ইব্রীয় 12
12
গোজেনে তার্ পুয়োগুনোরে শাসন গরে
1সালে দেগা যাত্তে, গোজেন উগুরে বিশ্বেজর্ সাক্ষী ইজেবে বোউত্ মানুচ্ আমা চেরোকিত্যেদি ঝাগ্ গুরি আঘন্। ইয়েনত্যে এজঅ, আমি পত্তি ঝাগুলুগ্ জিনিস আর যে পাপ্পানিয়ে সহজে আমারে বেড়েকোরে ধুরিনে সিয়েনিরে দূরোত্ ঠেলি দিইনে মুজুঙেদি জিদেজিত্যে ধাবাদেনাত্ ধৈয্য ধুরিনে ধাবা দিই। 2আর এজঅ, আমা চোগ্কুন যীশু উগুরে থির্ রাগেই যিবে বিশ্বেজর্ গড়াগান্ আর পূর্ণতাগান। তা মুজুঙোত্ যে হুজী অনাগান থুয়ো ওইয়্যে সিয়েনত্যে তে অসর্মানর্ ইন্দি রিনি ন-চেইনে ক্রুশীয় মরণান্ সোজ্জ্য গুরিলো আর ইক্কিনে গোজেনর্ সিংহাসন ডেন্ ধাগেদি বৈই আঘে। 3যিবে পাপীগুনোর্ এত্তমান কুজুরোমি সোজ্জ্য গুরিলো তুমি তা পৌইদ্যেনে চিন্তে গরঅ, যেন তমার্ মনানি মন্মরা আর আজানেইয়্যে ন-অয়।
4পাপর্ বিরুদ্ধে যুদ্ধো গত্তে গত্তে তমার দঅ এজঅ লো ঝরেদে ধোক্ক্যেন অবস্থা ন-অয়। 5গোজেনে তার্ পুয়ো ইজেবে তমারে উচ্চোমি দিইনে যে কধানি কোইয়্যে সিয়েনি তুমি ভুলি যেইয়ো। তে কোইয়্যেদে,
মর্ পুয়োবো, প্রভুর্ শাজনান্ ঈচ্ ন-গুরিচ্,
আর তে যেক্কে গেইল্ দে
সেক্কে আজা ন-আরেচ্;
6কিয়া প্রভু যিবেরে কোচ্পায় তারে শাসন গরে,
আর পুয়ো ইজেবে যিগুনোরে মানি লয়,
তারারে পত্তিজনরে তে সাজা দে।
7তুমি এ বেক্ দুঘ্কানি শাসন ইজেবে ভুগোর্। গোজেনে তমা উগুরে বাব ধোক্ক্যেন বেবহার গরের্। এমন্ পুয়ো কি কেঅ আঘে যিবেরে তা বাবে শাসন ন-গরে? 8পত্তি পুয়োরে শাসন গরা অয়। তুমি যুনি শাসন ন-পেইনে থাগঅ সালে দঅ তুমি জার্বো, ঘেচ্চ্যেকগুরি পুয়ো নয়। 9ইয়েন বাদে আমি দেক্ক্যেই, আমা জগদ বাব্পুনে আমারে শাসন গুরিদাক্ আর আমি তারারে সর্মান গুরিদোং। সালে যিবে বেক্ আত্মাগুনোর্ বাপ্ তা অধিনোত্ থানা কি আমার্ আরঅ উজিত্ নয়, যেনে আমি জিংকানি পেই? 10আমা জগদ বাব্পুনে যিয়েন গম্ মনে গুরিদাক্ সেধোক্ক্যেনগুরি আমারে শাসন গোজ্জ্যন্, আর সিয়েন কয়েক্ দিনোত্যে; মাত্তর্ আমা ভালেদিত্যে গোজেনে আমারে শাসন গরে যেন আমি তার্ পবিত্রতাগান পেই। 11শাসনানরে আমি হুজির্ বেপার বিলিনে মনে ন-গুরিই, বরং দুঘোর্ বেপার বিলিনে মনে গুরিই; মাত্তর্ গোজেনর্ শাসন মানি লনার্ ফল অলঅ সুগে-শান্দিয়্যে গম্ জিংকানি। 12সেনত্যে তমার্ বেসত্ আঢ্তানি আর গির্গিরেইদ্যে আঢুগিলেগুন দরমর গরঅ। 13তমার্ আঢিবার পথ্তানি উজু গরঅ, যেন লেং মান্জ্যর অবস্থা আরঅ বেশ্ ন-অয়, বরং তে গম্ ওই উদে।
সজাক্ গরানা আর উপদেচ্ দেনা
14বেক্ মানুচ্চুনো সমারে সুগে-শান্দিয়্যে থাগদে আর পবিত্র অবাত্যে আয়োজি অ। 15চঅ, কেঅ যেন গোজেনর্ দোয়্যেত্তুন্ বাদ্ ন-পড়ন্। চঅ, বিষ্বলা তিদে গাজ শিঙোর ধোক্ক্যেন্ গেজেই উদিনে কেঅ যেন দুঘ্ বাড়েইনে ভালোক্ জনরে অসিজি ন-গরন্। 16চঅ, কেঅ যেন এষৌ ধোক্ক্যেন নীতি নেইয়্যে বা গোজেন উগুরে ভোক্তি নেইয়্যে ন-অন্। এষৌ এক সাচ্ হানাত্যে দাঙর্ পুয়োবোর্ অধিকারান্ বেজি দিয়্যে। 17তুমি কোই পারঅ, যেরেদি যুনিয়ো তে কানি কানি বর্ ভিক্ষ্যে চেইয়্যে তো তারে এলাফেলা গরা ওইয়্যে, কিয়া মনান্ ফিরেবার জু সেক্কে আর তার্ ন-এলঅ।
