ইব্রীয় 10
10
খ্রীষ্ট একবার নিজোরে উৎসর্ব গুরিলো
1রীদি-সুদোমত্ যিয়েনি আঘে সিয়েনি বানা ভবিচ্চদর্ ভালেদি পৌইদ্যেনে ছাবা ধোক্ক্যেন; সিয়েনিত্ ঘেচ্চ্যেকগুরি দাঙর্ বেপারানি নেই। সেনত্যে যিগুনে গোজেনর্ উবোসনা গুরিবাত্যে এজন্ রীদি-সুদোমত্ কনদিন্অ বজরর্ পর্ বজর্ এবাবোত্যে গুরি য়েমান উৎসর্বলোই তারার্ পরিপূরোণান্ দান গুরি ন-পারে। 2রীদি-সুদোমে যুনি তারারে পরিপূরোণ গুরি দান গুরি পাত্ত সালে দঅ য়েমান উৎসর্ব বন্ধ ওই যেদঅ; কিয়া উবোসনা গুরিয়্যেগুনে যুনি একবারে সিজি ওই পারিদাক্ সালে পাপত্যে আর নিজোরে দুষি মনে ন-গুরিদাক্। 3মাত্তর্ এই য়েমান উৎসর্বয়ানি পত্তি বজর্ নিজোর্ পাপ কধানি তারারে ইদোত্ তুলি দে, 4কিয়া বলদ্ গোরু আর ছাগলর্ লো-গানি কনদিনঅ পাপ ধাবেই দি ন-পারে। 5সেনত্যে খ্রীষ্ট এ জগদত্ এবার্ অক্তত্ গোজেনরে কোইয়্যেদে,
“য়েমান আর অন্য উৎসর্ব তুই ন-চাজ্,
মাত্তর্ মত্যে এক্কান কিয়্যে তুই বানেয়োচ্।
6পুজ্জ্যে উৎসর্বলোই আর পাপ উৎসর্বলোই
তুই হুজি ন-অচ্।
7যেরেদি মুই কলুং,
‘এইয়্যে দঅ, মুই এচ্চ্যং;
বোইবোত্ মর্ এজানা পৌইদ্যেনে লেঘা আঘে।
ও গোজেন, তর্ আওজ্চান পালেবাত্যে মুই এচ্চ্যং।’ ”
8উগুরে কধানি ভিদিরে পত্তমে খ্রীষ্ট কোইয়্যেদে, “য়েমান আর অন্য উৎসর্ব, পুজ্জ্যে-উৎসর্ব আর পাপত্যে উৎসর্ব তুই ন-চাজ্ আর সিয়েনিলোই হুজি ন-অচ্।” যুনিয়ো এই উৎসর্বয়ানি রীদি-সুদোমর্ উগুম মজিম গরা অদঅ তো তে এই কধানি কোইয়্যে। 9সে পরেদি খ্রীষ্ট কোইয়্যেদে, “চাহ্, মুই তর্ আওজ্চান পালেবাত্যে এচ্চ্যং।” দ্বিলম্বর্ বেবস্থাগান অদেঅদে গুরিবাত্যে তে আগ বেবস্থাগান বাদ্ দি দিলো। 10গোজেনর্ সেই আওজ্ মজিম যীশু খ্রীষ্টর্ কিয়্যেগান একপল্লা উৎসর্ব গরানালোই গোজেন নাঙে আমারে যুদো গরা ওইয়্যে।
11পত্তি ধর্মগুরু পত্তি দিন থিয়্যেইনে গোজেনর্ সেবা গরে আর বারবার্ এক্কুই উৎসর্ব গরে, মাত্তর্ এবাবোত্যে উৎসর্ব কনদিন্অ পাপ ধাবেই দি ন-পারে। 12মাত্তর্ যীশু পাপত্যে উমর কাল ধোক্ক্যেন বানা এক্কো উৎসর্ব গুরিনে গোজেনর্ ডেন্ ধাগেদি বলঅ। 13আর সেক্কেত্তুন্ ধুরি যেদকদিন সং তা শত্রুগুনোরে তা টেঙত্ তলে ন-থয় সেদক দিন সং তে বাজ্জেই আঘে, 14কিয়া গোজেনর্ নাঙে যিগুনোরে যুদো গরা ওইয়্যে সেই এক্কো উৎসর্বলোই তে উমরত্যে তারারে পূর্ণতাগান দান গোজ্জ্যে।
