গুরিবো। তারে অন্যগুনোত্তুন্ দূরোত্ ফারগ্গুরি রাগেবার্ দরকার্ নেই,কিত্তে তে-দঅ ফিবলা ওই আঘে। 12মাত্তর্ যুনি লক্ষণান্ অন্য বাবোত্যে ওইনে রোগ্কান্ তার্ গোদা কিয়্যেনত্ ছিদি পড়ি থায়্ আর ধর্মগুরুবোর্ যেত্তমান্ চোগোত্ পড়ে সেক্কে যুনি মনে গড়ন্ রোগীবোর্ মাদাত্তুন্ ধুরি টেং সং গোদা কিয়্যেনত্ সিয়েন্ আঘে, 13তো তে তারে গমেডালে চেবঅ। সেক্কে যুনি দেগা যায় হামাক্কায়্ সিয়েন্ তার্ গোদা কিয়্যেনত্ আঘে মাত্তর্ সিয়েন্ ধুব্ ওই যেইয়্যে সালে তে তারে শুদ্ধো-সাংগ বিলি ফগদাঙ্ গুরিবো। তার্ পুরো কিয়্যেগান্ ধুব্ ওই যেইয়্যে বিলি তে ফিবলা নয়। 14মাত্তর্ সে পরেদি যুনি তার্ কিয়্যেনত্ কনঅ কাজা ঘা দেগা যায় সালে তে ফিবলা অবঅ। 15ধর্মগুরুবো সে ঘা-গান্ চেবার্ পরেদি তারে ফিবলা বিলি ফগদাঙ্ গুরিবো। সে ঘা-গান্ ফিবলা; তার বজং চামাড়ারুগ্ ওইয়্যে। 16সে পরেদি সেই কাজা ঘা-গানর্ অবস্থা বুদুলি যেইনে যুনি সিয়েন্ ধুব্ ওই যায় সালে তাত্তুন্ আরঅ ধর্মগুরুগুনো ইদু যাহ্ পুুরিবো। 17সেক্কে ধর্মগুরুবো তারে আরঅ চেবঅ। তার্ পুরো কিয়্যেগানত্ ছিদি পোজ্যে রোগ্কান্ যুনি হামাক্কায়্ ধুব্ ওই থায়্ সালে তে তারে শুদ্ধো-সাংগ বিলি ফগদাঙ্ গুরিবো, কিত্তে তে শুদ্ধো-সাংগ।
18-19যুনি কারঅ কিয়্যেত্ ফোড়া উদিনে গম্ অয়্ আর যেরেন্দি সেই জাগায়ান্ ধুব্ ওইনে ফুলি উদে বা রাঙা রাঙা-ধুব্ ধুব্ জোল্-জোল্যে দেগা যায়্ সালে তাত্তুন্ ধর্মগুরুগুনো ইদু যাহ্ পুরিবো। 20ধর্মগুরুবো তারে চেবঅ। যুনি সিবে চামাড়া ছিদিনে গভীনোত্ চমোগোই আর সে জাগানর্ কেশ্চান ধুব্ ওই থায়্ সালে ধর্মগুরুবো তারে ফিবলা বিলি ফগদাঙ্ গুরিবো, কিত্তে সিয়েন্ ফোড়া জাগানত্তুন্ নিগিল্যে বজং চামাড়ারুগ্। 21মাত্তর্ ধর্মগুরুবো যুনি কনঅ ধুব্ কেশ্ সিয়েনত্ ন-দেগে আর সিয়েন্ যুনি চামাড়া ছিদি পড়িনে গভীনোত্ ন-যেইনে প্রায়্ মিলে যাইদে ধোক্ক্যেন ওই থায়্ সালে ধর্মগুরুবো তারে সাত দিন সং অন্যগুনোত্তুন্ দূরোত্ ফারগ্ গুরি রাগেব। 22মাত্তর্ যুনি দেগা যায় সিয়েন্ চামাড়া উগুরে ছিদি পড়ের্ সালে ধর্মগুরুবো তারে ফিবলা বিলি ফগদাঙ্ গুরিবো, কিত্তে সিয়েন্ এক্কান্ রুগ্। 23মাত্তর্ সিয়েনর্ যুনি কনঅ পরিবত্তন্ ন-অয়্ আর ছিদিয়ো ন-পড়ে সালে বুঝো যেবঅ, সিয়েন্ ফোড়াবোর্ এক্কান্ বানা দাগ। ধর্মগুরুবো সেক্কে তারে শুদ্ধো-সাংগ বিলি ফগদাঙ্ গুরিবো।
