যিহিষ্কেল 26
26
সোরর বিরুদ্ধে আগাম্ কধা
1আমার বন্দী থেবার এগার বজরত্ মাসর্ পত্তম দিনোত্ লগেপ্রভুর এ কধাগান মইধু ফগদাং অলঅ, 2ও মান্জ্যর্ পুয়োবো, যিরূশালেম পৌইদ্যেনে সোর হুজি ওইনে কোইয়্যেদে, বেশ্ ওইয়্যে, জাদ্তুনোর আজল্ গেইট্টো ভাঙি যেইয়্যে আর দোরানি মইধু পুরোপুরি খুলি যেইয়্যে; শঅরান্ ইক্কিনে ভস্ত ওইনে পুড়ি আঘে বিলিনে মর্ ভালেদি অবঅ। 3সেনত্তে মুই প্রভু লগেপ্রভু কঙর্, ও সোর, মুই তর্ বিপক্কে। সাগরে যেবাবোত্যে তার তুবোলুন্ উগুরে তুলোই সেবাবোত্যেগুরি মুই তঅ বিরুদ্ধে ভালোক্কুন্ জাদরে ডাগি আনিম। 4তারা সোরর্ দেবালান্ ভস্ত গুরিবাক্ আর অজল্ চুগিদার-ঘরানি ভাঙি ফেলেবাক্। মুই তার ধূল্যে-কজরানি ছাজি ফেলেইনে তারে পাত্তর ধোক্ক্যেন গুরি থোই দিম। 5সিয়েন সাগর বুগোত্ জাল্ শুগেবার্ জাগা অবঅ, কিত্তে মুই প্রভু লগেপ্রভু এ কধাগান কঙর্। তে জাদ্তুনোর লুদেয়্যে জিনিস অবঅ। 6তা অধীনোত্ উকূলে আদামানি যুদ্ধোর্ কারনে ভস্ত অবঅ। সেক্কে সিদুগোর্ মানুচ্চুনে হবর্ পেবাক্, মুয়ই লগেপ্রভু।
7ও সোর, মুই তঅ বিরুদ্ধে উত্তোরেদিত্তুন্ ঘোড়া, রথ, ঘোড়াচালেয়্যে আর দাঙর্ এক্কো সৈন্যদল সমারে রাজাগুনোর রাজা, অত্তাৎ বাবিলোর রাজা নবূখদ্নিৎসররে আনিম। 8তে যুদ্ধো গুরিনে তর্ আদামানি ভস্ত গুরিবো। তে তঅ বিরুদ্ধে এক্কো অজল্ কুড়্ বানেব আর তর্ দেবাল সমারে বাস্যে এক্কো তলেদি কুড়্ বানেব; তারা নিজোরে রোক্ষ্যে গুরিবাত্তে তারার্ বেক্ ঢালানি অজল্ গুরি ধুরিবাক্। 9তে দেবাল্ ভাঙিবার মেশিন্দোই তঅ দেবালানত্ আঘাত্ গুরিবো আর তা মেশিনান্দোই তর্ অজল্ চুগিদার ঘরানি ভস্ত গুরি ফেলেব। 10তার এদক্ বেশ্ ঘোড়া থেবাক্, সিগুনে তরে ধূল্যেলোই নাঢি দিবাক্। ভাঙা দেবাল ভিদিরেদি মান্জ্যে যেবাবোত্যে গুরি শঅরত্ সমন্ সেবাবোত্যেগুরি তে যেক্কে যুদ্ধোর ঘোড়া, গাড়ি আর রথ্তোই তর্ বেক গেইট্টুনো ইন্দি সোমেব সেক্কে তা রবুয়োলোই তর্ দেবালানি গির্গিরেব। 11তার ঘোড়াগুনোর টেঙ মুড়িলোই তর্ বেক্ পথ্তানি দুলি দিবো; তঅ মানুচ্চুনোরে তে মারে ফেলেব আর তর্ দরমর খুদোগুন মাদিত্ পুড়িবাক্। 