Nʋnʋlii 14

Pɔɔlʋ ‑nyɛ Banabasɩ 'sɔ wa yɛ ‑mä Yikoniɔmö Lagɔwɛlɩɩ bhïlanɩ

1Pɔɔlʋ ‑nyɛ Banabasɩ 'sɔ, wa ghlɛɛ ‑mä Yikoniɔmö, 'n wa yiɛ ‑mä a Zwiiföwaa a Lagɔbuduu 'mö mö, 'n wa yiɛ ‑mä Lagɔwɛlɩɩ bhïlanɩ. ‑Maa sɛ wa bhïliiɛ a dɔ'wʋ, nɩkpa 'kɔkɔmlɛ, Zwiiföwa plɛ, ‑waaa Zwiiföwa glɩnɩ plɛ, 'n wa yiɛ 'wʋ nglu 'n wa yiɛ Zezwii a ‑nʋä 'zʋ. 2‑Maa Zwiiföwaa ‑muë 'nɩɛ 'yɩbhä wa 'kä Zezwii 'a wɛlɩɩ 'wʋ ngluu, ‑waaa Zwiiföwa glɩnɩ a dilaa 'mö wa 'pää ghäyɩ, wa 'kä Pɔɔlʋwa a dɛ 'zokwësɛ dlɩ 'pä. 3‑Maa ‑sɩbhä yɩ ‑wʋ 'mö, Pɔɔlʋ ‑nyɛ Banabasɩ 'sɔ wa gwälɛ ‑mä ‑glɔ 'la 'mö 'tɩɩ. Wa 'tɛɛnɩ Lagɔ dlɩ, 'n wa bhïlaa gbëaa sɛɛ Lagɔ ‑gää kɛ 'n ɔ ‑waa tenyii nɩkpɛ a wɛlɩɩ. Wa ‑kä Lagɔ 'a wɛlɩɩ bhïlaa, ɔ'bhë mɔɔ zʋä 'wa wɛlɩɩ kɛ ‑gömö 'n wa bhɛɛ zɩzɛli a ‑bɛ. 4Yɩ 'plɩɛ sa'a 'wʋʋ, 'n ‑glɔɔ yiɛ 'mö dilonɩ. Zwiiföwaa ‑wa yɩbhää wa 'kä Zezwii 'a tietiewaa ‑lizoku 'wlu nʋʋ, ‑mumuë ‑wʋä nimï, 'n ‑mumuë ‑wʋä Zezwii 'a tietiewaa nimï. 5‑Waaa Zwiiföwa glɩnɩ, wa ‑nyɛ Zwiiföwa ‑mumuë 'sɔ, 'wa 'kifiea kökä, 'n wa yiɛ 'dɩ 'wʋ 'zʋnɩ, wa 'kä Pɔɔlʋwa 'zwɩ zia, wa 'kʋä 'kpɩ 'mö 'lɩbhä wa ‑kä 'ku. 6Pɔɔlʋwa 'nwiɛ, 'n wa yiɛ futo, ‑mä Likaonii‑bhölɩɩ 'mö a gwlɩ 'sɔ, ‑mu a nglɩɛ Lisiitɩ, ‑mu a nglɩɛ Dɛɛbö, 'n wa yiɛ ‑mä mö. 7‑Mä gwlɩ 'la 'mö, 'n ‑mä yɩ ‑kʋkʋyɔwʋ a ‑gwlɩɩ 'mö, wa ghlɛɛ ‑mä, 'n wa yi'ɛɛ ‑mä Zezwii 'a 'Mänatɩtɩɩ bia.