24যুনি কারঅ কিয়্যেত্ কনঅ জাগাত্ পড়ি যায়্ আর সে পুজ্যে জাগানত্ কাজা ঘা-গানর্ ভিদিরে রাঙা-ধুব্ অথবা ধুব্ জোল্-জোল্যে কনঅ কিজু দেগা যায়, 25মাত্তর্ ধর্মগুরুবো সিয়েন্ পোরোক্ষ্যে গুরি চেবঅ। যুনি দেগা যায় সে জাগানর্ কেশ্চান্ ধুব্ ওই যেইয়্যে আর সে ভাগকান্ ন্ চামাড়া ছিদি পড়িনে ভিদিরে চোম্মোগোই সালে বুঝো পড়িবো, সে পুজ্যে জাগানত্ বজং চামাড়া রুগ্ ফুদি উঠ্যে। ধর্মগুরুবো তারে ফিবলা বিলি ফগদাঙ্ গুরিবো, কিত্তে সিয়েন্ এক্কান্ বজং চামাড়ারুগ। 26মাত্তর্ ধর্মগুরুবো পোরোক্ষে গুরিনে যুনি দেগেদে যে, সে জাগানর্ কেশ্চান্ ধুব্ ন-অয়্ আর সে ভাগকান্ চামাড়া ছিদি পড়িনে ভিদিরে ন-যায় বরং প্রায় মিলে যেইয়্যে, সালে ধর্মগুরুবো তারে সাত দিনোত্তে অন্যগুনোত্তুন্ ফারগ্ গুরি রাগেব। 27সেই সাত দিনোর্ শেজ দিন্নোত্ ধর্মগুরুবো তারে আরঅ পোরোক্ষে গুরিনে যুনি দেগেদে যে, চামাড়া উগুরে সিয়েন্ ছিদি পোজ্যে সালে ধর্মগুরুবো তারে ফিবলা বিলি ফগদাঙ্ গুরিবো, কিত্তে সিয়েন্ এক্কান্ বজং চামাড়ারুগ। 28মাত্তর্ সেই জাগায়ান্ যুনি যেধোক্ক্যেন এলঅ সেধোক্ক্যেন থায়্ আর রুগ্কান চামাড়া উগুরে ছিদি ন-পড়িনে প্রায় মিলে যাইদে ধোক্ক্যেন ওই থায়, সালে বুঝো পড়িবো পুড়ি যানার্ কারনে সিয়েন্ ফুলি উঠ্যে। সেক্কে ধর্মগুরুবো তারে শুদ্ধো-সাংগ বিলি ফগদাঙ্ গুরিবো, কিত্তে সিয়েন্ এক্কান্ পুজ্যে দাগ্ বানা।
29যুনি কনঅ মরদ বা মিলের্ মাঢাত্ অথবা দাড়ি ভিদিরে রোগোর্ লক্ষণ দেগা যায়, 30সালে ধর্মগুরুবো তারে পোরোক্ষে গুরি চেবঅ। যুনি তে মনে গরে সিয়েন্ চামাড়াগান্ ছিদি পড়িনে ভিদিরে চোম্মেগোই আর তা ভিদিরে কেশ্চানিয়ো ওলোদ ধোক্ক্যেন আর পাদল্ ওই যেইয়্যে সালে তে সে মানুচ্চোরে ফিবলা বিলি ফগদাঙ্ গুরিবো, কিত্তে সিয়েন্ এক বাবোত্যে কাচ্ছোনি-মাঢা আর দাড়ির্ বজং চামাড়ারুগ। 31মাত্তর্ রুগ্কান পোরোক্ষ্যে গুরিবার সময় ধর্মগুরুবো যুনি মনে গরে, সিয়েন্ চামাড়াগান্ পড়িনে ভিদিরে ন-যায় মাত্তর্ সিয়েন ভিদিরে যে কেশ্চানি আঘে সিয়েন্ কালা নয়, সালে সে রুগীবোরে তে সাত দিন সং অন্যগুনোত্তুন্ ফারগ্ গুরি রাগেব। 32সে পরেদি সে সাত দিনোর্ শেজ্ দিন্নোত্ ধর্মগুরুবো আরঅ সিয়েনি পোরোক্ষ্যে গুরিনে যুনি দেগে সেই কাচ্ছোনিগান্ ছিদি ন-পড়ে আর সিয়েন ভিদিরে কেশ্চানিয়ো ওলোদ্যে ন-অয় আর অয়ত সিয়েন চামাড়াগান্ ছিদিনে মুরোত্ ন-যায়, 33মাত্তর্ কাচ্ছোনির্ জাগায়ান্ বাদ দিইনে সে মানুচ্চোর্ বাদবাগি চুলানি বা কেশ্চানি কাবি ফেলা পুরিবো। ইয়েনর্ পরেদি ধর্মগুরুবো আরঅ সাত দিন সং তারে অন্যগুনোত্তুন্ ফারগ্ গুরি রাগেব। 