যিহিষ্কেল 43
43
উবোসনা-ঘরত্ লগেপ্রভুর মহিমা
1সে পরেদি তে মরে পূগেদি মু গেট্টো ইধু আনিলো, 2আর মুই পূগেদিত্তুন্ ইস্রায়েল গোজেনর মহিমাগান্ এত্তে দেগিলুং। তার্ মুয়ো রবো এলদে জোরে বেঈ যেইয়্যে পানি গঙার গুজুরোনি ধোক্ক্যেন্ আর তার মহিমালোই পিথ্তিমীগান জোল্জোল্যে ওই উদিলো। 3এ দর্শনান্ দেগিনে মুই মাঢা নিগিরি পড়িলুং; মুই শঅর-ভস্ত অনার্ যে দর্শনান্ কবার গাঙ পারত্ দেগিলুং এ দর্শনান্ এলদে সিয়েন ধোক্ক্যেন্। 4লগেপ্রভুর মহিমাগান পূগেদি গেদো ভিদিরেদি উবোসনা-ঘরত্ সোমেল। 5সেক্কে লগেপ্রভুর আত্মাগানে মরে তুলিনে ভিদিরে উদোনত্ নেযেল, আর লগেপ্রভুর মহিমালোই উবোসনা-ঘরান ভুরি গেলঅ।
6সে মানুচ্চো সেক্কে মঅ কায়কুরে থিয়্যেই এলঅ, আর মুই উবোসনা-ঘর ভিদিরেত্তুন্ কনজনে মঅ লগে কধা কদে শুনিলুং। 7তে কলঅ, ও মানজ্যর্ পুয়োবো, ইয়েন মর্ সিংহাসনর্ জাগা আর মর্ টেঙ্ রাগেবার জাগা। মুই ইধু ইস্রায়েলীয়গুনো ভিদিরে উমর সং বজত্তি গুরিম। ইস্রায়েলীয়গুনে আর কনদিন্অ মর্ পবিত্র নাঙান্ কলংকিত ন-গুরিবাক্। তারার্ বা তারার্ রাজাগুনোর্ মূত্তিপূজোলোই আর পূজোর্ অজল্ জাগানত্ তারার্ রাজাগুনোর মরাকিয়্যেনি নেযানালোই মঅ নাঙান্ কলংকিত ন-গুরিবাক্। 8তারা মঅ ঘরর্ কায়কুরে তারার্ ঘরানি বানেয়োন; তারা ঘরানি আর মঅ ঘরানি মোধ্যে বানা এক্কান দেবাল এলঅ। তারার জঘন্য কামানিলোই তারা মঅ পবিত্র নাঙান্ কলংকিত গোজ্যন্। সেনত্তে মুই রাগে তারারে ভস্ত গোজ্যং। 9ইক্কিনে তারা মত্তুন্ তারার মূত্তি পূজোগুন আর তারার্ রাজাগুনোর মরাকিয়্যেনি দূর্ গোরোদোক্; সেক্কে মুই উমর সং তারা ভিদিরে বজত্তি গুরিম।
10ও মান্জ্যর পুয়োগুন, তুই ইস্রায়েলীয়গুনো ইধু এ উবোসনা-ঘর পৌইদ্যেনে কঅ আর ইয়েনর নক্শাগান পৌইদ্যেনে চিন্তে গুরিনে চেবাত্তে কঅ, যেনে তারা তারার্ পাপত্তে লাজান্। 11তারা যুনি তারার্ বেক কামানিত্তে লাজান্ সালে উবোসনা-ঘরর নক্শাগানর্ খুদিনাঢি তারারে জানা; তার্ ফ্রেমানি, তার বারেদি যেবার আর ভিদিরে সোমেবার পথ্তান, অত্তাৎ তার পুরো আড়ুগ্কান্ আর তার্ বেক নিয়ম আর রীদি-সুদোমানি তারা ইধু ফগদাং গর্। সিয়েনর্ বেক্কানি তারা মুজুঙোত্ লেখ্ যেনে তারা সিয়েনর নক্শা মজিম্ কাম্ গুরি পারন আর সিয়েনর বেক সুদোমানি মানি চলি পারন্।
12ইয়েন অলঅ উবোসনা-ঘরর্ আইন-মুড়োবো উগুরে চেরোকিত্তে বেক্ চাগালাগান অবঅ বজমান্ সুদ্ধো-সাংগ। উবোসনা-ঘরর আইনান্ এবাবোত্যে।
ডালিপূজো
