যিশাইয় 30
30
একবুচ্চ্যে জাদর্ দুদ্দজা
1লগেপ্রভু কোইয়্যেদে, “অভিশাব্ দুয়োং সেই একবুচ্চ্যে পুয়োগুনোরে, যিগুনে পরিকল্পনা মজিম্ কাম্ গরন্ মাত্তর্ মঅ পরিকল্পনা মজিম্ নয়। তারা সমাজ্যে বানান্ মাত্তর্ মঅ আত্মাগানর্ আওজ্ মজিম্ নয়। এবাবোত্যেগুরি তারা পাপ উগুরে পাপ বেশ্ গরন্। 2তারা মঅ লগে সল্লা ন-গুরিনে মিসরত্ যান; তারা সাহায্যত্তে ফরৌণর আশ্রয় চান্ আর মিসরর্ ছাবাগানত্ আশ্রয় লোই পারন্। 3মাত্তর্ ফরৌণর আশ্রয়ান্ তারা লাজেবাক্ আর মিসরর্ ছাবাগান্ তারাত্তে অসর্মান্ আনিবো। 4যুনিয়ো সোয়নত্ তারার দাঙর্ পোজিশন মানুচ্ আগন্ আর তারা দূত্তুনে হানেষত্ লুম্মোন, 5তো তারারে পত্তি জনরে লাজত্ ফেলা অবঅ, কিত্তে সেই জাদ্তো তারার্ কনঅ এজালত্ ন-এবঅ। তারা সাহায্য বা সুবিধে কিচ্ছু দি ন-পারিবাক্; দিবাক্ বানা লাজ্ আর অসর্মান্।”
6নেগেভ এ্যামানুনো পৌইদ্যেনে আগাম্ কধা ইয়েন: সেই দূত্তুনে দুঘ্ আর দুদ্দজাত্ পোজ্যে দেজ ভিদিরেদি আর সিংহ আর সিংহী, বিষ্বলা সাপ আর উড়্বো বিষ্বলা সাপ দেজ ভিদিরেদি যান্। 7মিসরর্ এজালান বাজে বাবোত্যে, কনঅ কামর্ নয়; সেনত্তে মুই সেই জাদর্ নাঙানি রাগেয়োং রহব-হেম-শবৎ, অত্তাৎ যে বাঈনী গোজ্যে জাদ্ অলর্ গুরি বুয়োই থায়।
8তুই ইক্কিনে এ কধাগান্ এক্কো আড়ুগোত্ আর এক্কো বোইয়োত্ লিগি রাগা, যেনে এজেত্তে দিনুনোত্ সিবে ইস্রায়েলীয়গুনোত্তে এক্কো জিংকানিবরর্ সাক্ষ্য ওই থায়। 9এ মানুচ্চুনে উল্লোমী আর মিজে কধা কোইয়্যে; তারা লগেপ্রভুর্ শিক্ষ্যেনি শুনিবাত্তে রাজি নয়। 10তারা রিনি চেইয়্যেগুনোরে কন্দে, “তুমি আর দর্শন ন-চেয়ো,” আর ভাববাদীগুনোরে কন্দে, “যিয়েন সত্য সিয়েন আমারে আর্ ন-কোয়ো। আমা ইদু গম্ হবরর্ কধা কঅ; যিয়েন সত্য নয় এবাবোত্যে বেক্ বেপারানির আগাম্ কধা কঅ। 11পথ্তান ছাড়, পথ্তানত্তুন্ সুরি যঅ। আমি আর্ ইস্রায়েলর সেই পবিত্র মানুচ্চোর কধা শুনিবাত্তে ন-চেই।”