34সে সাত দিনোর্ শেজ দিন্নোত্ ধর্মগুরুবো তার্ সে কাচ্ছোনিগান্ আরঅ যুনি পোরোক্ষ্যে গুরি চাই, সিয়েন্ চামাড়া উগুরে ছিদি ন-পড়ে আর মনে অয় সিয়েন্ চামাড়া পড়িনে ভিদিরে ন-যায়, সালে ধর্মগুরুবো তারে শুদ্ধো-সাংগ বিলি ফগদাঙ্ গুরিবো। সে পরেদি তাত্তুন্ কাবড়-চুগোড়্ ধোয় ফেলা পড়িবো আর সেক্কে তে শুদ্ধো-সাংগ অবঅ। 35তারে শুদ্ধো-সাংগ বিলি ফগদাঙ্ গুরিবার্ পরেদি যুনি তার্ কিয়্যেত্ সে কাচ্ছোনিগান্ ছিদি পড়েদে দেগা যায়, 36সালে ধর্মগুরুবো তারে আরঅ চেবঅ। যুনি দেগা যায় সেই কাচ্ছোনিগান্ ছিদি পোজ্যে মাত্তর্ কেশ্চানি ওলোদ ধোক্ক্যেন ওইয়্যে নাহি সিয়েন্ গমে ডালে পোরোক্ষ্যে চেবার্ দরকার্ নেই, কিত্তে মানুচ্চো ফিবলা। 37মাত্তর্ ধর্মগুরুবো যুনি মনে গরে সিয়েন্ যেধোক্ক্যেন এলঅ সেধোক্ক্যেন আঘে আর সেই কাচ্ছোনির জাগানত্ কালা কেশ্ উঠ্যে সালে বুঝো পড়িবো সিয়েন্ গম্ ওই যেইয়্যে। তে শুদ্ধো-সাংগ ওইয়্যে আর ধর্মগুরুবো তারে শুদ্ধো-সাংগ বিলি ফগদাঙ্ গুরিবো।
38কনঅ মরদ বা মিলের্ চামাড়া উগুরে যুনি কনঅ জ্বোল্-জ্বোল্যে, অত্তাৎ ধুব্ জ্বোল্-জ্বোল্যে দাগ্ দেগা যায়, 39সালে ধর্মগুরুবো সিয়েন্ পোরোক্ষ্যে গুরি চেবঅ। যুনি সে দাগ্কানি রঙ্মোজ্যে ধুব্ অয় সালে বুঝো পড়িবো চামাড়াগান উগুরে ধুব্ ওইয়্যে আর সেক্কে কনঅ ক্ষোতি ন-অবঅ, তে শুদ্ধো-সাংগ।
40যুনি কনঅ মান্জ্যর্ চুল উগুরি যেইনে মাঢাত্ টাক্ পড়ে ছালে তে ফিবলা ন-অবঅ। 41মাঢাবোর্ মুজুঙো চুলানি উগুরি যেইনে যুনি কারঅ কবাল উগুরে টাক্ পড়ে সালে তে ফিবলা ন-অবঅ। 42মাত্তর্ যুনি তার্ টাক্পোজ্যে মাঢাত্ বা কবালত্ রোগোর্ কনঅ রাঙা-ধুব্ রংয়র্ লক্ষণ দেগা যায় সালে বুঝো পড়িবো তার্ মাঢাত্ বা কবালত্ বজং চামাড়ারুগ ওইয়্যে। 43ধর্মগুরুবো তারে পোরোক্ষ্যে গুরিবাত্তে যেইনে যুনি দেগেদে, বজং চামাড়ারুগো ধোক্ক্যেন তার্ মাঢাত্ বা কপালর্ রাঙা-ধুব্ জাগায়ান ফুলি উঠ্যে, 44মাত্তর্ বুঝো পড়িবো মানুচ্চোর্ বজং চামাড়া রুগ ওইয়্যে আর তে ফিবলা। তা মাঢাবোত্ সে রুগ্কানত্তে ধর্মগুরুবো তারে ফিবলা বিলি ফগদাঙ্ গুরিবো।
45এধোক্ক্যেন রোগ্ যার্ অবঅ তাত্তুন্ ফাদা কাবড় উরো পড়িবো। তে চুলান্ খুলি রাগেব। তাত্তুন্ তার্ মুয়োনর তলেন্দিগান্ ঢাগিনে কিযেক্ কারিনে কুয়া পুড়িবো, ফিবলা, ফিবলা। 46তার্ কিয়্যেত্ যেদকদিন সেই মান্জ্য ইদু সাজুরেদে রোগ্কান্ থেবঅ সেদকদিন তে ফিবলা থেবঅ। তাত্তুন ঘরর্ বারেদি গায় গায় থাহ্ পড়িবো।
ফারাঙি রুগ পৌইদ্যেনে সুদোম
