যিহিষ্কেল 3
3
1তে মরে কলঅ, “ও মান্জ্যর পুয়োবো, তঅ মুজুঙোত্ যিয়েনি আঘে সিয়েনি তুই হাঃ; এই গুজেই রাগেয়্যে বোইবো হেই ফেলা, সে পরেদি ইস্রায়েলীয়গুনো ইধু যেইনে কধা কঅ।” 2সেক্কে মুই মুয়োন খুলিলুং, আর তে মরে সে বোইবো হাবেই দিলো।
3সে পরেদি তে মরে কলঅ, “ও মান্জ্যর্ পুয়োবো, মর্ দিয়্যে এ বোইবো হেইনে তঅ পেট্তো ভরা।” সেনত্তে মুই সিবে হেই ফেলেলুং, আর সিবে মঅ মুয়োদি মধু ধোক্ক্যেন্ মিদে লাগিলো।
4তে সে পরেদি মরে কলঅ, “ও মান্জ্যর্ পুয়োবো, তুই ইক্কিনি ইস্রায়েলীয়গুনো ইধু যেইনে মঅ কধানি কঅ। 5তরে দঅ এমন মান্জ্য ইধু পাদা ন-অর্ যিগুনোর ভাষা তর্ অজানা আর আগাত্যা, মাত্তর্ পাদা অত্তে ইস্রায়েলীয়গুনো ইধু। 6যিগুনোর্ কধা তুই ন-বুঝোচ্ সেবাবোত্যে অজানা আর আগাত্যা ভাষা কোইয়্যে ভালোক্কুন্ জাদ ইধু তরে পাদা ন-অর্। যুনি তারা ইধু মুই তরে পাধেদুং সালে হামাক্কায় তারা তঅ কধানি শুনিদাক্। 7মাত্তর্ ইস্রায়েলীয়গুনে তঅ কধানি শুনিবাত্তে ন-চেবাক্, কিত্যে তারা মঅ কধানি শুনিবাত্তে ন-চান; ইয়েনর কারনান্ অলঅ, গোদা ইস্রায়েল জাদ্তো আগাত্যা-মনর্ আর একবুচ্চ্যে। 8মাত্তর্ মুই তরে তারা ধোক্ক্যেন্ একবুচ্চ্যে আর আগাত্যা-মনর্ গুরি দিম। 9মুই তঅ কবালান্ হীরা ধোক্ক্যেন দর, চক্মকি পাত্তরত্তুন্অ বেশ্ দর গুরি দিলুং। যুনিয়ো তারা এক্কো উল্লোমী জাদ্ তো তুই তারারে ন-দোরেচ্ বা তারারে দেগিনে ন-দোরেচ্।”
10তে মরে আরঅ কলঅ, “ও মান্জ্যর্ পুয়োবো, মুই তরে যেদক্কানি কধা কোম্ সিয়েনি তুই মন দিইনে শুন্ আর মনত্ থুবেই রাগা। 11তুই ইক্কিনে বন্দীদজাত্ থেইয়্যে তঅ দেজর্ মানুচ্চুনো ইধু যেইনে কধা কঅ। তারা শুনোদোক্ বা ন-শুনোদোক্, তুই তারা ইধু প্রভু লগেপ্রভুর কধা কবে।”
12সে পরেদি গোজেনর আত্মাগানে মরে তুলি নিলো, আর মুই মঅ পিজেদি জোরে কোইয়্যে এ কধাগান শুনিলুং, “লগেপ্রভুর থেবার্ জাগানত্ তার্ মহিমার বাঈনী ওক্।” 13মুই সেই জেদা পরাণবলাগুনোর এক্কো আর এক্কোর্ লগে ডুয়ো ঘজানার্ রঅ আর তারার্ কায়কুরে চাক্কাগুনোর্ রঅ অমকদ জোরে শুনিলুং। 14গোজেনর্ আত্মাগানে মরে তুলি নেযেবার্ অক্তত্ মুই মনে মনে কাঙেলেত্যে আর রাগ্কোই গেলুং, আর লগেপ্রভুর দরমর আঢ্তানি মঅ উগুরে এলঅ। 15যে বন্দীগুনে কবার গাঙ ইধু তেল-আবীবোত্ এলাক্ মুই তারা ইধু গেলুং। তারা যিয়েনত্ বজত্তি গুরিদাক্ মুই সিয়েনত্ তারা ভিদিরে সাত দিন সং আমক্ ওইনে বুয়োই রলুং।
ইস্রায়েলরে উজিয়ার গরানা
