Ghlɔɔmö a ‑nʋa 9

Ngëyii Lagɔ ‑sɛɛ ‑lɛ a wɛlɩɩ

1Wɛlɩɩ n 'kää dɛ'ɛ bhïlaa, na ‑lowli Zezwii Kliisɩ a'bhë, ɔ ‑yi sɛ nɩɩ, n'n‑ä yio ‑kä, ‑maa ‑tiawɛlɩɛ, 'n 'Wugɔmʋʋ 'Wlɩlɩ ‑ɔ bhïlanɩɛ ‑mä na dlɩ zɛmöö, ɔ zʋ wɛlɩ nɩ kɛ ‑gömö. 2-3N nɛ naa, na 'bhɩa Zwiiföwaa, n ‑kʋä dlɩ 'wʋ 'pää, dlɩɩ ylinɩɩɛ 'mlɩ, wa ngäzɩ n wiɛ. 'N ɛ ‑kä a nɩɩ Lagɔ ‑kaa bhätlɩnɩ, ɔ 'kä gbä n tɩa'a Kliisɩ a ‑nɔ glɩnɩ, nzɩɩ wa 'käa 'pʋ a za‑a, n yi a 'wʋ nglu. 4Ɛ'ɛ ‑bhö nyɩasɛ, ‑maa Yizlaɛlɩ 'a ngëyii Lagɔ ‑sɛɛ ‑lɛ wa 'kä ɔ 'yuë 'zʋʋ, 'mö wa glɩnɩɛ, 'mö ɔ tulanɩɛ 'ɔ 'ghïlinɔɔ 'ylimö. 'Mö ɔ ‑nyɛ mɛnɩnɩɛ, 'n ɔ yuëë 'ɔ Gböö kɛ 'klʋ kälɩnɩ. ‑Mä wa jijo'wʋ, ‑mä Lagɔbudu 'Kɔdʋʋ ‑wʋä, wa 'kä ‑mä Lagɔ bʋbɔnɩ. 'Saa 'wuë ɔ 'kä a‑a bhäla nʋʋ, Zwiiföwaa 'mö ɔ 'nyɩ a‑a. 5Bhla'mö a Lagɔnɩkpa 'kädɩɩ, wa 'yuë a 'yuë wa glɩnɩɛ. Kliisɩ, Puënyɔ Lagɔ ‑sɛɛ ‑lɛ a'bhë, ‑ɔ 'kämanɩɛ ‑lii 'wuë ‑gömöö, 'ɔ nɩkpɛglɩnɩsaa 'mö a dɔ'wʋ, ‑mä 'wa ngëyii 'mö ‑mä ɔ 'bhöönɩɛ. Nɩkpa 'wuë nɩ 'ghlimanɩ 'kwädlɩkwädlɩnɩ Lagɔ a 'nglɩ. ‑Amɛɛ!

6Yɩ 'wuë 'mö a dɔ'wʋ, wɛlɩɩ 'wuë Lagɔ bhïlaa Yizlaɛlɩ 'a ngëyii ɔ ‑sɛɛ ‑lɛ a dɛɛ, yɩ 'naa 'kä ‑gbɔgbɔ 'wʋ tʋʋ 'lɩlɩlɩ. ‑Maa 'ɔ ngëyi 'la 'mö a ‑nʋa, wa 'wuë mʋa 'nɩɛ ‑sɩbhä ‑tiamö ɔ ‑nʋä glɩnɩ. 7Sɛɛ Ablaamö a 'yuë gwëluëë cuu, ‑sɩbhä ma‑a 'nɩɛ 'nglɩ ‑kä wa 'kä ‑tiamö Ablaamö a 'yuë glɩnɩ. Ɛ'ɛ ‑bhö nyɩasɛ, ‑maa sɛ'ɛ Lagɔ a'bhë 'nyɛ a‑a Ablaamö 'dɩ nɩɩ: ‑Na 'yuë a 'yuë ‑wa 'kää Yizaakö 'mö 'bhöönɩɩ, wa 'yize cuu, mʋa glɩnɩɛ yuëa n gbä a‑a n ‑yimö 'nyɛɛ.#9.7 Zenɛɛzɩ 21.12.

8Wɛlɩ 'la mɩɩ sɛɛ zɛmö nɩɩ, ‑n ‑kä Ablaamö a 'yu a 'yu glɩnɩ a 'yize mɩɩ 'nɩɛ 'nglɩ ‑kä ‑n 'kä Lagɔ a 'yu glɩnɩ klɩpaa. ‑Maa ‑muë Lagɔ a'bhë gbä a‑a ɔ yo 'nyɛɛ, mʋa glɩnɩɛ 'ɔ ‑tiamö a ngëyii. 9Yizaakö a'bhë, wa 'kɔɔ gwälɩɛ yii, sɛ'ɛ Lagɔ 'nyɛ a‑a 'kɩ Ablaamö 'dɩ nɩɩ: 'Tɛnyɩ ‑a ‑wʋä dɛ'ɛ 'möö, 'ylʋba ‑mä'la ‑kä ‑lɛ ghlɛ, n 'kä mö'ɛ 'wʋ 'sɔ yinɩɛɛ, ‑na 'lɛnglɛ Salaa, ɔ yi nyɩbhɛlʋyu ‑su.#9.9 Zenɛɛzɩ 18.10,14.