47-48যুনি কনঅ কাবড়র্ কনঅ জাগাত্ ক্ষয়-গোজ্যে ফারাঙি রুগে ধরে-সিয়েন্ কেজর্ বা মসীনা কাবড় উগুরে ওক অথবা বুনিবার্ আগে কেজর্ বা মসীনা সুদোর টানা বা পোড়ান উগুরে ওক অথবা চামাড়া বা চামাড়ার্ জিনিজো উগুরে ওক- 49আর সে জাগায়ান্ চাদে যুনি কিজু য়েল্ অথবা রাঙা অয় সালে বুঝো পড়িবোদে সিয়েন্ এক বাবোত্যে ক্ষয়-গোজ্যে ফারাঙি রুগ। সিয়েন সেক্কে ধর্মগুরুবোরে দেগা পড়িবো। 50ধর্মগুরুবো সিয়েন গমে ডালে চেইনে সাত দিনোত্তে সেই জিনিস্ছান্ অন্য বেক্ জিনিস্ছানিত্তুন্ ফারগ্ গুরি রাগেব। 51-52সে পরেদি সেই সাত দিনোর্ শেজর দিন্নোত্ ধর্মগুরুবো আরঅ সিয়েন্ চেবঅ। যুনি এ ভিদিরে সে কাবড়ান্ অথবা টানা-পোড়েনর্ সুদোগান্ বা চামাড়া বা চামাড়ার্ জিনিজো উগুরে ফারাঙিগান্ ছিদি পড়ি থায় সালে বুঝো পড়িবো সিয়েন্ ক্ষয়-গোজ্যে ফারাঙিয়ে ধোজ্যে আর জিনিস্ছান্ ফিবলা ওই যেইয়্যে। সেক্কে সে ফারাঙি ধোজ্যে জিনিস্ছান্ পড়ি ফেলা পুরিবো, কিত্তে সিয়েন্ এক বাবোত্যে ক্ষয়-গরেদে ফারাঙি। জিনিস্ছান্ সেনত্তে পুড়ি ফেলা পুরিবো।
53“মাত্তর্ ধর্মগুরুবো যুনি দেগে, সেই কাবড়ান্ অথবা টানা-পোড়েনর্ সুদোগান্ কিম্বা চামাড়া বা চামড়ার্ জিনিজো উগুরে সিয়েন্ ন-ছিদিনে আগ জাগাত্ রোইয়্যে, 54সেক্কে তে সেই জিনিস্ছান্ ধোয়্ ফেলেবার্ উগুম্ দিবো। পরেদি তে সিয়েন্ আরঅ সাত দিন সং অন্য বেক্ জিনিজোত্তুন্ ফারগ্ গুরি রাগেব। 55সে পরেদি ধর্মগুরুবো আরঅ সিয়েন্ চেবঅ। সিয়েন্ ছিদি ন-পড়িলেয়ো যুনি চাদে আগ ধোক্ক্যেন থেই যায় সালে বুঝো পড়িবো জিনিস্ছান্ ফিবলা। জিনিস্ছান ভিদিরে-বাইরে যিয়েনদি সেই ফারাঙিগান্ থেদ সাৎ, সিয়েন্ আগুনোত্ পুড়ি ফেলা পুরিবো। 56জিনিস্ছান্ ধনার্ পরেদি ধর্মগুরুবো যুনি দেগেদে, জাগায়ান্ রংমরা ওই যেইয়্যে সালে সে রংমরা জাগায়ান্ তাত্তুন্ ফাদি ফেলা পুরিবো। 57মাত্তর্ সেই জিনিস্ছানত্ যুনি আরঅ ফারাঙি দেগা যায় সালে বুঝো পুরিবো সিয়েন্ ছিদি পোজ্যে। সে ফারাঙি-ধোজ্যে জিনিস্ছান্ আগুন্দোই পুড়ি ফেলা পুরিবো। 58জিনিস্ছান্ ধনার্ পরেদি যুনি দেগা যায় ফারাঙিগান্ মিলে যেইয়্যে সালে সিয়েন্ আরঅ ধোয়্ ফেলা পুরিবো, সেক্কে সিয়েন্ শুদ্ধো-সাংগ অবঅ।”
59এই সুদোম মজিম ফারাঙি-ধোজ্যে কেজর্ বা মসীনা কাবড়র্, টানা বা পোড়েনর্ কনঅ সুদো কিম্বা চামাড়ার্ কনঅ জিনিস শুদ্ধো-সাংগ বা ফিবলা বিলি ফগদাঙ্ গরা পুরিবো।
Currently Selected:
লেবীয় 13: CBT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 Bangladesh Bible Society