15পবিত্র আত্মাগানেয়ো এ পৌইদ্যেনে আমা ইধু সাক্ষ্য দের্। পত্তমে তে কোইয়্যেদে,
16প্রভু কইদ্যে, “যেরেদি মুই তারাত্যে যে বেবস্থাগান থিদেবর্ গুরিম সিয়েন অলঅ, মর্ রীদি-সুদোমানি মুই তারা রিবেঙত্ রাগেম আর তারা মন ভিদিরে সিয়েনি লিগি রাগেম।” 17ইয়েনর্ পরেদি পবিত্র আত্মাগানে কোইয়্যেদে, “মুই তারার্ পাপ, অন্যেয় আর কনদিনঅ মনত্ ন-রাগেম।” 18সেনত্যে গোজেনে যেক্কে পাপ আর অন্যেয় ক্ষেমা গরে সেক্কে পাপত্যে উৎসর্ব বিলিনে আর কিচ্চু নেই।
থির্ থেবাত্যে উপদেচ্
19ভেইলগ্, যীশু খ্রীষ্টর্ লো-গানর্ গুণে সেই দাঙর্ পবিত্র জাগানত্ সোমেবার সাহচ্ আমার আঘে। 20খ্রীষ্ট আমাত্যে এক্কান নূয়ো আর জেদা পথ্ মেলি দিয়্যে, যেন আমি পদ্দা ভিদিরেদি, অত্তাৎ তার্ কিয়্যেগানর্ মাধ্যমে গোজেন মুজুঙোত্ আঝির্ ওই পারিই। 21ইয়েন বাদে আমার এক্কো দাঙর্ ধর্মগুরুয়ো আঘে, যিবে উগুরে গোজেন ঘোর্বোগুনোরে ভারান্ দিয়্যে ওইয়্যে। 22সেনত্যে বিশ্বেজর্ মাধ্যমে যে নিচ্চয়তাগান এজে, এজঅ, আমি সেই পুরোপুরি নিচ্চয়তাগানর্ খাটি রিবেঙোই গোজেন মুজুঙোত্ যেই; কিয়া দুষি বিবেগ আঢত্তুন্ আমা রিবেঙানরে লো ছিদিনেই সিজি গরা ওইয়্যে আর পন্ পানিলোই আমা কিয়্যেগানিরে ধূয়ো ওইয়্যে। 23বিশ্বেজি ইজেবে আমার যে আজা আঘে, এজঅ, আমি থির্ ওইনে তা কধানি স্বিগের্ গুরি থেই, কিয়া যিবে এগেম্ গোজ্জ্যে তে বিশ্বেজ্বলা। 24এজঅ, আমি একজন আরেকজন পৌইদ্যেনে চিন্তে গুরিই যেন আমি কোচ্পানা আর গম কাম গত্তে একজন আরেকজনরে উচ্চোমি দি পারিই। 25কনঅ কনঅ মান্জ্যর যেধোক্ক্যেন অভ্যেস্ আঘে তারা ধোক্ক্যেন আমি যেন তেম্মাঙত্ এক সমারে এগত্তর্ অনা বাদ্ ন-দিই, বরং খ্রীষ্টর্ এবার দিন্নো যেদক্ কায়কুরে এবঅ সেদক্ যেন আমি একজন আরেক জনরে আরঅ উচ্চোমি দেনাত্ থেই।
