ইব্রীয় 4
4
গোজেনর্ মানুচ্চুনোত্যে জিরেন্
1গোজেনর দিয়্যে জিরেবার জাগানত্ যেবার যে এগেমান্ এলঅ সেই এগেমান্ আমাত্যেয়ো খাদে। সেনত্যে আমার উজিয়ার উয়ো পরিবো, যেন কেঅ সেই এগেম্ গোজ্জ্যে বর্ পানার্ যোগ্য নয় বিলি দেগা ন-যায়। 2ইস্রায়েলীগুনো ইধু যেধোক্ক্যেন গম হবর্ ফগদাং গরা ওইয়্যে সেধোক্ক্যেন গুরি আমা ইধুয়ো গরা ওইয়্যে। মাত্তর্ সেই গম হবরত্ ইস্রায়েলীগুনোর্ কনঅ লাভ ন অয়, কিয়া তারা সিয়েনি শুনিনে বিশ্বেজ্ ন-গরন। 3মাত্তর্ আমি বিশ্বেজ্ গোজ্জ্যেই আর তার সেই এগেম্ গোজ্জ্যে জিরেবার্ জাগানত্ এচ্চ্যেই। এই জিরেনাগান পৌইদ্যেনে গোজেনে কোইয়্যেদে,
“সেনত্যে মুই রাগে শমক্ হেইনে কোইয়োঙে,
‘মর্ দিয়্যে জিরেবার জাগানত্ তারা যেই ন-পারিবাক্।’ ”
মাত্তর্ ইয়েনত্ কনঅ ভুল নেই যে, জগৎতান্ সৃট্টির পরেদি গোজেনর্ কামানি থুম্ ওইনে জিরেনা থুম্ ওইয়্যে।
4পবিত্র বোইবোর এক জাগাত্ সাত দিনো পৌইদ্যেনে কুয়ো ওইয়্যে, “গোজেনে সাত দিনোত্ জিরেল কনঅ সৃট্টির কাম ন-গুরিলো।” 5তে আরঅ কোইয়্যেদে,
“মর্ দিয়্যে জিরেবার জাগানত্ তারা যেই ন-পারিবাক্।”
6ইক্কিনে এ কধাগান ঠিগ্ যে, কিজু মান্জ্যে তার দিয়্যে জিরেবার জাগানত্ যেই পারিবাক; মাত্তর্ যে ইস্রায়েলীগুনো ইধু আগে গম হবর্ ফগদাং গরা ওইয়্যে তারার্ অবাধ্যতার্ কারনে তারা গোজেনর্ দিয়্যে জিরেবার জাগানত্ যেই ন-পারন্। 7ইয়েনত্যে গোজেনে যেবাবোত্যে গুরি ইস্রায়েলীয়গুনো ইধু কোইয়্যে ঠিগ সেবাবোত্যেগুরি ভালোক দিন পরেদি রাজা দায়ুদোরে দিইনে আরঅ কোইয়্যেদে,
আহা, এচ্চ্যে যুনি তুমি তা কধানি শুনো!
তে কোইয়্যেদে, “তমা মনানি তুমি আগাত্যে ন-গোজ্জ্য।”
এই কধাগান কোইনে তার্ দিয়্যে জিরেবার জাগানত্ যেবাত্যে গোজেনে আর এক্কান সময় ঠিগ গোজ্জ্যে আর তে সিয়েনর্ নাঙান্ দিয়্যেদে এচ্চ্যে।
8যুনি যিহোশূয় ইস্রায়েলীয়গুনোরে সেই জিরেবার জাগানত্ নেযেদ সালে গোজেনে পরেদি আর এক্কান সময়োর্ কধা ন-কদঅ। 9সালে দেগা যায়, গোজেন মানুচ্চুনোত্যে জিরেবার জু আঘে, 10কিয়া গোজেনে যেধোক্ক্যেন গুরি তার্ সৃট্টির কামানি থুম্ গুরিনে জিরেয়্যে ঠিগ্ সেধোক্ক্যেন গুরি যে মানুচ্চো গোজেনর দিয়্যে জিরেবার জাগানত্ যায়, তেয়ো তা কামত্তুন্ জিরেন পায়। 11ইয়েনত্যে এজঅ, আমি সেই জিরেন্ পেবাত্যে গমেডালে আয়োজি ওই। কেঅ যেন সেই অবাধ্য ইস্রায়েলীগুনো ধোক্ক্যেন গোজেনরে অমান্য গুরিনে তার্ দিয়্যে জিরেনত্তুন্ বাদ ন-পড়ন্।
12গোজেনর্ কধানি খেমতাবলা আর কামগরে আর দ্বি' কিত্ত্যেদি ধার্ আঘে এমন্ ছুরিত্তুন্-অ বেশ্ ধারেয়্যে। এ কধানি মান্জ্যর রিবেঙ-আত্মা আর আহ্র্-মগজ মূঢ়োত্ সং যায় আর মান্জ্যর রিবেঙর্ বেক্ আওজ্চানি আর চিদে চজ্জানি পোরোক্ষ্যে গুরি চায়। 13সৃট্টির কিচ্চু গোজেন ইধু লুগেইয়্যে নেই। যিবে ইধু আমার ইজেব দিয়্যে পরিবো তা চোগো মুজুঙোত্ বেক্কানি মেল্যে আর ফগদাং পেইয়্যে।
যীশুই আজল্ ধর্মগুরু
14সেনত্যে এজঅ, আমি খুলোমেলা গুরি গোজেনর্ পুয়ো যীশু খ্রীষ্ট উগুরে আমা বিশ্বেজ্চান স্বীগের্ গুরি যেই, কিয়া তেয়ই আমার দাঙর্ ধর্মগুরু যিবে স্বর্গত যেইনে ইক্কিনে গোজেন মুজুঙোত্ আঘে। 15আমা দাঙর্ ধর্মগুরুবো এমন্ কেঅ নয় যিবে আমা বল্পোজ্যেগানিত্যে আমা সমারে পিড়ে ন-পায়, কিয়া আমা ধোক্ক্যেন গুরি তেয়ো বেক্কানিত্তুন্ পাপ পোরোক্ষ্যে মুজুঙোত্ থিয়্যেইয়্যে অদচ পাপ ন-গরে। 16সেনত্যে এজঅ, আমি সাহচ্ গুরিনে গোজেনর্ দোয়্যের্ সিংহাসন মুজুঙোত্ উজেই যেই, যেন দরকার মজিম সিয়েনত্তুন্ আমি তার্ মেয়্যে আর দোয়্যে পেই পারিই।
Currently Selected:
ইব্রীয় 4: CBT
Highlight
Share
Compare
Copy
Want to have your highlights saved across all your devices? Sign up or sign in
Copyright © 2021 Bangladesh Bible Society
