ইব্রীয় 13
13
শেচ্ উপদেচ্
1তুমি একজন আরেক জনরে ভেইয়ো ধোক্ক্যেন কোচ্পেইয়ো। 2গর্বাগুনোরে আদর-যত্তন্ গত্তে পুরি ন-ফেলেয়ো; কেঅ কেঅ কোই ন-পারিনে এবাবোত্যেগুরি স্বর্গদূত্তুনোরে আদর-যত্তন্ গোজ্জ্যন্। 3যিগুনে জেলোত্ আঘন্ তারা সমারে যেন তুমিয়ো বন্দী ওইয়ো, আর যিগুনে অত্যেচারিত্ অদন্ তারা সমারে যেন তুমিয়ো অত্যেচারিত অর্, এবাবোত্যে গুরি তারা কধানি ইদোত্ তুলো।
4পত্তিজনে যেন জড়া সুগুলোং বানানা বেপারান্ সর্মানর্ চোগেদি দেগন্। নেক্-মোগোর্ ভিদিরে জড়া সুগুলোং বানানা বেপারান পবিত্র রাগানা উজিত্, কিয়া যে কনঅ বাবোত্যে পর্পাগোল্যে অদঅ সাৎ, যিগুনে সেই দুষে দুষী গোজেনে তারারে সাজা দিবো। 5টেঙা-পৌইজ্যের্ লুভোত্তুন্ নিজোরে দূরোত্ রাগঅ। তমার্ যিয়েনি আঘে সিয়েনিলোই হুজি থাগঅ। গোজেনে কোইয়্যেদে, “মুই কনদিন্অ তরে ফেলেই ন-যেম্ বা কনদিন্অ তরে বাদ্ ন-দিম্।” 6ইয়েনত্যে আমি সাহচ্ গুরিনে কোই পারিই,
প্রভু মর্ এজাল্দিয়্যে, মুই ন-দোরেম;
মান্জ্যে মরে কি গুরি পারন্?
7যিগুনে তমা ইধু গোজেনর্ কধা কদাক্ তমার্ সেই নেতাগুনোর্ কধা ইদোত্ রাগেয়ো। তারার্ জিংকানির থুমোর্ কধাগান গমেডালে চিন্তে গোজ্জ্য আর তারা ধোক্ক্যেন গুরি তুমিয়ো বিশ্বেজ্ গোজ্জ্য। 8যীশু খ্রীষ্ট গেল্লে কেল্ল্যে যেধোক্ক্যেন এলঅ, এচ্চ্যেয়ো সেধোক্ক্যেন আঘে আর উমর্ সং সেধোক্ক্যেন থেবঅ।
9নানান্ বাবোত্যে নূয়ো নূয়ো শিক্ষ্যেলোই যেন তমারে ভুল্ পধেদি ন-নেযান্। আমা মনানি উৎসর্বর হানা উগুরে ন-থেইনে যেন গোজেন দোয়্যে উগুরে থির্ ওইনে বজে। যিগুনে সেই হানাগান উগুরে নির্ভর্ গুরিনে চলিদাক্, সেই হানাগানত্তুন্ তারার্ কনঅ লাভ্ ন-অয়। 10আমার্ এক্কো পূজো আঘে আর যিগুনে ইস্রায়েলীগুনোর সেই উবোসনা-তাম্বুলোত্ কাম গরন, আমার্ সেই পূজোবো উগুরে উৎসর্ব-গোজ্জ্যে কনঅ কিজু হানার্ অধিকার তারার্ নেই।
11পাপত্যে উৎসর্ব-গোজ্জ্যে য়েমান লো-লোই ইস্রায়েলীয় দাঙর্ ধর্মগুরুবো দাঙর্ পবিত্র জাগানত্ যায়, মাত্তর্ সেই এ্যামানুনোর্ কিয়্যেগানি ইস্রায়েলীয়গুনোর্ থেবার চাগালার্ বারেদি নেযেইনে পুড়ি ফেলা অয়। 12সেবাবোত্যে গুরি যীশুয়ো যিরূশালেম শঅরর্ বারেদি দুঘ্ পেইনে মোজ্জ্যে, যেন তার্ নিজোর্ লো-গান্দোই মান্জ্যরে পাপত্তুন্ সিজি গুরি পারে। 13সেনত্যে এজঅ, তার অসর্মানান্ নিজে লোইনে আমি শঅরর্ বারেদি তা ইধু যেই, 14কিয়া ইয়েনত্ আমার কনঅ থিদেবর্ গোজ্জ্যে শঅর্ নেই; মাত্তর্ যে শঅরান্ এবঅ সিয়েনত্যে আমি বাজ্জ্যেই আঘিই।
