যিহিষ্কেল 1
1
যিহিষ্কেলর দর্শন পানা
1ত্রিশ বজরর্ চের্ মাজর্ পাচ্ দিনোত্ মুই যেক্কে কবার গাঙ পারত্ বন্দীগুনো ভিদিরে এলুং সেক্কে আগাজ্চান খুলি গেলঅ আর মুই গোজেনর দর্শন পেলুং। 2সে সময়ান এলদে রাজা যিহোয়াখীনোর বন্দী অবার্ পাচ্ বজরত্। 3বাবিলীয়গুনোর্ দেজত্ কবার গাঙ পাড়ত্ বুষির পুয়ো ধর্মগুরু যিহিষ্কেল ইধু, অত্তাৎ মইধু লগেপ্রভুর কধানি ফগদাং অলঅ। সিয়েনত্ লগেপ্রভুর আঢ্তানি মঅ উগুরে এলঅ।
4মুই রিনি চেইনে দেগিলুং উত্তোরেত্তুন্ এক্কান তুট্যে বোইয়্যের্ এজের্, এক্কান দাঙর্ মেঘ ভিদিরে ঝিমিলের্ আর চেরোকিত্তেদি পোত্পোত্যে পহ্রে ঘিজ্যে। সে ঝিমিলেনিগান সংমোধ্যে দোগ্দোক্যে ধাতু ধোক্ক্যেন কিজু ঝিমিত্ ঝিমিত্ গরের্। 5সিয়েনত্ চের্বো জেদা প্রাণি ধোক্ক্যেন কিজু দেগা গেলঅ। তারার্ চেঙেরাগান চাদে মান্জ্য ধোক্ক্যেন্ এলঅ, 6মাত্তর্ বেক্কুনোর্ চেরান্ গুরিনে মু আর চেরান্ গুরি ডুয়ো এলঅ। 7তারার্ টেঙানি এলদে উজু আর টেঙ পাদানি গোরুছর্ টেঙ মুরি ধোক্ক্যেন্; সিগুন পালিশ গোজ্যে পিদল ধোক্ক্যেন্ চোক্চোক্ক্যে। 8তারার্ চেরোকিত্তে ডুয়োনি তলে মান্জ্য ধোক্ক্যেন আঢ্ এলঅ। তারার্ পত্তিজনর্ মুয়োত্ আর ডুয়ো এলঅ, 9আর তারার্ ডুয়োনি এক্কান সমারে আরেক্কান বাস্যে এলঅ। তারা পত্তিজনে সোজা উজেই যেদাক্, যেবার্ সময় ন-ফিরিদাক্।
10তারার্ মুয়োনি চাদে এলদে এবাবোত্যে-তারার্ চের্জনর এক্কানত্ দরে মান্জ্যর্ মু এলঅ আর পত্তিজনর্ মুয়োনি ডেনেদি সিংহ ধোক্ক্যেন্, বাঙেদি গোরু ধোক্ক্যেন আর পত্তিজনর্ এক্কান গুরি ঈগল ধোক্ক্যেন্ মু এলঅ। 11তারার্ মুয়োনি এবাবোত্যে এলঅ।
তারার ডুয়োগানি উগুরেদি মিলি দিয়্যে এলঅ; পত্তিজনর্ দ্বিয়েন ডুয়ো তা দ্বি কিত্তেদি প্রাণিগুনোর্ ডুয়োনি বাস্যে এলঅ, আর দ্বিয়েন ডুয়োলোই কিয়্যেগান ঢাক্যে এলঅ। 12তারা পত্তিজনে তারার্ মু অনুসারে চেরোকিত্তে উজেই যেই পারিদাক্। সেই জেদা প্রাণিগুনোর্ আত্মাগানি যিন্দি যেদঅ তারা সিন্দি যেদাক্, যেবার সময় ন-ফিরিদাক্। 13এ জেদা প্রাণিগুনো ভিদিরে জোল্জোল্যে আঙারা বা বম্বা ধোক্ক্যেন্ আগুন জলের্ আর সিয়েন সে প্রাণিগুনো ভিদিরে এজের্-যার্; সে আগুনান্ দোগ্দোক্যে আর সিয়েন ভিদিরেত্তুন্ ঝিমিলেনিগান্ নিগিলি এজের্। 14প্রাণীগুন ঝিমিলেনি ধোক্ক্যেনগুরি এজানা-যানা গরদন্।
