যিহিষ্কেল 29
29
মিসর বিরুদ্ধে আগাম্ কধা
1আমা বন্দীদজার্ দশ বজরর দশ মাজর্ বার দিনোত্ লগেপ্রভুর এই কধাগান মইধু ফগদাং অলঅ, 2ও মান্জ্যর পুয়োবো, তুই তর্ মুয়োন মিসরর্ রাজা ফরৌণ ইন্দি রাগেইনে তার আর পুরো মিসর দেজ বিরুদ্ধে আগাম্ কধা কঅ, 3প্রভু লগেপ্রভু কোইয়্যেদে, ও মিসরর রাজা ফরৌণ, মুই তর্ বিপক্ষে। তুই নিজো গাঙ্ ভিদিরে পড়ি থেইয়্যে সেই দাঙর্ কুমোর্বো। তুই কোই থাচ্, নীল্ গাঙান্ তর্ আর তুই নিজোত্তে সিয়েন বানেয়োচ্। 4মাত্তর্ মুই তর্ মাড়িত্ হেবা লাগেম্ আর তর্ গাঙ মাছচুনোরে তঅ আঁশ্চানি লগে লাগেই দিম। তর্ আঁশ্চানি লগে থেইয়্যে বেক্ মাছচুন সুদ্ধো মুই তরে তঅ গাঙানত্তুন্ টানি তুলি আনিম। 5মুই তরে আর তর্ গাঙানর্ বেক মাছচুনোরে ধূল্যেচর-চাগালাত্ ফেলেই রাগেম। তুই খুলো মাদত্ পড়ি থেবে আর তরে তুলিনে গোর্ দিয়্যে ন-অবঅ। মুই হানা ইজেবে তরে ঝার্বো য়েমান আর আগাজ পেখ্কুনোরে দিম। 6সেক্কে যিগুনে মিসরত্ বজত্তি গরন্ তারা বেক্কুনে হবর্ পেবাক, মুয়ই লগেপ্রভু।
তুই ইস্রায়েলীয়গুনোত্তে নল লাদি ওইয়োচ্। 7তারা তরে আঢ্তোই ধুরিলে পরেদি তুই ফাদি যেইনে তারার্ কানা উগুরে আঘাত্ গুরিদে। তারা যেক্কেনে তঅ উগুরে ভর্ দিদাক্ সেক্কে তুই ভাঙি যেদে আর তারার্ পিঠ্তানি সেক্কে মজরা যেদঅ।
8সেনত্তে মুই প্রভু লগেপ্রভু কঙর্, মুই তঅ বিরুদ্ধে যুদ্ধো আনিনে তঅ মানুচ্চুনোরে আর য়েমানুনোরে মারে ফেলেম। 9মিসর অবঅ এক্কান মানুচ্ নেইয়্যে ভস্তর্ জাগা। সেক্কে তঅ মানুচ্চুনে হবর্ পেবাক্, মুয়ই লগেপ্রভু।
তুই কোইয়োচ্, য়েল্ গাঙান্ তর্ আর তুয়ই সিয়েন বানেয়োচ্। 10সেনত্তে মুই তর্ আর তঅ গাঙানর্ বেক পানিগান বিরুদ্ধে। মুই মিগ্দোলত্তুন্ সিবেনী, অত্তাৎ কূশের দুযি সং মিসর দেজ্চানরে মানুচ্ নেইয়্যে আর ভস্তর্ জাগা গুরি দিম। 11সিয়েন ভিদিরেদি কনঅ মানুচ্ বা য়েমান আদাউদো ন-গুরিবাক্; চল্লিশ বজর্ ধুরি সিয়েনত্ কনজনে বজত্তি ন-গুরিবাক্। 12ভস্ত ওই যেইয়্যে বেক্ দেজ্চানি ভিদিরে মুই মিসর দেজর্ অবস্থা আরঅ বেশ্ ভান্ন্যেই গুরি দিম; ভস্ত ওই যেইয়্যে শঅরানি ভিদিরে তার শঅরানির অবস্থা চল্লিশ বজর ধুরিনে আরঅ ভান্ন্যেই ওই থেবঅ। মুই নানান্ জাদত্ আর দেজ ভিদিরে মিসরীয়গুনোরে ছিদি দিম্।
13“‘চল্লিশ বজরর্ শেজত্ মুই নানান্ দেজত্ ছিদি থেইয়্যে মিসরীয়গুনোরে এগত্তর্ গুরিম। 14মুই তারার অবস্থাগান ফিরেইনে তারার পূরোণি মানুচ্চুনো দেজত্ পথ্রোষত্ নেযেম। সিদু তারার্ রেজ্যগান অবঅ খেমতানেইয়্যে। 15পথ্রোষচান্ অবঅ বেগত্তুন নরম রেজ্য; অন্য জাদ্তুনো ভিদিরে সিয়েনে কনদিন্অ নিজোরে অজল্ ন-গুরিবো। মুই তারে এদক্ নরম গুরিম, সিয়েনে আর কনদিন্অ অন্য জাদ্তুনো উগুরে রাজাগিরি গুরি ন-পারিবো। 16ইস্রায়েলীয়গুনে আর কনদিন্অ মিসর উগুরে বিশ্বেজ্ ন-গুরিবাক্। মিসরর্ অবস্থাগান্ দেগিনে তারা বুঝি পারিবাক্, সাহায্যত্তে মিসর ইন্দি ফিরিনে তারা পাপ গোজ্যন্। সেক্কে তারা হবর্ পেবাক্, মুয়ই প্রভু লগেপ্রভু।’”
17আমা বন্দীদজার্ সাতেশ বজরর পত্তম মাজর্ পৌইল্যা দিনোত্ লগেপ্রভুর এ কধাগান মইধু ফগদাং অলঅ, 18ও মান্জ্যর পুয়োবো, বাবিলর রাজা নবূখদ্নিৎসর সোরের বিরুদ্ধে যুদ্ধোর সময় তার সৈন্যদলরে এদক্ বেশ্ খাদেয়্যেদে যে, তারার্ বেক্কুনোর মাঢার্ চুল উদি যেইয়্যে আর কানাগানির চামাড়ানি উদি যেইয়্যে। তো সোরর বিরুদ্ধে তে যে যুদ্ধো চালেয়্যে সিয়োত্ তার বা তা সৈন্যদলর কনঅ লাভ ন-অয়। 19সেনত্তে মুই বাবিলর রাজা নবূখদ্নিৎসররে মিসর দেজ্চান দিম আর তে তার ধন-সোম্বোত্তিগানি নেযেব। তার সৈন্যদলর বেতনত্তে তে সেই দেজ্চান লুদেব। 20তার কামর্ পাওনা ইজেবে মুই তারে মিসর দেজ্চান দুয়োং, কিত্তে তে মত্তে কাম্ গোজ্যে। মুই প্রভু লগেপ্রভু এ কধাগান কঙর্।
21“সেদিন্যে মুই ইস্রায়েল জাদরে খেমতাবলা গুরিম আর তারা ভিদিরে কধা কবাত্তে তর্ মুয়োন খুলি দিম। সেক্কে তারা হবর্ পেবাক্, মুয়ই লগেপ্রভু।”
Currently Selected:
যিহিষ্কেল 29: CBT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 Bangladesh Bible Society
