যিশাইয় 40
40
গোজেন মানুচ্চুনোত্তে সান্ত্বনা
1তমা গোজেনে কোইয়্যেদে, “মঅ মানুচ্চুনোরে সান্ত্বনা দুয়ো,
সান্ত্বনা দুয়ো।
2যিরূশালেম মানুচ্চুনো লগে গমেডালে কধা কঅ,
আর তারা ইদু এ কধাগান ফগদাং গরঅ,
তারার দুঘ্কানি শেজ্ ওইয়্যে,
তারার পাপর খেমা ওইয়্যে,
তারার বেক্ পাপর ফলানি
তারা লগেপ্রভুত্তুন্ ভর্ পুনংগুরি পেইয়োন।”
3একজনর রঅ দাঙর্ গুরি ফগদাং গরের্,
“তুমি ধূল্যেচর চাগালাত্ লগেপ্রভুর পথ্তান ঠিগ্ গরঅ;
ধূল্যেচরত্ আমা গোজেনত্তে
এক্কান পথ্ সোজা গরঅ।
4বেক্ কলক্কানি ভরা অবঅ,
মুড়ো-মুড়িগুন্ সং গরা অবঅ,
মুড়োমুড়ি জাগায়ানি সং গরা অবঅ,
আর্ সং নেইয়্যে ভূইয়ানি সং গরা অবঅ।
5সেক্কে লগেপ্রভুর্ বাঈনী ফগদাং গরা অবঅ,
আর বেক মানুচ্চুনে সিয়েনি এক সমারে দেগিবাক্;
লগেপ্রভু এ কধানি কোইয়্যে।”
6একজন রঅ কত্তে, “ফগদাং গরঅ।”
মুই কলুং, “মুই কি ফগদাং গুরিম্?”
“বেক্ মানুচ্চুনে দঅ ঘাজ ধোক্ক্যেন্,
ঘাজ ফুলো ধোক্ক্যেন তারার্ বেক্ দোলান।
7ঘাস শুগেই যায় আর ফুলঅ ছিনি পড়ে,
কিত্তে লগেপ্রভুর নিজেস্ছো সিগুনো উগুরেদি বেই যায়।
ঘেচ্চেক্গুরি মানুচ্ দঅ ঘাস ধোক্ক্যেন্।
8ঘাস শুগেই যায় আর ফুল্অ ছিনি পড়ে,
মাত্তর্ আমা গোজেনর্ কধা জিংকানিবর্ থেবঅ।”
9ও সিয়োন, গম্ হবর্ তুই যে আন্যস্,
তুই অজল্ মুড়োবোত্ যেইনে উঠ্।
ও যিরূশালেম, গম্ হবর্ যে তুই আন্যস্,
তুই দাঙর্ দাঙর্ গুরি রঅ ছাড়্,
রঅ ছাড়্, ন-দোরেচ্;
যিহূদার শঅরানিরে কঅ,
“এইদঅ তমার গোজেন!”
10চঅ, প্রভু লগেপ্রভুর খেমতালোই এজের্,
তার খেমতাবলা আঢ্তান তার ওইনে রাজাগিরি গরের্।
চঅ, বক্শিজ্চান তা সমারে আঘে,
তার পাওনাগান তাইদু আঘে।
11তে গরগ ধোক্ক্যেন্ গুরি তা ভেড়া পালুন চোরেব,
ভেড়া ছঅগুন্ তে আঢ্তোই তুলি নিবো
আর করত্ গুরি তারারে বুয়োই নেযেব;
ছঅ আগন্ এবাবোত্যে ভেড়িগুনোরে তে
লাড়ে লাড়ে গুরি চালেই নেযেব।
12কন্না তা আঢ কুলুঙোত্ পিথ্তিমীর বেক্ পানিগানরে মাপ্যে
বা তার্ বিঘত্তোই আগাজ দুযিগান্ মাপ্যে?
কন্না পিত্থিমীর ধূল্যেগানি ঝলা ভিদিরে ভোরেয়্যে
বা পাল্লালোই মুড়িমুড়িগুন্ মাপ্যে?
13কন্না লগেপ্রভুর্ আত্মাগানরে মাবি পাজ্যে
বা তার্ সল্লাদিয়্যে ইজেবে তারে উবদেজ্ দিয়্যে?
14বুদ্ধি পেবাত্তে লগেপ্রভু কার সল্লা নেযেয়্যে,
আর ঠিগ্ পথ্তান কন্না তারে দেগেই দিয়্যে?
কন্না তারে জ্ঞান শিক্ষ্যে দিয়্যে
বা বিচের্ বুদ্ধির পথ দেগেয়্যে?
15চঅ, জাদ্তুনে যেন কুমো ভিদিরে পানি ধোক্ক্যেন্ এক্কো ফুদো;
পাল্লার ধূল্যেকণা ধোক্ক্যেন্ তারারে মনে গরা অয়।
দূর্ দেজ মানুচ্চুনে তাইদু মিহি ধূ্ল্যে ধোক্ক্যেন পাদল্।
16আগুন জ্বালেবাত্তে লেবাননর্ গাজ্
আর পুজ্যে উৎসর্বত্তে লেবাননর্ য়েমানুন্ যগাজ্যে নয়।
17বেক্ জাদ্তুনে তাইদু কিচ্ছু নয়;
সিগুনোরে তে কিজু বিলিনে মনে ন-গরে;
সিয়েনি তাইদু বাজে।
18মাত্তর্ কা সমারে তুমি গোজেনর্ তুলনা গুরিবে?