15সেই জেদা পরাণবলাগুনো ইন্দি রিনি চেইনে মুই দেগিলুং চের্বো প্রাণীর্ পত্তিবোর্ কায়কুরে মাদিত্ এক্কো গুরি চাক্কা আঘে। 16সেই চাক্কাগুনোর্ সাইজ্চান আর গঠনান্ এবাবোত্যে এলঅ-সিগুন বৈদূর্যমণি ধোক্ক্যেন ঝিমিত্ ঝিমিত্ গরের্ আর সেই চের্বো চাক্কা রিনি চাদে এক বাবোত্যে এলঅ। এক্কো চাক্কা ভিদিরে যেন আর এক্কো চাক্কা এবাবোত্যেগুরি পত্তি চাক্কা বানেয়্যে এলঅ। 17চাক্কাগুন্ যেক্কে চলিদাক্ সেক্কে সে প্রাণিগুনোর্ চেরোকিত্তে যে কনঅ ইন্দি উজু গুরি চলিদাক্; চলিবার সময় চাক্কাগুন ন-ফিরিদাক্। 18সেই চাক্কাগুন এলাক্ অমকদ দাঙর্ আর দর্গরেপারা আহ্ চের্বো চাক্কার্ চেরোকিত্তেদি চোখ্ এলাক্।
19জেদা প্রাণিগুন চলিবার সময় তারার্ কায়কুরে চাক্কাগুন্অ চলিদাক্; প্রাণিগুন মাদিত্তুন্ উদিলে পরেদি চাক্কাগুন্অ উদিদাক্। 20প্রাণিগুনোর্ আত্মাগানি যেক্কে যিন্দি যেদঅ চাক্কাগুন্অ তা সমারে সমারে যেদাক্; কিত্তেই সেই জেদা প্রাণিগুনোর্ আত্মাগানি সেই চাক্কাগুনো ভিদিরে এলঅ। 21প্রাণিগুন আঢিলে চাক্কাগুন্অ চলিদাক্; প্রাণিগুন থির্ ওইনে থিয়্যেলে চাক্কাগুন্অ থির্ ওইনে থিয়্যেদাক্; আরঅ প্রাণিগুন মাদিত্তুন্ উদিলে চাক্কাগুন্অ তারার লগে লগে উদিদাক্, কিত্যেই সেই জেদা প্রাণিগুনোর্ আত্মাগানি চাক্কাগুনো ভিদিরে এলঅ।
22সেই জেদা প্রাণিগুনোর্ মাঢা উগুরে কিজু এক্কান বিজেয়্যে এলঅ; সিয়েন বরফ ধোক্ক্যেন ঝিমিত্ ঝিমিত্ গরের্ আর দর্গরেপারা এলঅ। 23সিয়েন তলেদি তারার্ ডুয়োনি মেল্যে এলঅ আর একজনর্ ডুয়ো অন্যজনর্ ডুয়োনিত্ বাস্যে এলঅ। অন্য দ্বিয়েন ডুয়োলোই পত্তিজনর্ কিয়্যেনি ঢাক্যা এলঅ। 24প্রাণিগুন আঢিলে পরেদি মুই তারার্ ডুয়োগানির্ রঅ শুনিদুং; সিয়েনি এলদে বান পানি গঙার রঅ ধোক্ক্যেন, বেগত্তুন্ খেমতাবলাবোর্ রবো ধোক্ক্যেন, এক্কো সৈন্যদলর্ কোল্বাজেয়্যে ধোক্ক্যেন। প্রাণিগুন থির্ ওইনে থিয়্যেলে পরেদি তারা তারার্ ডুয়োগানি বুদি নেযেদাক্।
25যেক্কে তারা ডুয়োগানি বুদিনে থিয়্যেই এলাক্ সেক্কে তারার্ মাঢা উগুরে সেই জাগায়ান উগুরেত্তুন্ এক্কো রঅ শুনো গেলঅ। 26সিয়েনত্ নীলকান্তমণির সিংহাসন ধোক্ক্যেন কিজু এক্কান দেগা গেলঅ। সেই অজলত্ থেইয়্যে সিংহাসন উগুরে মান্জ্য সাইজো ধোক্ক্যেন একজনরে দেগা গেলঅ। 27মুই দেগিলুং ফারত্তুন্ ধুরি উগুরে সং তে চাদে এলদে দোগ্দোক্ক্যা ধাতু ধোক্ক্যেন, যেন সিবে আগুনে ভরা, আর ফারত্তুন্ ধুরি তলে সং তারে আগুনো ধোক্ক্যেন রিনি চাদে লাগের্; তা চেরোকিত্তে এলদে দোগ্দোক্ক্যা পহ্র। 28ঝড় দিনোত্ মেঘ ভিদিরে রান্জোনি ধোক্ক্যেন তা চেরোকিত্তে সেই পহ্রান্ দেগা যার্।
যিয়েন দেগা গেলঅ সিয়েন এলদে লগেপ্রভুর মহিমা ধোক্ক্যেন্। মুই সিয়েন দেগিনে মাদিত্ মাঢা নিগিরি পড়িলুং আর একজনরে কধা কদে শুনিলুং।
Currently Selected:
যিহিষ্কেল 1: CBT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 Bangladesh Bible Society
