যিহিষ্কেল 30
30
মিসরত্তে আবিলেচ্ গরানা
1পরেদি লগেপ্রভু মরে আরঅ কোইয়্যেদে, 2ও মান্জ্যর পুয়োবো, তুই এ আগাম্ কধাগান কঅ, প্রভু লগেপ্রভু কোইয়্যেদে, সেই দিন্নোত্তে দুঃখ ফগদাং গরঅ। 3এক্কো দর্গরেপারা দিন এজের্, কিত্যে দিন্নো কায়কুরে লুম্মেগি; সিবে মেঘে ঢাক্যে দিন আর জাদ্তুনোর শেজ্ সময়। 4মিসর উগুরে এবঅ যুদ্ধো আর কূশর উগুরে এবঅ অমকদ যন্ত্রণা। মিসর মানুচ্চুনে মুরিনে পড়ি থেবাক্, তার ধন-সোম্বোত্তিগানি নেযা অবঅ আর তার বেক্ জাগায়ানি ভস্ত অবঅ। 5কূশ, পূট, লূদ আর বেক্ আরব দেজ্চান, কূব আর কায়কুরে দেজর্ মানুচ্চুনে যুদ্ধোত্ মিসর লগে মারা পড়িবাক্। 6মিসরর কায়কুরে দেজর্ মানুচ্চুনে ভস্ত ওই যেবাক্ আর তার খেমতার ভাড়ান্অ শেজ্ অবঅ। মিগ্দোলত্তুন্ সিবেনী সং মানুচ্চুনে যুদ্ধোত্ মুরিবাক্। মুই প্রভু লগেপ্রভু এ কধাগান কঙর্।
7ভস্ত ওই যেইয়্যে দেজ্চানি ভিদিরে মিসরর অবস্থাগান্ আরঅ ভান্ন্যেই অবঅ আর ভস্ত ওই যেইয়্যে শঅরানি ভিদিরে তার শঅরানির অবস্থাগান আরঅ খারাব্ অবঅ। 8যেক্কে মুই মিসরত্ আগুন বাজেই দিম আর তার বেক্ বল্দিয়্যেগুনে চুরমার ওই যেবাক্ সেক্কে তারা হবর্ পেবাক, মুয়ই লগেপ্রভু।
9সেদিন্যে আরামে থেইয়্যে কূশরে দর্ দেগেবাত্তে হবর্ কোইয়্যেগুনে মর্ উগুমে জাহাজত্ গুরিনে নিগিলি যেবাক্। মিসরর শেজ্ দিনোত্ কূশর্অ যন্ত্রণা অবঅ, কিত্যে সেদিন্নো তা উগুরেয়ো এবঅ।
10মুই প্রভু লগেপ্রভু কঙর্, বাবিলর রাজা নবূখদ্নিৎসর আঢ্তোই মিসরর বেগ দাঙর্ দল্লোরে মুই শেজ্ গুরি দিম। 11তারে আর তার সৈন্যদল্লোরে, অত্তাৎ বেক্ জাদ্তুনো ভিদিরে যিগুনে বেগত্তুন চিৎনপুজ্যে তারারে আনা অবঅ দেজ্চানরে ভস্ত গুরিবাত্তে। তারা মিসররে আক্রমণ গুরি তার মুরি যেইয়্যে মানুচ্চুনোরে দিইনে দেজ্চানরে ভোরেই দিবো। 12মুই নীল্ গাঙানর্ পানিগান শুগেই ফেলেম আর পাজি মানুচ্চুনো ইধু দেজ্চান বিজি দিম; বিদেশীগুনো আঢ্তোই দেজ্ আর সিয়েন ভিদিরে বেক্কানি মুই ভস্ত গুরি দিম। মুই লগেপ্রভু এ কধাগান কঙর্।
