হোশেয় 13
13
ইস্রায়েলর বিরুদ্ধে লগেপ্রভুর রাগ্
1ইফ্রয়িমে কধা কলে মান্জ্যে গির্গিরান; ইস্রায়েল গুট্টিগুনো ভিদিরে তে দাঙর্ ওইয়্যে। মাত্তর্ বাল দেবেদা পূজো গুরিবার দুষে দুষি ওইনে তে মোজ্যে। 2ইক্কিনে তা মানুচ্চুনে আরঅ বেশ্ গুরি পাপ গোজ্যন্; তারার্ রূবোগানিলোই তারা নিজোত্তে কাবিল আঢ্তোই বানেয়্যে মূত্তি, অত্তাৎ কাবিল্ আত্তোই মূত্তি বানেয়্যন; সিগুন বেক্কুন্ কালিগর কাম। এ মূত্তিগুনো পৌইদ্যেনে তারা কন্, “যিগুনে উৎসর্ব গরন্ তারা গোরু ছঅ-মূত্তিগুনোরে চুমোদোক্।” 3সেনত্তে তারা অবাক্ বেন্যেমাদান কুয়ো ধোক্ক্যেন, অবাক্ অদাদৎ উরি যেইয়্যে বেন্যেমাদান শিরো পানি ধোক্ক্যেন, অবাক্ খামারত্তুন্ বোইয়্যেরে উড়ি যেইয়্যে তুজো ধোক্ক্যেন্, অবাক্ জানালাদি নিগিলি যেইয়্যে ধূমো ধোক্ক্যেন্।
4লগেপ্রভু কত্তে, মিসরত্তুন্ তরে নিগিলেই আনিবার সময়ত্তুন্ ধুরি মুয়ই তর্ গোজেন লগেপ্রভু। মুই বাদে তর্ আর কনঅ গোজেন নেই; মুই বাদে তর্ আর কনঅ উদ্ধোর্ গুরিয়্যে নেই। 5ধূল্যেচর-চাগালাত্, অমকদ শুগুনো দেজত্ মুয়ই তরে দেগাশুনো গোজ্যং। 6মুই তঅ মানুচ্চুনোরে হাবানার্ পরেদি তারার্ ঈল্ অলঅ; ঈল্ ওইনে তারা বাড়্বো অলাক্, আর সে পরেদি তারা মরে ভুলি গেলাক্। 7সেনত্তে মুই সিংহ ধোক্ক্যেন তারা উগুরে এইম্, হোক্ক্যে বাঘ ধোক্ক্যেন্ পধ পারত্ উৎ পাদি থেবাক্। 8ছঅ চুর্ ওই যেইয়্যে ভাল্লুগো ধোক্ক্যেন মুই তারারে আক্রমণ গুরিনে তারা বুগ্কুন ছিনি ফেলেম। সিংহ ধোক্ক্যেন মুই তারারে গিলি ফেলেম; ঝার্বো য়েমান ধোক্ক্যেন মুই তারারে কট্টা কট্টা গুরি ছিনি ফেলেম।
9ও ইস্রায়েল, তুই মর্ বিপক্ষে, অত্তাৎ তর্ সাহায্যগুরিয়্যের্ বিপক্ষে আগচ্ বিলি মুই তরে ভস্ত গুরিম। 10তঅ রাজাবো কুদু যে তর্ বেক শঅরানিত্ তরে রোক্ষ্যে গুরি পারিবো? তর্ শাজন্গুরিয়্যেগুন কুদু যিগুনো পৌইদ্যেনে তুই কদে, মরে রাজা আর শাজন্গুরিয়্যেগুনোরে দে? 11সেনত্তে মুই অমকদ বেজার্ ওইনে তরে এক্কো রাজা দুয়োং আর মর্ রাগে তারে নেযেয়োংঅ। 12ইফ্রয়িমর দুষ, অত্তাৎ তার্ বেক্ পাপ্পানি লিগিনে বানি রাগা ওইয়্যে। 13মিলেগুনোর্ পুয়ো-পুদোইদ্যে শূলোনী ধোক্ক্যেন্ তারে ধোজ্যে, মাত্তর্ তে দঅ বুদ্ধিনেইয়্যে গুরো; সময় এলে তে পেদ মুয়োত্ ন-এজে।
14“মরণ জাগানর্ খেমতাত্তুন্ মুই মূল্য দিইনে তারে ছাড়েই আনিম। মরণত্তুন্ মুই তারে উদ্ধোর্ গুরিম। ও মরণান্, মর্ ভানাগানি বেক্কানি কুত্তুন্? ও মরণ জাগায়ান, কুদু তর্ ভস্ত? মুই কনঅ মেয়্যে ন-গুরিম। 15যুনিয়ো বা ইফ্রয়িমে তা ভেইয়ুনো ভিদিরে ফলায় তো লগেপ্রভুত্তুন্ এক্কান পূগো বোইয়্যের ধূল্যেচর-চাগালাত্তুন্ বেঈ এবঅ; তার্ পয়নালাবোত্ পানি ন-থেবঅ আর তার্ কুয়োবো শুগেই যেবঅ। তার্ ভান্ডালর্ বেক মংগা জিনিসচানি লুদো অবঅ। 16শমরিয়ার মানুচ্চুনে তারার্ গোজেন বিরুদ্ধে উল্লোমী গোজ্যন বিলি দায়ী অবাক্। তারা যুদ্ধোত্ মুরি যেবাক্; তারার্ পুয়ো-ঝিগুনোরে মাদিত্ আছাড় মারিনে নিগুজ্ গরা অবঅ আর তারার্ পিদিলী মিলেগুনোর্ পেটতুন্ ফাদি ফেলা অবঅ।”
Currently Selected:
হোশেয় 13: CBT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 Bangladesh Bible Society