10Wɛlɩɩ n 'bhööä da'a bhïlaa, ɛ'ɛ ‑bhö yɩ 'yize. ‑Maa ‑sɩbhä yɩ 'plɩmöä ‑aa dɩba 'kɔdɔ Yizaakö 'lɛnglɛ Ghlebekaa a dɛ 'wʋ. 'Ɔ yuëa 'sɔ ‑kpɔ, Yizaakö mɔɔ gwëluëë. 11Dɛɛ Lagɔ 'nyɛɛ sa'a Ghlebekaa 'dɩɩ, ‑lɛ a 'tɛnyɩ 'mö a dɔ'wʋ, yuëa 'sɔ ‑kpɔ, wa'aa ‑bhlɛ 'pɩwʋ yi zaa, wa gla'mö a ‑nɔ ‑bhlʋ a'bhë 'nɩɛ a ‑bhlɛ tɛkäsɛ ‑li a ‑li nʋ, 'n ɛ 'kä'ɛ ‑lizokuu. Zaa, ‑mɔ Lagɔ 'yɩbhää, ɔ ‑kɔɔ ‑lɛ ‑sɛɛ, ‑aaa bhɛnɩ ‑a 'kä nɩɩ, Lagɔ ‑bi ɔ kää nʋ. 12‑Sɩbhä a za, Ghlebekaa 'nɩɛ ‑bhlɛ ‑sɩbhä 'bhöö a'bhë, 'n ɔ yoo 'dɩ 'nyɛ nɩɩ: Yuëa 'sɔ ‑kpɔ ‑n 'kää gwälɩ a dɔ'wʋ, Ezawii ‑ɔ glɩnɩɛ 'kɔdɔɔ, mɔɔ 'kää Zakɔɔbö ‑ɔ glɩnɩɛ 'tikëyi zɛmö ‑wʋ.#9.12 Zenɛɛzɩ 25.23. 13Ɛ'ɛ ‑bhö nyɩasɛ, ‑maa wa 'sɔ ‑kpɔ a dɛ, sɛ'ɛ Lagɔ gbää nɩɩ: Zakɔɔbö 'mö n ‑sɛ a‑a ‑lɛ 'kɩ. ‑Maa Ezawii ɔbhlɩ, 'mö n ‑sɛ a‑a nimï.#9.13 Malasii 1.2‑3.

14Zaa, yɩ ‑kä sa'a ‑wʋʋ, sɛ'ɛ yɩ sɛ bhä zɛmö nɩɩ, Lagɔ ‑bi ɔ kä ‑a? N'nn ɛ'ɛ ‑bhö ‑sɩbhä ma 'lɩlɩlɩ. 15Lagɔ a'bhë, sɛ'ɛ ɔ 'nyɛɛ Moyizɩ 'dɩ nɩɩ: ‑Amö Lagɔ, ‑mɔnyɩ ngäzɩdlɩ n ‑kä 'yɩbhä n 'kä pää, ɔ ngäzɩdlɩ n pää, ‑mɔnyɩ dɔ'wʋ n ‑kä 'yɩbhä n 'kä kɛ ‑gää, ɔ dɔ'wʋ n ‑gää kɛɛ.#9.15 Ɛzoodɩ 33.19. 16Miɛ nɩɩ, Lagɔ 'kä nɩkpɛ a ngäzɩdlɩ 'pä a dɔ'wʋ, ɔnyɩgäsɛ 'a 'saa ɔ 'yɩbhää 'kɩ 'ɔ ngäzɩdlɩ a za‑a, mɩɩ kää 'nglɩ cuu, ‑maa ɛ'ɛ ‑bhö nɩɩ, sɛɛ nɩkpɛ 'yɩbhää ‑sɩbhä a za, ɛ'ɛ ‑bhö'ɛ 'ɔ nʋnʋlii a za. 17‑Mä Lagɔbɔgʋʋ 'mö a 'kïbhë ‑bhlʋ 'mö, Ezipötɩ a 'bhlɩlowli 'kɔdɔɔ, 'mö Lagɔ 'nyɛɛ 'dɩ nɩɩ: N 'kä ‑mä ‑na ‑gömö 'na 'mötɛɛnɔɔ 'yli 'wälanɩ, ‑mä 'bhlɩbhëa 'wuë ‑gömö 'na nglɩɩ 'kä ‑mä mlɩmanɩ, nza n zʋʋmöä ‑lɛ.#9.17 Ɛzoodɩ 9.16. 18‑Sɩbhä Lagɔ 'nyɔɔ 'dɩ. Nza n gbää nɩɩ, ‑mɔnyɩ ngäzɩdlɩ ɔ yɩbhää ɔ 'kä 'pää, ɔ ngäzɩdlɩ ɔ pää, ‑mɔnyɩ dlɩ ɔ yɩbhää ɔ 'kä 'mö 'tumanɩ, 'mö ɔ 'tumanɩɛ 'mö.