12সেনত্তে ইস্রায়েলর সেই পবিত্র মানুচ্চো এ কধাগান্ কোইয়্যেদে, “তুমি মঅ কধাগান্ এলাফেলা গোজ্য, আর মিজে আর অত্যেচার্ গরানা উগুরে বিশ্বেজ্ গোজ্য। 13সেনত্তে এ পাপ্পান তমাত্তে এক্কান অজল্, ফাদা মারা আর ভাঙি পুড়িবোদে দেবাল ধোক্ক্যেন্ অবঅ, যিয়েন অদাদত্ এক সময়ো ভিদিরে ভাঙি পুরিবো। 14সিবে মাদির্ পিলে ধোক্ক্যেন্ কট্টা কট্টা ওইনে ভাঙি যেবঅ; সিয়েন এমন্ গুরিনে ভাঙি যেবঅ, সিগুনো ভিদিরে এক কট্টায়ো পাহ্ ন-যেবঅ যিয়েন্দোই চুলোত্তুন্ আঙারা বা কূয়োত্তুন্ পানি তুলি পারে।”
15প্রভু লগেপ্রভু, ইস্রায়েলর্ সেই পবিত্র মানুচ্চো এ কধাগান কোইয়্যে, “পাপত্তুন্ ফিরিনে শান্ত অলে তুমি উদ্ধোর্ পেবা, আর গমেডালে বিশ্বেজ্ গুরিলে বল্ পেবা।” মাত্তর্ তুমি সিয়েনত্ রাজি ন-অলা। 16তুমি কলা, “না, আমি ঘোড়াত্ চড়িনে ধেই যেবং।” সেনত্তে তমাত্তুন্ ধেই যাহ্ পুরিবো। তুমি কলা, “যে ঘোড়াবো জদবদে জুরে যায় সিয়োত্ চড়িনে আমি যেবং।” সেনত্তে যিগুনে তমারে লোড়েবাক্ তারা উজেই এবাক্। 17একজন দরে তমাত্তুন্ আজার্ জন ধেই যেবাক্ আর পাচজন দরে তুমি বেক্কুনে ধেই যেবা; সেক্কে তমা সৈন্যদলত্ মুড়োবো উগুরে বাবতা খুদোবো বাদে আর কিচ্ছু ন-থেবঅ। 18তো লগেপ্রভু তমা উগুরে দোয়্যে গুরিবাত্তে বাজ্জেই আঘে; তমারে মেয়্যে গুরিবাত্তে তে যুক্কোল্ ওই আঘে। লগেপ্রভু ন্যায়বিচেরর্ গোজেন; যিগুনে তাত্তে বাজ্জেই আগন্ তারা বর্ পেইয়্যে।
19ও সিয়োনর মানুচ্চুন্, তুমি যিগুনে যিরূশালেমত্ বজত্তি গরঅ, তমাত্তুন্ আর কানা ন-পুরিবো। সাহায্যত্তে কানিলে তে হামাক্কায় তমারে দোয়্যে গুরিবো। তে শুনোনার্ লগে লগে জোব্ দিবো। 20যুনিয়ো প্রভু তমারে কয়েক্কান রুটি আর এক্কেনা পানি দিয়্যে, তো তমা মাষ্টর্ প্রভু আর্ পৌল্যেই ন-থেবঅ; তুমি নিজো চোগেদি তারে দেগিবা। 21ডেনে বা বাঙে কনকিত্ত্যে যেবার্ সময় তুমি পিজেত্তুন্ তার এ কধানি শুনিবা, “ইয়েনই পথ; তুমি এ পধেদি যঅ।” 22সেক্কে তুমি তমার্ রূবো আর সোনালোই বেড়েয়্যে মূত্তিগুন্ অসিজি গুরিবা; তুমি সিগুনোরে কজরা কাবড় ধোক্ক্যেন ফেলেই দিইনে কবাদে, “দূর্ অ, দূর্ অ!”
