ইব্রীয় 5
5
1মান্জ্যর্ ওইনে গোজেনর্ সেবা গুরিবাত্যে পত্তি দাঙর্ ধর্মগুরুরে মান্জ্য ভিদিরেত্তুন্ বেঈ লোইনে নেযা অয়, যেনে তে মান্জ্যর্ পাপত্যে য়েমান উৎসর্ব গরে আর অন্য জিনিস্-অ উৎসর্ব গরে। 2যিগুনে কোই ন-পারিনে পাপ গরন্ আর ভান্ন্যেই পধেদি যান্ তারা সমারে তে নরম বেবহার গুরি পারে, কিয়া তা ভিদিরেয়ো লবাদোচ্চ্যে আঘে। 3তে যেধোক্ক্যেন অন্য মানুচ্চুনোর্ পাপত্যে য়েমান উৎসর্ব গরে সেধোক্ক্যেন নিজে নরম বিলি নিজোর্ পাপত্যেয়ো তাত্তুন্ সেই উৎসর্বগান গরা পরে।
4দাঙর্ ধর্মগুরু অবার্ সর্মানান কেঅ নিজে লোই ন-পারে, মাত্তর্ গোজেনে যিবেরে ডাগে তেয়ই সেই সর্মানান পায়, যেধোক্ক্যেন দাঙর্ ধর্মগুরু অবাত্যে গোজেনে হারোণরে ডাক্ক্যে। 5কধাগান খ্রীষ্টর্ বেলায়ও খাদে। খ্রীষ্ট নিজোর্ আওজে দাঙর্ ধর্মগুরু অবাত্যে নিজোরে দাঙর্ গুরি ন-তুলে; গোজেনে ইয়েন কোইনে তারে সেই সর্মানান্ দান গোজ্জ্যে,
তুই মর্ পুয়ো,
এচ্চ্যে মুই তর্ বাব্ অলুং।
6সেধোক্ক্যেন গুরি গোজেনে আর এক জাগাত্ কোইয়্যেদে,
তুই উমরত্যে মল্কীষেদক ধোক্ক্যেন ধর্মগুরু।
7যিবে তারে মরণ আদত্তুন রোক্ষ্যে গুরি পারিদো সেই গোজেন ইধু যীশু এ জগদত্ থেবার অক্তত্ জোরে রঅ ছাড়িনে কানি কানি কোজোলী গোজ্জ্যে আর ভিক্ষ্যে মাক্যে। তার্ ভোক্তিগান সমারে বাধ্যতা এলঅ বিলিনে গোজেনে তার্ তবনাগান শুন্ন্যে। 8মাত্তর্ গোজেনর্ পুয়ো ওইনেয়ো তে দুঘ্ পানাগান্দোই বাধ্যতাগান শিগেয়্যে। 9এবাবোত্যে গুরি যেক্কে তে পূর্ণতাগান পেলঅ সেক্কে তার্ বাধ্যতাগান বেক্কুনোত্যে তে উমরর্ উদ্ধোরর্ পথ অলঅ। 10গোজেনে তারে মল্কীষেদক ধোক্ক্যেন দাঙর্ ধর্মগুরু বিলি ফগদাং গুরিলো।
বিশ্বেজত্তুন্ সুরি যানা পৌইদ্যেনে উজিয়ার গরানা
11এ পৌইদ্যেনে বোউত কধা আমার কবার্ আঘে মাত্তর্ সিয়েনি বুঝেইনে কনা আগাত্ত্যে, কিয়া আত্মিক সত্যগান তুমি সহজে বুঝি ন-পারঅ। 12এদক দিনে তমার্ মাষ্টর ওই উদোনা উজিত এলঅ, মাত্তর্ সিয়েনর্ বদলে গোজেনর্ আজল্ কধানি আরঅ তমারে শিক্ষ্যে দিবাত্যে মাষ্টরর্ দরকার ওই পোজ্জ্যে। দর হানার বদলে চিগোন গুরোগুনো ধোক্ক্যেন আরঅ তমাত্তুন্ দুধ হানা দরকার ওই পোজ্জ্যে। 13যে দুধ হেইনে বাজে তে দঅ ইক্কিনিয়ো চিগোন চিজি, আর গম্ জিংকানি পৌইদ্যেনে যে শিক্ষ্যেগান আঘে সিয়েনত্ তে যগাজ্জ্যে নয়। 14যিগুনোর্ বয়চ্ ওইয়্যে বানা সিগুনে দরঅ হানা হেই পারন্, অত্তাৎ গোজেন কধানির্ আঘাত্যে শিক্ষ্যেনি বুঝি পারন্। বোউত্ অভ্যেজর্ কারনে তারা গম্-ভান্ন্যেই বিচের গুরিবাত্যে শিক্ক্যন্।
Currently Selected:
ইব্রীয় 5: CBT
Highlight
Share
Compare
Copy
Want to have your highlights saved across all your devices? Sign up or sign in
Copyright © 2021 Bangladesh Bible Society
