যিশাইয় 54
54
ভবিচ্চদে সিয়োনানরে বাঈনী গরানা
1লগেপ্রভু কোইয়্যেদে, ও ভায্ মিলেবো, যিবের কনদিন্অ পুয়ো ন-অয়, তুই হুজিয়ে গান গাহ্; তুই, যিবের্ কনদিন্অ পুয়ো ফুদেবার পেটপিড়ে ন-অয়, তুই জদবদে গান গাহ্, হুজিয়ে রঅ ছাড়্; কিত্তে যিবের্ নেগ্ আঘে তাত্তুন্ যিবের কনজন নেই তার পুয়ো-ছা বোউত্ অবাক্। 2তঅ তাম্বুলানর্ জাগায়ান আরঅ বাড়া; তঅ তাম্বুলানর্ পর্দাগান আরঅ পাদাজ্যে গর্, কুলি ন-গুরিচ্। তঅ তাম্বুলানর দুড়িগানি লাম্বা গর্ আর খুদোগুন দরমর গর্, 3কিত্তে তুই ডেনে আর বাঙেদি ছিদি পড়িবে। তঅ বংশধরুনে অন্য জাদ্তুনোর দেজ্চান গজক্ গুরিবাক্ আর তারার মানুচ্ নেইয়্যে শঅরানিত্ বজত্তি গুরিবাক্। 4তুই ন-দোরেচ্, কিত্তে তরে লাজ্ দিয়্যে ন-অবঅ। তুই ন-লাজেচ্, কিত্তে তরে অসর্মান্ গরা ন-অবঅ। তর্ গাবুজ্যে জিংকানির লাজানাগান তুই ভুলি যেবে আর তর্ রানিমিলে থানার্ দুন্নামান তুই ইদোত্ ন-রাগেবে। 5তর্ গোজেনে তর্ নেক্, তা নাঙান্ বেগত্তুন্ খেমতাবলা লগেপ্রভু; ইস্রায়েলর সেই সুদ্ধো-সাংগ মানুচ্চো তর্ উদ্ধোরগুরিয়্যে। তারে বেক্ পিত্থিমীগানর গোজেন কুয়ো অয়। 6তুই ছুড়্ কাবোজ্ দিয়্যে আর মনত্ দুঘ্ পেইয়্যে মোগো ধোক্ক্যেন ওইয়োচ্, গাবুজ্যে জিংকানিত্ দূর গুরি দিয়্যে মোগো ধোক্ক্যেন ওইয়োচ্; মাত্তর্ লগেপ্রভু আরঅ তরে ডাক্ক্যে। মুই তর্ গোজেন এ কধাগান কঙর্।
7এক মুহূত্তত্ত্যে মুই তরে ছাড়ি দুয়োং, মাত্তর্ গভিন্ কোচ্পানালোই মুই তরে ফিরেই আনিম। 8রাগে কানক্কনত্তে তত্তুন্ মুই মুয়োন ফিরেয়োং, মাত্তর্ উমর কোচ্পানালোই মুই তঅ উগুরে মেয়্যে গুরিম। মুই তর্ উদ্ধোর গুরিয়্যে লগেপ্রভু এ কধাগান কঙর্।
9“মইদু ইয়েন নোহর দিনুনো ধোক্ক্যেন লাগের্। মুই যেবাবোত্যে শমক্ হেইয়োং, নোহ সময়োত্ পানি ধোক্ক্যেন পানি আর কনদিন্অ পিত্থিমীগান নাঢি ন-ফেলেব, সেবাবোত্যেগুরি এ শমক্তান্ গোজ্যং, তঅ উগুরে রাগ্ ন-গুরিম, তরে আর কনদিন্অ গেইল্ ন-দিম। 10যুনিয়ো বা মুড়োমুড়িগুন্ সুরি যান্ আর মুড়োগুন গুলি যান্, তো তত্তে মর্ অমকদ কোচ্পানাগান সুরি ন-যেবঅ বা মর্ সুগ্-শান্দির সুদোমান ন-লুরিবো।” তঅ উগুরে যিবের্ দোয়্যে-মেয়্যে আঘে সেই লগেপ্রভু এ কধাগান কত্তে।
11লগেপ্রভু কত্তে, ও ঝড়ে আঘাত্ পেইয়্যে, সান্তনা ন-পেইয়্যে অত্যেচার ওইয়্যে শঅরান্, মুই তরে জোল্জোল্যে পাত্তর্লোই বানেবাত্তে যাঙর্ আর তর্ গড়াগান নীলকান্ত মণিলোই গাড়েম্। 12পদ্মরাগমণিলোই তর্ দেবালান তুলিম্, ঝোক্ঝোক্যে মণিলোই তর্ গেট্টো বানেম্ আর তর্ বেক দেবালান্ মংগা মংগা পাত্তর্লোই তুলিম্। 13তর্ বেক পুয়োগুন্ লগেপ্রভুর শিচ্চ্য অবাক্ আর তঅ পুয়োগুনোর্ জদবদে ভালেদি অবঅ। 14তুই ন্যায্যগান্দোই থিদেবর্ অবে। তত্তুন্ অত্যেচারান দূরোত্ থেবঅ; তর্ দোরেবার কিচ্চু ন-থেবঅ। অমকদ দর্বুক্কান দূরোত্ সুরি যেবঅ, সিয়েন তইদু ন-এবঅ। 15যুনি কনজনে তরে আক্রমণ গরন্ সালে বুঝো পুড়িবোদে মুই তারে ন-পাদাং। যে তরে আক্রমণ গুরিবো তত্তেই তার পতন অবঅ।
16“চাহ্, যে কামার্বো আঙারা আঙুনোত্ বোইয়্যের্ দে আর কাম্ গুরিবার যগাজ্যে আত্যের্ বানায় সেই কামার্বোরে মুয়ই বানেয়োং। ভস্ত গুরি দিবাত্তে মুয়ই ভস্ত গুরিয়্যেবোরে বানেয়োং। 17তর্ বিরুদ্ধে বানেয়্যে কনঅ আত্যের্ ন-টিগিবাক্; তরে দুষি গোজ্যে পত্তি মান্জ্যর যুক্তি খোন্দেইনে তুই তারারে দুষি গুরিবে। ইয়েনই অলঅ লগেপ্রভুর্ চাগরুনোর অধিকার আর তারার্ যগাজ্যে পাওনা।”
Currently Selected:
যিশাইয় 54: CBT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 Bangladesh Bible Society