23তে তমারে ঝড়্ দিবো যেনে তুমি মাদিত্ বীজ্ ফেলেই পার আর ভূইয়োত্তুন্ যে খেত্-খেত্তিগানি এবঅ সিয়েনি গম্ আর তেল্তেল্যে অয়। সেদিন্যে তমার্ য়েমান পালুনো বোউত্ দাঙর্ দাঙর্ মাদত্ চড়িবাক্। 24তমার্ পালেয়্যে গোরু আর গাধাগুন জাব্নার লগে কুলো আর চালোন্দোই ঝাজ্যে কলাই হেবাক্। 25সেই দযার্ দিনোত্ যেক্কে ভালোক্ জনরে মারে ফেলা অবঅ আর ঘরানি ভাঙি পড়িবো সেক্কে বেক্ মুড়ো-মুড়িগুনো উগুরেদি বেইনে পানি গঙারান্ বেঈ যেবঅ। 26যেদিন্যে লগেপ্রভু তা মানুচ্চুনোর্ আঘাত পেইয়্যে জাগানি বানি দিবো আর তার গোজ্যে ঘা গানি গম্ গুরি দিবো সেদিন্যে চানানে পহর্ দিবো বেলান ধোক্ক্যেন্, আর বেলান পহ্রান অবঅ পুরো সাত দিনোর পহ্র ধোক্ক্যেন সাতগুন বেশ্।
27চঅ, লগেপ্রভুর্ জোল্জোল্যে রাগ্কান আর ঘুর্ঘুজ্যে ধূমোগান মেঘ সমারে দূরোত্তুন্ এজের্; তা মুয়োন জদবদে রাগে ভরা আর তার জিলান্ পুড়ি ফেলাইদ্যে আগুনো ধোক্ক্যেন্। 28তা নিজেস্চো যেন জুরে এচ্চ্যে গঙার পানি যিয়েন মান্জ্যর গত্তনা সং উদে। তে বেক্ জাদ্তুনোরে ভস্তর্ চালোন্দোই চালেব আর বেক্ জাদর্ মানুচ্চুনোর মুয়োত্ এমন্ মোগোনি খাজা দিবো তারারে ভস্ত অনাগানর্ ইন্দি টানি নেযেব। 29সুদ্ধো-সাংগ পরব্ পালানা রেদো ধোক্ক্যেন্ তুমি গান গেবা। মান্জ্যে যেক্কে বাশিলোই লগেপ্রভুর্ মুড়োবো উগুরে উদিনে ইস্রায়েলর আশ্রয়-মুড়োবো ইদু এজন্ সেক্কে যেবাবোত্যে হুজি অন্ সেবাবোত্যেগুরি তমার্ মনানিয়ো হুজি অবঅ। 30লগেপ্রভু জদবদে রাগ্, পুড়ি ফেলাইদ্যে আগুন, অমকদ ঝড় আর শিল পড়ানার্ মাধ্যমে তার্ খেমতাবলা রবো মানুচ্চুনোরে শুনেব আর তা সাজা দিবার্ আঢ্তান দেগেব। 31লগেপ্রভুর্ রবোলোই আসিরিয়াগান্ ভাঙি পুরিবো; তা লুদিক্কোলোই তে আসিরিয়গুনোরে আঘাত্ গুরিবো। 32লগেপ্রভু তারা লগে যুদ্ধো গুরিবার অক্তত্ যেক্কে তার্ নেযেয়্যে লুদিক্কো তারা উগুরে আঘাত্ গুরিবো সেক্কে ঝোন্জোনি আর বীণা বাঁজিবো। 33তোফত ধোক্ক্যেন্ পুড়িবার জাগা বোউত্ আগেত্তুন্ ধুরি সাজেই রাগা ওইয়্যে; সিবে রাজাবোত্তে যুক্কোল্ গরা ওইয়্যে। সে জাগায়ান্ গভীন্ আর পাদাজ্যে গরা ওইয়্যে, আর সিয়েনত্ আগুনোত্তে বোউত্ দার্বো আঘে। লগেপ্রভুর্ নিজেচ্চো জোল্জোল্যে গন্ধগর্ গঙার ধোক্ক্যেন ওইনে সিয়েনত আগুন ধোরেই দিবো।
Currently Selected:
যিশাইয় 30: CBT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 Bangladesh Bible Society
