যিশাইয় 53
53
1আমার্ দিয়্যে হবরান্ কন্না বিশ্বেজ্ গোজ্যে?
কাইদু বা লগেপ্রভুর্ খেমতাবলা আঢ্তান ফগদাং ওইয়্যে?
2তে তা মুজুঙোত্ নরম চারা ধোক্ক্যেন,
শুগুনো মাঢিত্ লাগেয়্যে গাজ ধোক্ক্যেন দাঙর্ অলঅ।
তার এ ধোক্ক্যেন দোল্ বা সয়সাগজ্যে নেই যে,
তান্দি আমি ফিরি চেই;
তা চেঙারাগান এমন্ দোল্ নয় যে, আমারে আকর্ষন গুরি পারে।
3মান্জ্যে তারে ঈচ্ গরদন আর এলাফেলা গোজ্যন্;
তে যন্ত্রনাত্ ভুগের্ আর পিড়েগান লগে তার পরিচয় এলঅ।
মান্জ্যে যিবেরে দেগিলে মুয়োন্ ফিরেন তে তা ধোক্ক্যেন ওইয়্যে;
মান্জ্যে তারে ঈচ্ গোজ্যন আর আমি তারে সর্মান ন-গুরিই।
4ঘেচ্চেকগুরি, তেয়ই আমার বেক পিড়েগানি তুলি নেযেয়্যে
আর আমা যন্ত্রনাগান বুয়োই নেযেয়্যে;
মাত্তর্ আমি মনে গোজ্যেই গোজেনে তারে আঘাত্ গোজ্যে,
তারে মাজ্যে আর দুঘ্ দিয়্যে।
5আমা পাপত্তে তারে পেরেক্ মারা ওইয়্যে;
আমা অন্যেয়ত্তে তারে চুর্মার্ গরা ওইয়্যে।
যে সাজাগানর ফলে আমার সুগ্-শান্দি এচ্চ্যে
সেই সাজাগান তারেই দিয়্যে ওইয়্যে;
তে যে আঘাত্তান পেইয়্যে সিয়েনত্তে আমি গম্ ওইয়্যেই।
6আমি বেক্কুনে ভেড়া ধোক্ক্যেন গুরি ভান্ন্যেই পধেদি যেইয়্যেই;
আমি বেক্কুনে যার্ যার্ পধেদি ফিজ্যেই।
লগেপ্রভু আমার বেক্কুনোর অন্যেয়ানি তা উগুরে চাপি দিয়্যে।
7তে অত্যেচারিত অলঅ আর দুঘ্ পেলঅ,
মাত্তর্ তো তে মুয়োন্ ন-খুলিলো;
কাবি ফেল্যে ভেড়া ছঅ ধোক্ক্যেন,
কেশ্ উগুরেয়্যেগুনো মুজুঙোত্ জুরো গুরি থেইয়্যে পাদি ভেড়া ধোক্ক্যেন
তে মুয়োন্ ন-খুলিলো।
8অত্যেচার আর অন্যেয় বিচের্ গুরি তারে মারে ফেলা ওইয়্যে।
সেই সময়োত্ মানুচ্চুনো ভিদিরে কন্না খিয়েল্ গোজ্যে যে,
মঅ মানুচ্চুনোর্ পাপত্তে তারে জেদা মানুচ্চুনোর দেজত্তুন্
শেজ্ গুরি ফেলা ওইয়্যে?
সেই সাজাগান দঅ তারাত্তুন্ পাওনা এলঅ।
9যুনিয়ো তে কনঅ ক্ষোতি ন-গরে
বা তা মুয়োত্ কনঅ ছলনার্ কধা ন-এলঅ,
তো পাজিগুনো লগে তারে গোর্ দিয়্যে ওইয়্যে
আর মুরিনে মুরি তে তাগোয়্যে মান্জ্যর সমাজ্যে ওইয়্যে।
10আজলে লগেপ্রভু তার আওজ্ মজিম তারে চুর্মার্ গোজ্যে
আর তারে দুঘ্ গরা বাজেই দিয়্যে।
লগেপ্রভুর চাগর্বো যেক্কে তা পরাণানরে দুষোর্- উৎসর্ব ইজেবে দিবো
সেক্কে তে তা পুয়োগুনোরে দেগিবো
আর তা আয়ুগান বাড়েব;
তা মাধ্যমে লগেপ্রভুর আওজ্চান পূরোণ অবঅ।
11তে তার দুঘ্ পানার ফলান্ দেগিনে হুজি অবঅ;
লগেপ্রভু কোইয়্যেদে, মর্ ন্যায়বলা চাগরবোরে গমেডালে হবর্ পানার মাধ্যমে
ভালোক্ জনরে নিদ্দুযি বিলিনে গুজি লুয়ো অবঅ,
কিত্তে তে তারার বেক্ অন্যেয়ানি বুয়োই নেযেব।
12সেনত্তে মহৎ মানুচ্চুনো ভিদিরে মুই তারে এক্কান ভাগ্ দিম
আর তে বোলিগুনো সমারে জিদেনার ফল ভাগ গুরিবো,
কিত্তে তে নিজোর আওজে পরাণান্ দিয়্যে।
তারে পাপীগুনো সমারে গোণা ওইয়্যে;
তে ভালোক্ জনর পাপ বুয়োই নেযেয়্যে
আর পাপীগুনোত্তে কোজোলী গোজ্যে।
Currently Selected:
যিশাইয় 53: CBT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 Bangladesh Bible Society
