যিহিষ্কেল 42
42
ধর্মগুরুগুনোর বিল্ডিং
1পরেদি তে মরে উবোসনা-ঘরর উত্তোরেদি বারেদি উদোনত্ আনিনে এক্কান বিল্ডিঙোত্ নেযেল। সেই বিল্ডিঙান্ উবোসনা-ঘরর্ উত্তোরেদি মেলা জাগান কায় আর পোজিমেদি বিল্ডিঙান কায় এলঅ। 2সিয়েন এলদে একশ আত্ লাম্বা আর পঞ্চাশ আত্ পাদাজ্যে আর সিয়েনত্ সোমেবার পথ্তান এলদে উত্তোরেদি মু। 3এ বিল্ডিঙান এলদে ভিদিরে উদোনর্ কুড়ি আঢর্ সেই মেলা জাগায়ান আর বারেদি উদোনর্ ঘিজ্যে জাগান ভিদিরে। বিল্ডিঙান্ তিন তালা এলঅ আর পত্তি তালাত্ গুদিগুনো মুজুঙোত্ আঢিবার পথ এলঅ। 4সে পথ্তান এলদে দশ আত্ পাদাজ্যে; সিয়েনত্তুন্ বিল্ডিঙো ভিদিরে মেলা জাগানত্ যেবাত্তে এক আত্ পাদাজ্যে এক্কান পথ এলঅ। বিল্ডিঙোর্ গুদিগুন উত্তোরেদি খুলো এলঅ। 5-6ভিদিরে মেলা জাগানর্ পিলারুনো ধোক্ক্যেন বিল্ডিঙান উগুরে তলা দ্বিয়েনর্ কনঅ পিলার্ ন-এলঅ। সেনত্তে এ বিল্ডিঙানর্ পথ্তানি এক্কান উগুরে আর এক্কান ন-এলঅ, বরং যেদক্ উগুরে উঠ্যেগোই সেদক্ ভিদিরেদি সোম্মেগোই; সেক্কে গুদিগুন গায়গায় চিগোন্ ওই যেইয়োন। 7-9সেই বিল্ডিঙানর্ পূগেদি এক্কান সোমেবার পথ এলঅ আর সিয়েন মুজুঙোত্ উত্তোর-দোগিণেদি লাম্বা এক্কান পঞ্চাশ আত্ দেবাল এলঅ। সে দেবালানর্ পূগেদি এলদে বারেদি উদোনান্। সে দেবালান্ বিল্ডিঙানর্ পাদাজ্যেদি সং সং এলঅ। বিল্ডিঙানর্ পূগেদি বারেদি উদোন ইন্দি পাদাজ্যেদি এলদে পঞ্চাশ আত্ আর উবোসনা-ঘর ইন্দি লাম্বাদি পঞ্চাশ এলদে একশ আত্।
10উবোসনা-ঘরর্ দোগিণেদি ঠিগ্ এক্কুই এক্কান বিল্ডিং এলঅ। সিয়েন এলদে ভিদিরে উদোনর্ মেলা জাগান কায় আর পোজিমেদি বিল্ডিঙান কায়। 11উত্তোরেদি ধোক্ক্যেন এ বিল্ডিঙান্ সং এক্কান পথ এলঅ। এ বিল্ডিঙান্ বেক্কানিত্তুন, অত্তাৎ লাম্বাদি, পাদাজ্যেদি, সোমেবার পথ্তান আর ভিদিরে সল্লাগান উত্তোরেদি বিল্ডিঙান ধোক্ক্যেন এলঅ। 12সেই বিল্ডিঙানর্ সোমেবার পথ্তান এলদে দোগিণেদি। বিল্ডিঙানর্ পূগেদি আর এক্কান সোমেবার পথ এলঅ আর সিয়েন মুজুঙোত্অ এক্কান দেবাল এলঅ।
13সে পরেদি তে মরে কলঅ, “উবোসনা-ঘরর মেলা জাগাত্ উত্তোর্ আর দোগিণেদি বিল্ডিং দ্বিয়েন ধর্মগুরুগুনোর। যে ধর্মগুরুগুনে লগেপ্রভু ইধু যান্ তারা এ বিল্ডিং দ্বিয়েনত্ উৎসর্বর দাঙর্ সুদ্ধো-সাংগ জিনিসচানি হেবাক্। সিয়েনত্ তারা শোস্য-উৎসর্ব, পাপ-উৎসর্ব আর দুষ উৎসর্বর দাঙর্ সুদ্ধো-সাংগ জিনিসচানি থবাক্, কিত্যে বিল্ডিং দ্বিয়েন সুদ্ধো-সাংগ। 14ধর্মগুরুগুনে সেবা-কামত্তে উবোসনা-ঘরত্ যে কাবড়ানি পিনিনে সোমেবাক্ সিয়েনি এ বিল্ডিং দ্বিয়েনত্ খুলিবাক্ আর সে পরেদি বারেদি উদোনত্ যেই পারিবাক্, কিত্যে সিয়েনি সুদ্ধো-সাংগ পোজাক্। সাধারণ মানুচ্চুনো জাগাত্ যেবার আগেদি তারাত্তুন্ অন্য কাবড় পিনে পড়িবো।”
15উবোসনা-ঘরর্ চেরোকিত্তে দেবাল ভিদিরে বেক্কানি মাবানা থুম্ গুরিলে পরেদি তে মরে পূগো গেদো বারেদি আনিলো আর বারেদি চেরোকিত্তে চাগালাগান মাবিলো। 16-19তে মাবেদে কাদিলোই চাগালাগানর্ পূগে, উত্তোরে, দোগিণে আর পোজিমেদি মাবানার্ পরেদি সিগুনোর্ পত্তিবো পাচশঅ মাবেদে কাদি অলঅ। 20সুদ্ধো-সাংগ জাগানত্তুন্ সাধারণ মানুচ্চুনোর জাগায়ানি যুদো গুরিবাত্তে চেরোকিত্তে এক এক্কান পাচশঅ মাবেদে কাদিলোই লাম্বা এক্কান দেবাল এলঅ।
Currently Selected:
যিহিষ্কেল 42: CBT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 Bangladesh Bible Society