তুলনা গুরিবে কিয়োর্ লগে?
19কালিগরুনে ছাজিচাজাই ঢালিনে মুত্তি বানান্;
বান্যেগুনে সিয়েনি সনালোই বেড়েই দুয়োন্
আর তাত্তে রূবোর্ শিগোলে বানান্।
20নাঢা মান্জ্যে মুত্তি বানেবাত্তে
যে তক্তাগান ন-পঁজে সিয়েনই বেঈ লন্।
যিয়েনি ন-ভাঙিবো এবাবোত্যে মুত্তি বানেবাত্তে
তে এক্কো কাবিদ্যেং কালিগর্ তগায়।
21তুমি কি হবর্ ন-পঅ?
তুমি কি ন-শুনো?
পৌইল্যেত্তুন্ ধুরি কি তমারে সে কধানি কুয়ো ন-অয়?
পিত্থিমী থিদেবর্ গুরিবার সময়ত্তুন্ ধুরি তুমি ন-বুঝো?
22পিত্থিমীর গুল্ আগাজ উগুরে
তেয়ই সিংহাসনত্ বুয়োই আঘে,
পিত্থিমীর মানুচ্চুনে ফিরিঙো ধোক্ক্যেন্।
চানান ধোক্ক্যেন গুরি তে আগাজ্চানরে বিজেই দিয়্যে,
বজত্তি গুরিবার তাম্বুলো ধোক্ক্যেন্ গুরি সিয়েনি খাদেই দিয়্যে।
23তে রাজাগুনোরে খেমতানেইয়্যে গরে
আর এ সংসারর্ শাজন্গুরিয়্যেগুনোরে বাজে জিনিজো ধোক্ক্যেন গরে।
24যিয়েনি তারার্ লাগা অয়,
যিয়েনি তারার্ বীজ্ ফেলা অয়,
যিয়েনি তারা মাদিত্ শিঙোর্ বজান্,
এমনে তে সিয়েনি উগুরে ফুন্ দে আর সিয়েনি শুগেই যায়;
এক্কান তুট্যে বোইয়্যেরে লাড়াইদ্যে ধোক্ক্যেন্ গুরি তারারে উড়েই নেযায়।
25সেই সুদ্ধো-সাংগ মানুচ্চো কোইয়্যেদে,
“তুমি কা লগে মরে তুলনা গুরিবে?
কন্না মর্ সং সং?”
26তুমি চোগ্কুন্দোই আগাজ মোক্ক্যে রিনি চঅ;
কন্না ইয়েনি বেক্কানি বানেয়্যে?
তেয়ই তারাগুনোরে এক্কো এক্কো গুরি নিগিলেই আন্যে;
তেয়ই তারারে পত্তিজনরে নাঙ্ ধুরিনে ডাগে।
তার দাঙর্ খেমতা আর দাঙর্ খেমতাত্তে
তারার এক্কান্অ আজি ন-যায়।
27ও যাকোব, কিত্তে তুই কোইয়োচ্,
ও ইস্রায়েল, কিত্তে তুই এ আবিত্তিগান্ গোজ্যস্,
“মঅ পথ্তান লগেপ্রভুত্তুন্ লুগেয়্যে রোইয়্যে,
মর্ ন্যায়বিচের্ পেবার অধিকার
মর্ গোজেনে এলাফেলা গোজ্যে”?
28তুমি কি হবর্ ন-পঅ?
তুমি কি ন-শুনো?
লগেপ্রভু, যিবে জনম ভরা গোজেন,
যিবে পিত্থিমীর শেজ্ দুযিগান বানেয়্যে,
তে বল্ পোজ্যে ন-অয়, মন্ মরায়ো ন-অয়;
তা বুদ্ধির গভীনান্ কনজনে মাবি ন-পারে।
29তে বল্পোজ্যেগুনোরে বল্ দে
আর বল্ নেইয়্যেগুনোরে বল্ বাড়েই দে।
30বয়স কম্ বলাগুনেয়ো বল্ পোজ্যে অন্ আর মন্ মরা অন্
আর গাবুজ্যেগুনে উজোত্ হেইনে পড়ন্,
31মাত্তর্ যিগুনে লগেপ্রভু উগুরে আজা রাগান্
তারা নুয়ো গুরি বল্ পেবাক্।
তারা ঈগল পেগো ধোক্ক্যেন্ ডুয়ো মিলিনে অজলত্ উড়িবাক্;
তারা দাবা দিলে বল্পোজ্যে ন-অবাক্,
তারা আঢিলে বল্পোজ্যে ন-অবাক্।
Currently Selected:
যিশাইয় 40: CBT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 Bangladesh Bible Society