15ইয়েনত্যে খ্রীষ্টর্ মাধ্যমে এজঅ, আমি গোজেন ইধু আমিযে বাঈনী-উৎসর্ব গুরিই, অত্তাৎ গোজেনর্ মানুচ্ বিলিনে যিগুনে নিজোরে স্বীগের্ গরন্ তারা তারার্ মুয়োনিলোই গোজেনরে বাঈনী গোত্তোক্। 16গম্ কাম গত্তে আর অন্যগুনোর্ রাদকালত্ এজাল্ দিবাত্তে ভুলি ন-যেইয়ো, কিত্যেই গোজেনে এবাবোত্যে উৎসর্বলোই হুজি অয়।
17তমা নেতাগুনোর্ কধানি মানি চোল্ল্য আর তারার্ বাধ্য ওইয়ো, কিয়া যিগুনে গোজেন ইধু ইজেব দিবাক্ সেবাবোত্যে মানুচ্ ইজেবে দঅ তারা তমারে দেগাশুনো গরন্। তারার্ বাধ্য ওইয়ো যেনে তারা তারার্ কামানি হুজি গুরিনে গুরি পারন, দুঘ্ পেইনে নয়। যুনি দুঘ্ পেইনে গরা পরে সালে সিয়েনত্যে তমার কনঅ লাভ্ ন-অবঅ।
18আমাত্যে তবনা গোজ্জ্য। বেক্কানি পৌইদ্যেনে আমি গমেডালে চলিবাত্যে চেই বিলিনে আমি কোই পারিই, আমা বিবেগ্কানি সাব্। 19মাত্তর্ মুই তমারে বিশেষ গুরি তবনা গুরিবাত্যে কোজোলি গরঙর্, যেন মুই আরঅ যাদিমাদি তমা সমারে এগত্তর্ ওই পারং।
20যে লো-গান্দোই শান্তি দিয়্যে গোজেনর্ উমর বেবস্থাগান অদে অদে ওইয়্যে সিয়েন্দোই গোজেনে আমা প্রভু যীশু খ্রীষ্টরে, অত্তাৎ ভেড়াগুনোর্ সেই দাঙর্ পালক্কোরে মরণত্তুন্ জেদা গুরি তুল্যে। 21যিয়েনি গম সিয়েনিলোই তে তার্ আওজ্ মজিম চলিবাত্যে তমারে পুরোপুরি যুক্কোল্ গোরোক্। তার্ চোগেদি যিয়েন গম্ যীশু খ্রীষ্টর্ মাধ্যমে আমা রিবেঙত্ তে সিয়েনই গোরোক্। উমরত্যে গোজেনর্ বাঈনী গরা ওক্। আমেন।
22ভেইলগ্, তমা ইধু মর্ বিশেষ কোজোলি ইয়েন, মর্ এ উপদেজর্ কধানি তুমি মানি লঅ। মুই দঅ তমা ইধু বেচ্ কধা ন-লিগিলুং। 23মুই তমারে জানেবাত্যে চাং, আমার্ ভেই তীমথিয় ছড়ান্ পেয়্যে। তে যুনি যাদিমাদি এজে সালে তারে সমারে লোইনে তমারে চেবাত্যে য়েম্।
24তমার বেক্ নেতাগুনোরে আর গোজেন মানুচ্চুনোরে আমার ভালেদি জানেইয়ো। ইটালী দেজর্ গোজেনর্ মানুচ্চুনে তমারে ভালেদি জানাদন্।
25তমা বেক্কুনো উগুরে গোজেনর্ দোয়্যেগান থোক্।
Currently Selected:
ইব্রীয় 13: CBT
Highlight
Share
Compare
Copy
Want to have your highlights saved across all your devices? Sign up or sign in
Copyright © 2021 Bangladesh Bible Society