13“‘মুই নোফর মূত্তিগুন ভস্ত গুরি ফেলেম, তার মূত্তিগুন শেজ্ গুরি দিম। মিসরত্ আর কনঅ শাজন্গুরিয়্যে ন-থেবাক্ আর দেজর্ বেক্কানিত্ মুই দর্বুগ্ ফুদেই দিম। 14মুই পথ্রোষরে উগুজ্যে ভূইয়ো ধোক্ক্যেন ফেলেই রাগেম, সোয়নত্ আগুন বাজেই দিম আর নো শঅরানরে সাজা দিম। 15মুই মিসরর ঘর সীন শঅর উগুরে মর্ রাগ্কান ঢালি দিম আর নো শঅরর্ বেক মানুচ্চুনোরে ছাজি ফেলেই দিম। 16মুই মিসর দেজত্ আগুন বাজেই দিম; সীন শঅরান্ যন্ত্রণায় মজরা যেবঅ। নো শঅর উগুরে অদাদত্ দযা এবঅ; নোফ দিনোত্ দুঘোত্ পুরিবো। 17আবেন আর পী-বেশতর গাবুজ্যেগুনে যুদ্ধোত্ মুরিবাক্ আর অন্য মানুচ্চুনে বন্দীদজাত্ যেবাক্। 18মুই যেক্কেনে মিসরর জুঙোলান্ ভাঙি ফেলেম সেক্কে তফন্হেষত্ দিনোত্ আন্ধার্ লামি এবঅ; সিয়েনত্ তার খেমতার বাড়্ গরানায়ো শেজ্ ওই যেবঅ। তে মেঘে নাঢা যেবঅ আর তার আদামানির মানুচ্চুন বন্দীদজাত্ যেবাক্। 19এবাবোত্যেগুরি মুই মিসররে সাজা দিম, আর সেক্কেনে তারা হবর্ পেবাক্, মুয়ই লগেপ্রভু।’ ”
20আমা বন্দীদজার্ এগার বজরর্ পত্তম মাজর্ সাত দিনোত্ লগেপ্রভুর এ কধাগান মইধু ফগদাং অলঅ, 21“ও মান্জ্যর পুয়োবো, মুই মিসরর্ রাজা ফরৌণর আঢ্তান ভাঙি দুয়োং। গম্ অবাত্তে সেই আত্ কাবড়লোই বানা ন-অয় যেনে সিয়েন লাম্বা ছুরি ধুরিবাত্তে যগাজ্যেগুরি বল্ পায়। 22মুই প্রভু লগেপ্রভু কঙর্, মুই মিসরর রাজা ফরৌনর বিপক্ষে। মুই তার গম্ আর ভাঙা দ্বিয়েন আত্ ভাঙি দিম আর তা আঢত্তুন্ লাম্বা ছুরিগান্ ফেলেই দিম। 23মুই নানান্ জাদর্ আর দেজ ভিদিরে মিসরীয়গুনোরে ছিদিই দিম। 24মুই বাবিল রাজার আঢত্ খেমতা দিম আর মঅ লাম্বা ছুরিগান্ তা আঢত্ দিম, মাত্তর্ ফরৌণর আঢ্তানি মুই ভাঙি ফেলেম। সেক্কে ফরৌণে বাবিল রাজার মুজুঙোত্ আহত মান্জ্য ধোক্ক্যেন এগুর্-উগুর্ হেবঅ। 25মুই বাবিল রাজার আঢত্ খেমতাগান্ দিম মাত্তর্ ফরৌণর আঢ্তানি দুলি পড়িব। মুই যেক্কেনে মর্ লাম্বা ছুুরিগান্ বাবিল রাজার আঢত্ দিম আর তে মিসরর বিরুদ্ধে সিয়েন চালেব সেক্কে বেক্কুনে হবর্ পেবাক, মুয়ই লগেপ্রভু। 26মুই যেক্কেনে মিসরীয়গুনোরে নানান্ জাদর্ আর দেজ ভিদিরে ছিদি দিম সেক্কেনে তারা হবর্ পেবাক্, মুয়ই লগেপ্রভু।”
Currently Selected:
যিহিষ্কেল 30: CBT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 Bangladesh Bible Society