16সাত দিন বিদি যানার্ পরেদি লগেপ্রভুর এই কধাগান মইধু ফগদাং অলঅ, 17ও মান্জ্য পুয়োবো, ইস্রায়েলীয়গুনোত্তে মুই তরে চুগিদার্ বানেয়োং; সেনত্তে মুই যিয়েন কং সিয়েন তুই শুন্ আর মর্ ওইনে তারারে উজিয়ার গর্। 18মুই যেক্কে এক্কো পাজি মান্জ্যরে কং, তুই হামাক্কায় মুরিবে, সেক্কে তুই যুনি তারে উজিয়ার ন-গরচ্, বা তার্ পরাণান বাঁজেবাত্তে ভান্ন্যেই পধত্তুন্ ফিরেবাত্তে কিজু ন-কচ্, সালে সেই পাজি মানুচ্চোত্তে তার পাপত্তে মুরিবে, মাত্তর্ তার মরণত্তে মুই তরে দায়ী গুরিম। 19মাত্তর্ সে পাজি মানুচ্চোরে তুই উজিয়ার গুরিবার পরেদিয়ো যুনি তে তার্ পাজিগানত্তুন্ বা তার্ ভান্ন্যেই পধত্তুন্ ন-ফিরোন, সালে তার পাপত্তে তে মুরিবো; মাত্তর্ তুই নিজে রোক্ষ্যে পেবে।
20“আরঅ, যুনি কনঅ গম্ মানুচ্ তার ঠিগ্ পধত্তুন্ ফিরিনে ভান্ন্যেই কাম্ গরন আর মুই তা মুজুঙোত্ এক্কান দযা রাগাং, সালে তে মুরিবো। তুই তারে উজিয়ার ন-গরচ্ বিলি তে তার পাপত্তে মুরিবো। যেদক্কানি গম্ কাম তে গোজ্যে সিয়েনি আর ইদোত্ তুলো ন-অবঅ; মুই তরে তার্ মরণত্তে দায়ী গুরিম। 21মাত্তর্ পাপ ন-গুরিবাত্তে যুনি তুই সেই গম্ মানুচ্চুনোরে উজিয়ার গরচ্ আর তে পাপ ন-গরে সালে উজিয়ার অবার্ কধা শুনিবার ফলে তে হামাক্কায় বাঁজিবো আর তুইয়ো নিজোরে রোক্ষ্যে গুরিবে।”
22সিয়েনত্ লগেপ্রভুর্ খেমতাবলা আঢ্তানি মঅ উগুরে এলঅ আর তে মরে কলঅ, “তুই উদিনে কলগত্ যাহ্, সিদু মুই তঅ লগে কধা কোম্।” 23সেনত্তে মুই উদিনে কলগত্ গেলুং। কবার গাঙ পারত্ লগেপ্রভুর যে মহিমাগান দেখ্যং সেবাবোত্যে মহিমাগান্ সিয়েনত্ দেগিলুং; আর মুই মাঢা নিগিরি পড়িলুং।
24সেক্কে গোজেনর আত্মাগান মঅ ভিদিরে এইনে মরে তুলিনে টেঙ উগুরে থিয়্যেই দিলো। তে মরে কলঅ, “তুই তঅ ঘরত্ যেইনে দোরান্ বানিনে ভিদিরে থাগ্। 25ও মান্জ্য পুয়োবো, তরে দুড়িলোই বানা অবঅ; সেক্কে তুই বারেদি মানুচ্চুনো ভিদিরে যেই ন-পারিবে। 26তুই যেনে জুরো গুরি থাচ্ আর তারারে গেইল্ দি ন-পারচ্ সেনত্তে মুই তঅ জিলান্ তঅ মুয়ো তাল্লোত্ আক্সো দিম। ইস্রায়েলীয়গুনে দঅ এক্কো উল্লোমী জাদ্। 27মাত্তর্ মুই তঅ লগে কধা কবার সময় তঅ মুয়োন্ খুলি দিম্ আর তুই তারা ইধু প্রভু লগেপ্রভুর কধা কবে। তারা ভিদিরে যে শুনিবাত্তে চায় তে শুনোক্ আর যে শুনিবাত্তে ন-চায় তে ন-শুনোক্; তারা দঅ এক্কো উল্লোমী জাদ্।”
Currently Selected:
যিহিষ্কেল 3: CBT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 Bangladesh Bible Society