Lagɔ 'a klɛɛ ‑nyɛ 'ɔ ngäzɩdlɩɩ 'sɔ a wɛlɩɩ

19Yɩ ‑kä sa'a 'mö ‑wʋʋ, sɛ'ɛ ‑mumuë 'kää ‑kamä nɩɩ: Zaa, sɛ yɩ ‑wʋ bhä 'n Lagɔ kwä bhä nɩkpa nuë 'wʋ 'nɩ? Ɛ'ɛ ‑bhö nyɩasɛ, ‑maa Lagɔ a'bhë, ɔ ‑kä nɩɩ, sɛ'ɛ yɩ 'kää 'mö ‑wʋ nʋ 'wëë, ‑ɔ bhɛnɩ bhä ɔ 'kä nɩɩ, yɩ nɩ tɩ ‑sɩbhä 'mö ‑wʋ nʋ 'nɩ? 20‑Na'a sɛ ‑n nʋä da'a a za, nza n yɩbhamöä dɛ'ɛ nimï nɩɩ, ‑abhʋa nɩkpa ‑nyɛ Lagɔ 'sɔ a dɔ'wʋ, 'saa ‑a glɩnɩ bhä, a‑a 'kä sa'a ɔ dɛ bhïla nɩɩ, ɔ wɛlɩɩ 'nɩɛ nɛnɩ 'nɩ? ‑Dɔkɔ wa ma‑a, wʋ yi bhä 'wʋ manyɔɔ nimï 'yɩbhä nɩɩ, 'saa bhä n‑n ‑yii sɛ'ɛ ma 'nɩ? 21Masɛyinyɔ ‑kä 'ɔ makwëa 'wʋ 'libhïï, 'saa ɔ ‑kä 'yɩbhä 'mö ɔ ma‑a. Ɔ ‑kä ‑balaki 'yɩbhää, 'mö ɔ ma‑a, ɔ ‑kä ‑kokli 'yɩbhää, 'mö ɔ ma‑a.

22'Lɩlɩlɩ a dɔ'wʋ, nɩkpa ‑mumuë ‑wa pälaa Lagɔ 'klɛ 'mö tenyii, ɔ kä a ɔ 'kä 'ɔ klɛɛ ‑nyɛ 'ɔ 'mötɛɛnɔɔ 'sɔ ‑mä wa ‑gömö 'yli 'wälanɩ, ɔ 'kʋä 'yli bhɩa cuu. ‑Maa wa dɔ'wʋ dlɩ 'mö ɔ ‑kpamanɩɛ tenyii, nza ɔ 'nuëë ‑bhlɛ 'yli bhɩa. 23‑Mumuë ‑wʋ'ɛ ‑lɛ, wa ngäzɩdlɩ ɔ 'pää, 'ɔ 'ghïlinɔɔ ‑wʋʋä ‑sɩbhä a sɛ ‑wʋ, ɔ 'kʋ ‑mä wa ‑gömö 'yli 'wälanɩ a za, nza ɔ ‑sʋʋä ‑lɛ 'kɩ. 24Nɩkpa 'la, ‑abhʋaa, ‑abhʋa Lagɔ ‑sɛɛ ‑lɛ. Zwiiföwaa a 'yize gla'mö, ‑mä ɔ 'nɩɛ nɩkpa ‑sɛ, ‑maa ‑mä ‑waaa Zwiiföwa glɩnɩ gla'mö kökä. 25Lagɔ a'bhë, sɛ'ɛ ɔ bhïlanɩ a‑a 'ɔ nɩkpɛɛ Ozee 'mö nɩɩ:

Nɩkpa a ‑muë, ‑waa a‑a 'kɩ 'na ngëyii n ‑sɛɛ ‑lɛ 'mö a ‑nʋä glɩnɩɩ,

n yuë 'na ngëyii 'mö a nɩkpa 'wʋ 'zʋa.

‑Muë n'n a‑a ‑lɛ ‑sɛɛ, n yuë na ‑wawayuë la. # 9.25 Ozee 2.25.