Pɔɔlʋ ‑nyɛ Banabasɩ 'sɔ wa yɛ ‑mä Lisiitɩ kpälɛkpälɛnyɔ ‑bhlʋ yɛmanɩ

8‑Mä Lisiitɩ, 'n Pɔɔlʋwa yiɛ ‑mä nɩkpɛ ‑bhlʋ ghlɩnɩ, ɔ glɩ dʋdʋ 'wʋ. Nɩkpɛ 'la kpälɛkpälɛnyɔɔ. Sɛ ɔ 'maa 'kä a 'wlʋʋ, ɔ'ɔɔ ‑bhlɛ tɛkäsɛ nɛmö. 9Pɔɔlʋ ‑wʋä nɩkpa Lagɔwɛlɩɩ 'nyɛ dɔ'wʋʋ, nɩkpɛ 'la, ɔ ‑pʋnɩmö 'yukwli. ‑Maa Pɔɔlʋ yɩbhlɩnɩɛ sɛ nɩɩ, nɩkpɛɛ 'tɛɛnɩ Zezwii dlɩ nɩɩ ɔ yo yɛmanɩɩ, 'n ɔ yoo 'klʋ yɩlɩ ‑pölɩɩ, 10'n ɔ yiɛ wɛlɩ ghäyɩ 'pä ɔ lɛ naa: «‑Sɔ 'wʋ, 'nɩgbönɩ ghäyɩ.» Ɔ gbää ‑sɩbhä cuu, 'n nɩkpɛɛ yiɛ 'wʋ ‑sɔ ‑va, 'n ɔ yiɛ nɛmö. 11Nɩkpaa a ‑bʋbʋʋ, wa 'yɩɛ 'saa Pɔɔlʋ nʋä da'a 'ylɩmöö 'n wa yiɛ 'mö 'kpa, wa 'bhigbʋ 'mö wa lɛ naa: «‑Alɛɛ, ‑lagwɩ yɛ nɩkpa 'mö yinɩ, yɩ yɛ mä'ä ‑a'a mä'ä yi aa!» 12Glɛköwaa a ‑lagɔ 'kɔdʋʋ a nglɩɩ, 'n wa yiɛ Banabasɩ 'pä, wa lɛ ɔ nglɩɛ Zeesɩ. Pɔɔlʋ ɔbhlɩ, mɔɔ bhïlaa wa 'nglɩ 'mö zaa, ‑lagɔ 'la a 'yligbänɩnyɔɔ a nglɩɩ, 'n wa yonyɩɛ 'pä, wa lɛ ɔ nglɩɛ Ɛlɩmɛsɩ. 13‑Buduu wa bʋbɔnɩɛ ‑lagɔ 'kɔdʋ 'la 'möö, ‑lɛ wʋ ‑wʋä glonuë 'wʋ. Wa 'pää Pɔɔlʋwa nglɩ 'la 'wëë, ‑lagɔ 'la a bʋbɔbʋbɔnyɔ 'kɔdɔɔ, ɔ ‑su bhila, yɩ ‑bɔlɔ 'n ɔ ‑nyɩɩ yiɛ ‑lɛ Lagɔbudu 'la nuë 'wʋ 'mö. Ɛ'ɛ ‑bhö nyɩasɛ, ‑maa ɔ ‑nyɛ nɩkpa a ‑bʋbʋʋ 'sɔ wa yɩbhä wa 'kä Banabasɩ ‑nyɛ Pɔɔlʋ 'sɔ 'bhila bʋbɔnɩ. 14‑Maa Zezwii a tietiewa 'la 'sɔ ‑kpɔ 'nwiɛ 'möö, 'n wa yiɛ wanyɩ ‑banɩɩ 'ku 'mö ghlɛnɩ#14.14 ‑banɩɩ 'ku 'mö ghlɛnɩ: Mɩɩ sɛɛ zɛmö nɩɩ, sɛɛ nɩkpa 'la gbää da'a wa 'kä zʋʋ, Pɔɔlʋ ‑nyɛ Banabasɩ 'sɔ, wa ‑nyɛ ‑sɩbhä 'nɩɛ ‑wanɩ., 'n wa yiɛ ‑mä ‑bʋbʋʋ 'mö 'yi ‑dɩ, 'n wa yiɛ nyla. 15Wa lɛ naa: «‑A'bhɩanyɩ, 'saa bhä 'n a zʋ bhä sa'a nɩ? A sɛ a nɩkpaa ‑a glɩnɩmöä. Zezwii 'a 'Mänatɩtɩɩ mö ‑a yeanyɩɛ 'nyɛɛ nɩɩ, a nɩ ‑sɛ 'fʋ a ‑lagwɩ 'la 'wuë kɛ'mö. Lagɔ ‑ɔ ‑bhölɩ, ‑ɔ glɩnɩɛ ‑tiamö a Lagɔ, ‑ɔ ‑bhɛ zlɩ ‑nyɛ dʋdʋ 'sɔ, ‑ɔ ‑bhɛ gïnyɛ, ‑ɔ ‑bhɛ yɩ 'mö a ‑lii 'wuë, a 'kɔ 'a dilaa yowʋ 'nyɛ. 16Lagɔ, bhlagɔgɔ'mö a 'tɛnyɩɩ ‑ɛ 'plɩɛ 'mö, 'bhlɩbhëa 'wuë 'mö ɔ 'tatinɩ a‑a yi, sɛɛ 'wa dilaa yɩbhää, 'n wa nɛmö a‑a ‑sɩbhä. 17‑Maa ‑sɩbhä yɩ ‑wʋ 'mö, 'n ɔ nuëë ‑li a ‑li 'wlu 'yize. Sɛɛ 'ylʋbö yiɛ 'yize, mɔɔ gbää 'n 'nyizakwëa lɩbhää. Lilea a ‑dɩdɩtɛnyɩ ‑kä ghlɛɛ, mɔɔ gbää, a 'wuë 'n a ghlɩɛ lile, mɔɔ zʋanyɩɛ 'mäna dlɩ zɛmö.» 18Sa'a Pɔɔlʋwa gbää, ‑maa ‑sɩbhä yɩ ‑wʋ 'mö, nɩkpa 'la 'kä 'wʋ nglu nɩɩ, wa 'naa bʋbɔnuë 'bhila a dɔ'wʋ, Pɔɔlʋwa yɔlɔ wa yɔlɔ tenyii.