18-19যে জ্বোল্জোল্ল্যা মূড়ো ধরা যায় সেবাবোত্যে কনঅ মূড়ো কায়-কুরে তুমি ন-এজঅ। তুমি ঘুর্ঘুজ্জ্যে আন্ধার্ আর ঝড় বা কনঅ তূরীর্ রঅ আহ্ কধা রবোর্ কায়-কুরেয়ো ন-এজঅ। যিগুনে সেই কধানি শুন্ন্যন্ তারা কোজোলি গুরিনে কোইয়োন যেন তারা ইধু আর কিচ্চু কুয়ো ন-অয়, 20কিয়া তারা এ উগুমান সোজ্জ্য গুরি ন-পারন্-“কনঅ এ্যামানেয়ো যুনি সেই মূড়োবো ধরে সালে তারে পাত্তর্ মারা অবঅ।” 21যিয়েন দেগা যেয়্যে সিয়েন এন্ দর্গরেপারা এলঅ যে, মোশি কোইয়্যেদে, “মুই দরে গির্গিরেঙর্।”
22তুমি দঅ সিয়োন মূড়োবো আর জেদা গোজেনর্ শঅর কায় কুরে এচ্চ্য। সেই শঅরান্ অলঅ স্বর্গর্ যিরূশালেম। তুমি আজার্ আজার্ স্বর্গদূতোর্ হুজির্ পরব ইধু এচ্চ্য; 23পত্তম পুয়োর্ অধিকার পেইয়্যে মানুচ্ ইজেবে যিগুনোর্ নাঙানি স্বর্গত্ লেগা আঘে তারারে দিইনে বানেয়্যে মন্ডলী ইধু এচ্চ্য; যিবে বেক্ মানুচ্চুনোর্ বিচেরক্ সেই গোজেন ইধু এচ্চ্য; যিদুক্কুন মান্জ্যে পরিপূরোণান্ পেইয়োন সেই বেক্ নিদ্দুজি মানুচ্চুনোর্ আত্মার্ ইধু এচ্চ্য; 24যিবে এক্কান নূয়ো সুদোমর্ কারিদ্যেং সেই যীশু ইধু এচ্চ্য; আর হেবল লো-গানত্তুন্ যে লো-গান্ আরঅ গম্ কধা কয়, তুমি সেই ছিদি দিয়্যে লো কায়কুরে এচ্চ্য।
25উজিয়ার্! যিবে কধা কর্ তা কধানি এলাফেলা ন-গোজ্জ্য। মোশি গোজেনর্ উজিয়ার কধা পিত্থিমীত্ জানানার্ পরেদি মানুচ্চুনে তা কধানি এলাফেলা গোজ্জ্যন বিলিনে যেক্কে খেমা ন-পান্, সেক্কে যিবে স্বর্গত্তুন্ আমারে উজিয়ার্ গরের্ তা কধানি এলাফেলা গুরিলে আমি যে কনঅ বাবদে খেমা ন-পেবং সিয়েনত্ কনঅ সন্দেহ নেই। 26সেক্কে গোজেনর্ মুয়ো কধালোই জগদ্তানরে লাড়েই দিয়্যে, মাত্তর্ ইক্কিনে তে এ এগেমান্ গোজ্জ্যেদে, “মুই যে বানা আর একবার পিত্থিমীগানরে লাড়েম্ সিয়েন নয়, মাত্তর্ আগাজ্চানরেয়ো লাড়েম।” 27“আর একবার,” এ রঅ দ্বিবেত্তুন্ বুঝো যাত্তে, যে জিনিচ্চানি লাড়া যায়, অত্তাৎ যিয়েন সৃট্টি গরা ওইয়্যে সিয়েন বাদ্ দিয়্যে অবঅ, যেন যে জিনিচ্চানি লাড়া ন-যায় সিয়েনি থির্ থায়।
28সেনত্যে যে রেজ্যগানরে লাড়া ন-যায় আমি যেক্কে সে রেজ্যগান পেবাত্যে যের্ সেক্কে এজঅ, আমি গোজেন ইধু ভালেদি জানেই। সালে গোজেনে যেধোক্ক্যেন গুরি হুজি অয় সেধোক্ক্যেন গুরি আমি ভোক্তি আর দরে তার্ সেবা গুরি পারিবোং। 29আমা গোজেনে ভস্ত গুরিয়্যে আগুনো ধোক্ক্যেন।
Currently Selected:
ইব্রীয় 12: CBT
Highlight
Share
Compare
Copy
Want to have your highlights saved across all your devices? Sign up or sign in
Copyright © 2021 Bangladesh Bible Society
