যিশাইয় 31
31
মিসর উগুরে বিশ্বেজ্ গুরিয়্যেগুনোর দুদ্দজা
1অভিশাব্ পোড়োক্ যিগুনে সাহায্যত্তে মিসরত্ যান! তারা দঅ ঘোড়া উগুরে নির্ভর গরন্ আর তারার্ ভালোক্কানি রথ উগুরে আর ঘোড়া মাউত্তুনোর্ খেমতা উগুরে বিশ্বেজ্ রাগান্, মাত্তর্ তারা ইস্রায়েলর সেই পবিত্র মানুচ্চো ইন্দি রিনি ন-চান বা লগেপ্রভু ইত্তুন্ সাহায্য ন-চান। 2মাত্তর্ তার কি কনঅ জ্ঞান নেই? তে দঅ দজা ঘোদেব; তা কধাগান তে ফিরেই ন-নিবো। তে পাজিগুনোর্ বিরুদ্ধে আর তারার সাহায্যগুরিয়্যেগুনোর্ বিরুদ্ধে উদিবো। 3মিসরীয়গুনে দঅ মানুচ্, তারা গোজেন নয়; তারার্ ঘোড়াগুন য়েরাবলা, সিগুন আত্মা নয়। লগেপ্রভু যেক্কে তা আঢ্তান তুলিবো সেক্কে সাহায্যগুরিয়্যেগুনে উজোত্ হেবাক্ আর যিগুনে সাহায্য পান্ তারা পড়িবাক্; তারা বেক্কুনে একসমারে ভস্ত ওই যেবাক্।
4লগেপ্রভু মরে এ কধাগান কোইয়্যেদে, “সিংহ তার শিগের এ্যামান্নোলোই গুজুরিবার্ অক্তত্ গরক্কুনোর্ দলুনে তা বিরুদ্ধে রঅ ছাড়িলেয়ো আর কিজিক্ কাজাক্ গুরিলেয়ো তে দর্ বা মানা ন-পায়। ঠিগ্ সেধোক্ক্যেন্ গুরি বেগত্তুন্ খেমতাবলা লগেপ্রভু যুদ্ধো গুরিবাত্তে সিয়োন মুড়োবোত্ আর তার অজল্ জাগায়ানিত্ লামি এবঅ। 5পেখ্কুনে যেধোক্ক্যেন বাহ্বো উগুরে উড়োন্, বেগত্তুন্ খেমতাবলা লগেপ্রভু সেধোক্ক্যেন গুরি যিরূশালেমানরে ঢাগি রাগেব। তে তারে ঢাগি রাগেব আর উদ্ধোর্ গুরিবো, আর তা উগুরেদি যেইনে তারে রোক্ষ্যে গুরিবো।”
6ও ইস্রায়েলীয়গুন্, তুমি যিবের্ বিরুদ্ধে এদক্ উল্লোমী গোজ্য তাইদু ফিরি এজঅ, 7কিত্তে সেদিন্যে তুমি বেক্কুনে যেদক্কানি সনা আর রূবোর্ মূত্তি বানেইনে পাপ গোজ্য সিগুন দূর্ গুরি দিবা।
8লগেপ্রভু কোইয়্যেদে, “মান্জ্যর নয় এমন্ এক্কান তলোয়ারত্ আসিরিয়া পুরিবো; সেই তলোয়ারানে তারে গিলিবো। তা মানুচ্চুনে তলোয়ার মুজুঙেত্তুন্ ধেই যেবাক্ আর তারার গাবুজ্যে পুয়োগুনোরে জোর্ গুরিনে খাদা অবঅ। 9তারার্ রাজাবো দরে ধেই যেবঅ; তার সেনাপতিগুনে বাবতাগান্ দেগিনে অমকদ দোরেবাক্।” সিয়োনত্ যিবের আগুন আঘে, আর যিরূশালেমত্ আগেদে চুলো, সেই লগেপ্রভু এ কধাগান কোইয়্যে।
Currently Selected:
যিশাইয় 31: CBT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 Bangladesh Bible Society