26 Bhlɩ ‑ɛnyɩɩ ‑gömö a ‑nʋä, ‑wanyɩ dɛ n nʋ a‑a nɩɩ:

«Wa'aa 'na ngëyi n ‑sɛɛ ‑lɛ 'mö a ‑nʋä glɩnɩɩ»,

‑mä a nɩkpa 'la ‑bhʋlʋ ‑kpɔ, ‑amö Lagɔ ‑ɔ ‑bhölɩ,

n yuë na 'yuë la. # 9.26 Ozee 2.1.

27‑Maa Yizlaɛlɩ 'a ngëyii 'mö a ‑nʋa a dɔ'wʋ, sɛ'ɛ Ezayii 'pä a‑a wɛlɩ nɩɩ:

Yizlaɛlɩ‑bhölɩɩ 'mö a nɩkpaa,

wa yi gïnyɛ yɔwʋ a bʋsɛ a sɛ 'wʋ ‑di ‑kë, ‑sɩbhä yɩ ‑wʋ 'mö,

‑maa wa gla'mö a 'yɛyayie a 'yize, mʋa 'kää 'pʋ.

28 Ɛ'ɛ ‑bhö nyɩasɛ, ‑maa wɛlɩɩ ‑Alowli bhïla a‑a,

yɩ 'wuë, ɔ 'kɩ mä'ä dʋdʋkpäta 'wʋ 'yli wälanɩ a dɔ'wʋ,

ɔ 'naa 'kä bʋanɩ 'lɩlɩlɩ. # 9.27‑28 Ezayii 10.22‑23.

29Ezayii ‑bhʋlʋ ‑kpɔ 'la, sɛ'ɛ ɔ nʋ a 'yɛɛ nɩɩ:

‑Alowli Lagɔ ‑ɔ 'tɛɛ 'mö, ‑ɔ 'kämanɩɛ pɩwʋ 'wuë ‑gömöö,

'n ɔ 'nɩ a 'nglɩ ‑kä, ‑a 'kä 'yuë 'pɩwʋ tɩɩ,

Sodɔɔmö a ‑glɔɔ, wʋ ‑nyɛ Gomɔɔlʋ a ‑glɔɔ 'sɔ a saa,

sɩbhä ‑a 'kä a‑a 'yli bhɩɛ 'lɩlɩlɩ. # 9.29 Ezayii 1.9.

Gböö mɩɩ 'nɩɛ nɩkpɛ 'mö zlɔmanɩ Lagɔ a 'yila 'klʋ a dɔ'wʋ

30Zaa, yɩ 'wuë 'mö a dɔ'wʋ sɛ ‑a 'kä bhä gbä? Nɩkpa ‑waaa Zwiiföwa glɩnɩ, ‑waa tɛlɩ a‑a sɛ Lagɔ a 'yila 'klʋ a dɔ'wʋ wa 'kä 'mö zlɔnɩɩ, 'wa dlɩtɛɛnɩtɛnɛɛ a za, 'mö Lagɔ 'zʋa ɔ 'yila 'klʋ a dɔ'wʋ 'mözlɔnɩwa 'wʋ. 31‑Maa Yizlaɛlɩ 'a ngëyii 'mö a ‑nʋa ‑wa ylɔ a‑a 'kwädlɩ, wa 'kä Lagɔ 'a Gböö 'klʋkpamö zʋ, wa 'kä 'mö zlɔmanɩ Lagɔ a 'yila 'klʋ a dɔ'wʋʋ, wa'aa bhɛmanɩ. 32'Saa kä bhä 'nglɩ? Wa'aa 'yɩbhä wa 'kä 'mözlɔmanɔ ‑mä dlɩ'wʋkänɔ 'mö sɛ tɛlɩnɩ. ‑Maa ‑mä wa'bhï 'a nʋnʋlii 'mö, ‑mä wa tɛlɩnuuä sɛ, nza wa gozoo kpiyii ‑ɛ bhlɩɛ nɩkpa sɛ. 33Sɛ'ɛ yɩ cɛlɩ a‑a 'kɩ Zezwii a dɛ ‑mä Lagɔbɔgʋʋ 'mö nɩɩ, Lagɔ lɛ naa:

A yɩɛ, ‑mä Siɔɔ, #9.33 Siɔɔ: Wa ‑kä Siɔɔ nʋʋ, Zeluzalɛɛmö a ‑glɔɔ 'mö wa gaaa.

‑mä n 'zʋä gozogozokpiyi #9.33 gozogozokpiyi: Wa ‑kä gozogozokpiyi nʋʋ, Zezwii Kliisɩ 'mö wa gaaa. glu,

kpiyii ‑ɛ bhlɩɛ nɩkpa sɛ.

'N nɩkpɛ ‑kɔɔ dlɩ 'wʋ ‑kää, zʋ 'naa 'kɔ 'lɩbhä. #9.33 Ezayii 28.16.

Currently Selected:

Ghlɔɔmö a ‑nʋa 9: bet

Highlight

Copy

Compare