যিহিষ্কেল 25
25
অম্মোনর বিরুদ্ধে আগাম্ কধা
1পরেদি লগেপ্রভু মরে কলঅ, 2“ও মান্জ্যর পুয়োবো, অম্মোনীয়গুনো ইন্দি তর্ মুয়োন রাগেইনে তারা বিরুদ্ধে আগাম্ কধা কঅ। 3প্রভু লগেপ্রভুর এ কধাগান তারারে শুনিবাত্তে কঅ, ‘মঅ ঘরান অসিজি অদে দেগিনে আর ইস্রায়েল দেজ্ছানরে উগুজ্যে ভূই অদে দেগিনে আর যিহূদার মানুচ্চুনোরে বন্দী ইজেবে নেযাদে দেগিনে তুমি বেশ্ হুজি ওইয়ো। 4সেনত্তে মুই পুগেদি দেজর্ মানুচ্চুনো আঢত্ তমারে তুলি দিম। তারা তমা দেজত্ তারারে তাম্বুল টাঙেইনে তমা ভিদিরে বজত্তি গুরিবাক্; তারা তমাত্তুন্ ফল আর দুধ হেবাক্। 5মুই রব্বা শঅরানরে উট রাগেবার জাগা আর অম্মোন দেজছানরে ভেড়া জিরেবার জাগা বানেম। সেক্কে তুমি হবর্ পেবা, মুয়ই লগেপ্রভু। 6তুমি ইস্রায়েল দেজর্ অবস্থা দেগিনে আত্তালি দুয়ো, নাচ্চ্য আর মনত্তুন্ তারে ইংসে গুরিনে ফুত্তি গোজ্য। 7সেনত্তে তমা বিরুদ্ধে মুই মঅ আঢ্তানি বাড়েম্ আর লুদেয়্যে মাল্ ইজেবে অন্য জাদ আঢত্ তমারে তুলি দিম। অন্য জাদ আর দেজ ভিদিরেত্তুন্ মুই তমারে সুলিনে ভস্ত গুরি দিম। সেক্কে তুমি হবর্ পেবা, মুয়ই লগেপ্রভু।’”
মোয়াব বিরুদ্ধে আগাম্ কধা
8পরেদি প্রভু লগেপ্রভু কোইয়্যেদে, “মোয়াব আর সেয়ীরে কত্তে, ‘চাহ্, যিহূদার মানুচ্চুনে অন্য বেক্ জাদ্তুনো ধোক্ক্যেন ওই যেইয়োন।’ 9সেনত্তে মুই মোয়াবর এক কিত্তেন্দি দুযিগান খুলি দিম্। সেক্কে মোয়াবর বাঈনী গরেদে শঅরান বৈৎ-যিশীমোৎ, বাল্-মিয়োন আর কিরিয়াথয়িমরে আক্রমণ গরা অবঅ। 10-11মুই অম্মোনীয়গুনো সমারে মোয়াবরেয়ো পূগেদি দেজ মানুচ্চুনো আঢত্ তুলি দিম যেনে জাদ্তুনো ভিদিরে অম্মোনীয়গুনোর কধা মান্জ্যে ভুলি যান আর মোয়াবেয়ো সাজা পায়। সেক্কে তারা হবর্ পেবাক্, মুয়ই লগেপ্রভু।”
ইদোমর্ বিরুদ্ধে আগাম্ কধা
12পরেদি প্রভু লগেপ্রভু কোইয়্যেদে, “ইদোম যিহূদার মানুচ্চুনো উগুরে বার্বার হেনা সুজিনে অমকদ অন্যেয় গোজ্যে। 13সেনত্তে মুই প্রভু লগেপ্রভু কঙর্, ইদোম বিরুদ্ধে মুই মঅ আঢ্তানি বাড়েম আর সিদুগোর্ বেক মানুচ্চুন আর এ্যামানুন্ মারে ফেলেম। মুই সিয়েন ভস্তর্ জাগা গুরি রাগেম আর তৈমনত্তুন্ দদান সং মান্জ্যে যুদ্ধোত্ মুড়িবাক্। 14মুই মঅ মানুচ্ ইস্রায়েলর আঢ্তোই ইদোম উগুরে হেনা সুজিম্ আর তারা মর্ অমকদ বেজারে আহ্ রাগে ইদোম বিরুদ্ধে কাম গুরিবাক্। সেক্কে তারা হবর্ পেবাক্, মুই হেনা সুজ্চ্যং।”
পলেষ্টীয়ার বিরুদ্ধে আগাম্ কধা
15পরেদি প্রভু লগেপ্রভু কলঅ, “পলেষ্টীয়গুনে ইংসের মনভাব্পোই যিহূদা উগুরে হেনা সুজ্চ্যন্; তারা পুরোনা শত্রুতার মনভাবপোই যিহূদারে ভস্ত গুরিবাত্তে চেইয়োন। 16সেনত্তে মুই প্রভু লগেপ্রভু কঙর্, ‘পলেষ্টীয়ার বিরুদ্ধে মুই মঅ আঢ্তানি বাড়েম্; মুই করেথীয়গুনোরে কাবি ফেলেম আর সাগর পার সং বাদ্বাগি মানুচ্চুনোরে ভস্ত গুরিম। 17মুই তারা উগুরে জদবদে হেনা সুজিবাত্তে মর্ রাগে তারারে সাজা দিম। মুই যেক্কে তারা উগুরে হেনা সুজিম সেক্কে তারা হবর্ পেবাক, মুয়ই লগেপ্রভু।’”
Currently Selected:
যিহিষ্কেল 25: CBT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 Bangladesh Bible Society