26গোজেনর্ সত্যগানরে জানানার্ পরেদি যুনি আমি ইচ্চ্যে গুরিনে পাপ গরানাত্ থেই সালে পাপত্যে আমার আর্ কনঅ উৎসর্ব নেই; 27আঘেদে বানা বিচেরত্যে অমকদ দোরেইনে বাজ্জ্যেই থানা আর গোজেনর্ শত্রুগুনোরে ছেই গুরি ফেলানা ধোক্ক্যেন জ্বোল্জোল্ল্যে রাগ্। 28কেঅ মোশির রীদি-সুদোমানি অস্বিগের্ গুরিলে কনঅ মেয়্যে ন-পেইনে দ্বিজন বা তিনজন সাক্ষীর সাক্ষ্যর্ কারনে তাত্তুন্ মরা পরে। 29সালে গোজেনর্ পুয়োবোরে যে ঈচ্ গোজ্জ্যে, যে লো-গান্দোই তে সিজি ওইয়্যে গোজেনর্ সেই বেবস্থার্ লো-গানরে যে অপবিত্র মনে গোজ্জ্যে আর যে দোয়্যে গরে সেই পবিত্র আত্মাগানরে যে অগমান গোজ্জ্যে, ভাবি চঅ, তে আরঅ কত্তমান বেশ্ সাজা পেবার্! 30আমি তারে কোই পারিই যিবে কোইয়্যে, “অন্যেয়র্ সাজা দিবার্ অধিকার বানা মত্তুনই আঘে; যার্ যিয়েন পাওনা মুই তারে সিয়েনই দিম্।” তে আরঅ এক জাগাত্ কোইয়্যে, “প্রভুই তার্ মানুচ্চুনো উগুরে ন্যায়বিচের্ গুরিবো।” 31জেদা গোজেন আঢত্ পড়ানা কি দর্গরেপারা।
32আগ দিনুনোর্ কধানি মনত্ তুলি চঅ। সেক্কেনে পহ্র পেইনে দুঘোত্ ভারী কষ্টর্ মোধ্যেয়ো তুমি থির্ এলা। 33কনঅ কনঅ সময় বেক্কুনো মুজুঙোত্ অগমান্ আর অত্যেচার সোজ্জ্য গুরিনে তুমি থেঝেরা গরা খেইয়্যে ওইনে দুঘ্ পেইয়ো; যিগুনো উগুরে সেবাবোত্যে বেবহার গরা ওইয়্যে তারা সমারে দুঘ্ পেইয়ো; 34আর যিগুনে জেলোত্ যেয়োন তারার্ দুঘে দুঘী ওইয়োন। তমার পযাপিরানি লুট ওই যানাগান তুমি হুজি মনে মানি লোইয়ো, কিয়া তুমি কোই পারিদা যে, আরঅ গম আর থিদেবর্ ধন তমাত্যে আঘে।
35সেনত্যে তুমি সাহচ্ ন-আড়েইয়ো, কিয়া ইয়েনর পুরস্কারান ভারী মহৎ। 36তমাত্তুন্ থির্ থানা দরকার, যাতে গোজেনর্ আওজ্ মজিম কাম গরানার্ পরেদি গোজেনে যিয়েন দিবাত্যে এগেম্ গোজ্জ্যে সিয়েন তুমি পঅ; 37কিয়া গোজেনর্ কধা মজিম, “যিবে এবার্ কধা আঘে তে খুব কয়েক দিনো ভিদিরে এবঅ, দেরি ন-গুরিবো। 38আর যে মানুচ্চোরে মুই নিদ্দুজি বিলিনে মানি লোইয়োং তে বিশ্বেজর্ মাধ্যমে জিংকানি পেবঅ; মাত্তর্ কেঅ যুনি ফিরি যায় সালে তা উগুরে মুই হুজি ন-ওম্।” 39যিগুনে ফিরি যেইনে ভস্ত অন্ আমি দঅ সেই দলর নয়; যিগুনে বিশ্বেজ্ গুরিনে উদ্ধোর্ পান আমি সেই দলর্।
Currently Selected:
ইব্রীয় 10: CBT
Highlight
Share
Compare
Copy
Want to have your highlights saved across all your devices? Sign up or sign in
Copyright © 2021 Bangladesh Bible Society