13“উবোসনা-ঘরর ডালি পূজোবো মাব্পান্ আঢ মাপ অনুসারে গরা ওইয়্যে; পত্তি আঢ্ এলদে এক আত্ চের্ আঙুল্ গুরি। ইয়েন অলঅ ডালিপূজোর্ মাপ: ডালিপূজোর্ গড়াগান এক আত্ অজল্ আর তার চেরোকিত্তে ডালি পূজোবোত্তুন্ এক আত্ গুরি বাড়েয়্যে আর গড়াগানর্ চেরোকিত্তে দুযিগান আধা আত্ অজল্। ডালিপূজোবো এ বাবোত্যে অজল্ অবঅ- 14-16তলেদি ভাগ্কান গড়াগানত্তুন্ দ্বিআত্ অজল্; সিয়েনর উগুরে ভাগ্কান চের্ আত্ অজল্ মাত্তর্ তলেদি ভাগত্তুন্ চেরোকিত্তে এক আত্ গুরি চিগোন্ আর সিয়েন উগুরে ভাগ্কান তার্ তলেদি ভাগ্কানত্তুন্ চের্ আত্ অজল, মাত্তর্ তলেদি ভাগ্কানত্তুন্ চেরোকিত্তে এক আত্ গুরি চিগোন। ডালিপূজোবো উগুরে ভাগ্কান অবঅ চেরকণা সং, বার আত্ লাম্বা আর বার আত্ পাদাজ্যে। তার চের্কণাত্তুন্ চের্বো সিং উগুরেদি নিগিল্যে থেবঅ। 17সংমোধ্যের্ ভাগ্কান গুল্, চোদ্দো আত্ লাম্বা আর চোদ্দো আত্ পাদাজ্যে। সেনত্তে সেই ভাগ্কান সিয়েন উগুরেত্তুন্ চেরোকিত্তে এক আত্ বাড়েয়্যে থেবঅ; সিয়েনর্ দুযিগান আধা আত্ অজল্ থেবঅ। ডালিপূজোবোর্ সিড়িগান পূগেদি মু।”
18সে পরেদি তে মরে কলঅ, ও মান্জ্যর পুয়োগুন, প্রভু লগেপ্রভু কোইয়্যেদে, ডালিপূজোবো বানা অলে পরেদি যেদিন্যে সিবে লগেপ্রভুর নাঙে উৎসর্ব গরা অবঅ যেনে সিবে উগুরে পুজ্যে-উৎসর্বর্ অনুষ্ঠান গরা আর লো ছিদে যায় সেদিন্যে এ সুদোমান পালা পুরিবো; 19সাদোক বংশর যে ধর্মগুরুগুন মরে সেবা গুরিবাত্তে মইধু এজন্ তুই পাপ-উৎসর্বত্তে তারারে এক্কো দামাড়া গোরু দিবে। 20তুই তার্ কিজু লো লোইনে ডালিপূজোবোর্ চের্বো শিঙোত, সংমোধ্যে ভাগ্কানর চের্কোণাত্ আর কাজাকুরেদি বেক্কানিত্ লাগেবে; এবাবোত্যেগুরি পাপ ঢাগিবার্ অনুষ্ঠান গুরিনে ডালিপূজোবো সিজি গুরিবে। 21তুই পাপ-উৎসর্বত্তে গদ্দন্ দিয়্যে গোরুবো নেযেইনে উবোসনা-ঘর চাগালার্ বারেদি সুদ্ধো-সাংগ জাগানর্ ঠিগ্ জাগানত্ সিবে পুড়িবে।
22দ্বিদিনোত্ তুই এক্কো গম্ পাদা আনিবে, আর ধর্মগুরুগুনে পাপ-উৎসর্বর্ অনুষ্ঠান গুরিবাক্ আর ডালিপূজোবোর্ গোরুবো লো-লোই যেবাবোত্যেগুরি সিজি গরা ওইয়্যে সেবাবোত্যেগুরি সিজি গুরিবে। 23-24ডালিপূজোবো সিজি গরা অলে পরেদি তুই এক্কো গম্ তেল্তেল্যে দামাড়া গোরু আর পালত্তুন্ এক্কো গম্ তেল্তেল্যে ভেড়া ছাগল নিইনে লগেপ্রভুর মুজুঙোত্ আজিল্ গুরিবে; ধর্মগুরুগুনে সিগুনো উগুরে নুন্ ছিদি দিইনে লগেপ্রভুর নাঙে পূজ্যে-উৎসর্বর্ অনুষ্ঠান গুরিবাক্।
25“সাত দিন ধুরি তত্তুন্ পত্তিদিন পাপ-উৎসর্বত্তে এক্কো গুরি পাদা দিয়্যে পুরিবো। ইবে বাদেয়ো এক্কো দামাড়া গোরু আর পালত্তুন্ এক্কো ভেড়া ছাগল দিয়্যে পুরিবো; বেক্কুন যেনে গম্ তেল্তেল্যে অয়। 26ধর্মগুরুগুনে সাত দিন সং ডালিপূজোবোর পাপ ঢাগিবার্ অনুষ্ঠান গুরিনে সিবে সিজি গুরিবাক্; এবাবোত্যেগুরি তারা ডালি পূজোবো লগেপ্রভুর নাঙে উৎসর্ব গুরিবাক্। 27এ দিনুন্ শেজ্ অনার্ পরেদি আস্তো দিনোত্তুন ধুরি ধর্মগুরুগুনে সে ডালিপূজোবো উগুরে তমার্ পূজ্যে আর উদোলোলি-উৎসর্বর অনুষ্ঠান গুরিবাক্। সেক্কে মুই তমারে গুজি লোম্। মুই প্রভু লগেপ্রভু এ কধাগান কঙর্।”
Currently Selected:
যিহিষ্কেল 43: CBT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 Bangladesh Bible Society