12তারা তর্ ধন-সোম্বোত্তিগানি আর তর্ বেবসার জিনিসচানি লুদেবাক্; তারা তর্ দেবালান ভাঙি ফেলেবাক্, দোল্ দোল্ ঘরানি ভস্ত গুরি দিবাক্ আর তর্ পাত্তরুন, তক্তানি আর ধূল্যেনি সাগরত্ ফেলেই দিবাক্। 13মুই তর্ গান রবো থামেই দিম; বীণার বাজানাবোয়ো আর শুনো ন-যেবঅ। 14মুই তরে পাত্তর্ ধোক্ক্যেন গুরি রাগেম আর তুই অবে জাল্ শুগেবার জাগা। তরে আর বানা ন-অবঅ, কিত্যে মুই প্রভু লগেপ্রভু এ কধাগান কঙর্।
15ও সোর, তর্ পতনর্ রবোলোই, আহতগুনোর ফবানিলোই আর তঅ ভিদিরে যে মানুচ্চুনোরে মারে ফেলা অবঅ সেক্কে কি দূরোর্ দেজ্চানি গির্গিরে ন-উদিবো? 16সেক্কে সাগর পাড় দেজ্চানির রাজাগুনে তারার্ সিংহাসনত্তুন্ লামিনে তারার্ রাজপোশাক্ আর নক্সা গোজ্যে পোজাক্কানি খুলি ফেলেবাক্। অমকদ দরে তারা মাদিত্ বুজিবাক্, আমিঝে গির্গিরেবাক্ আর তরে দেগিনে আমক্ অবাক্। 17সেক্কে তারা তঅ পৌইদ্যেনে আবিলেচ্ গুরিনে কবাক্, ও নাঙ্-গোজ্যে শঅরান্, তুই কিবাবোত্যেগুরি ভস্ত ওই গেলে! তঅ মানুচ্চুনে দঅ সাগরত্ আদাউদো গুরিদাক্। সাগরত্ তুই আর তঅ আদাম্মেগুনে খেমতাবলা এলাক্; সাগর পারত্ যিগুনে বজত্তি গুরিদাক্ তারা বেক্কুনে তরে দোরেদাক্। 18ইক্কিনে তর্ পতনর্ দিনোত্ সাগর পাড় দেজ্চানি গির্গিরের; তর্ ভস্ত অনা দেগিনে সাগরর্ সংমোধ্যে দ্বিপ্পুন অমকদ দোরেয়োন।
19“ও সোর, মুই প্রভু লগেপ্রভু যেক্কে তরে মানুচ্ নেইয়্যে শঅর ধোক্ক্যেন গুরিম যিয়েনত্ কনজনে বজত্তি ন-গরন, যেক্কে সাগর পানিগান তঅ উগুরে আনিম আর তার পানি নাল্লো তরে নাঢি দিবো, 20সেক্কেনে মুই তরে মরণ জাগাত যেইয়্যে মানুচ্চুনো সমারে পুরোনা দিনো মানুচ্চুনো ইধু তলে লামেই দিম। মুই তরে পিত্থিমীর গভীনোত্ পুরোনা দিনোর ভস্তওইয়্যে জাগানর সংমোধ্যে মরণ জাগাত্ যেইয়্যে মানুচ্চুনো সমারে বজত্তি গোরেম। তঅ ভিদিরে আর কনজনে বজত্তি ন-গুরিবাক্ আর জেদাগুনো দেজত্ তর্ জাগা ন-অবঅ। 21মুই তরে দর্গরেপারা শেজ্ গুরি দিম্; তুই আর ন-থেবে। মানুচ্চুনে তরে তোগেবাক্ মাত্তর্ তরে আর কনদিনঅ পাহ্ ন-যেবঅ। মুই প্রভু লগেপ্রভু এ কধাগান কঙর্।”
Currently Selected:
যিহিষ্কেল 26: CBT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 Bangladesh Bible Society