19‑Maa Zwiiföwa ‑mumuë 'bhöö ‑mä Pisidii a Atiɔsɩ, ‑mumuë 'bhöönɩ ‑mä Yikoniɔmö, 'n wa yiɛ yi. 'N wa yiɛ ‑bʋbʋʋ 'wlumö nyima, wa ‑nyʋä 'sɔ 'n wa yiɛ Pɔɔlʋ 'kpɩ 'mö 'lɩbhä ɔ 'kä 'ku. 'N wa yoo gbɩsɩ, 'n wa yoo ‑mä ‑glɔ a zɛgbälɩ 'wʋ sɛ bhlɩɛ mö, wa ‑tɔnɩ ɔ yɛ 'ku. 20Zezwii 'a ‑gänɩwaa ‑wa ‑wʋä ‑mä, 'n wa yiɛ yi, 'n wa yiɛ Pɔɔlʋ binɩ 'n wa yiɛ ɔ 'wlumö Lagɔ bhibhe, 'n ɔ yiɛ 'wʋ ‑sɔ, 'n ɔ yiɛ ‑mä glɔ 'mö 'bɩwʋ mö. Zlɩ zɩɛ, ɔ ‑nyɛ Banabasɩ 'sɔ, ‑glɔɔ wa laa Dɛɛbö, 'n wa yiɛ ‑mä mö.

Pɔɔlʋwa yɛ ‑mä Atiɔsɩ 'bɩwʋ mö

21Pɔɔlʋ ‑nyɛ Banabasɩ 'sɔ, wa ghlɛɛ ‑mä Dɛɛbö 'n wa yiɛ ‑mä Zezwii 'a 'Mänatɩtɩɩ bianɩ. 'N nɩkpa a ‑bɛ yiɛ 'wʋ nglu, 'n wa yiɛ Zezwii a ‑gänɩwa 'zʋ. Wa 'bhööä ‑mä ‑glɔ 'la 'möö, ‑mä Lisiitɩ ma, ‑mä Yikoniɔmö ma 'n ‑mä Pisidii a Atiɔsɩ, 'n wa yiɛ ‑mä 'bɩwʋ mö. 22Zezwii 'a ‑gänɩwaa ‑wa ‑wʋä ‑mä ‑gwlɩ 'la 'wuë 'möö, sɛ'ɛ Pɔɔlʋwa pʋää swɩ nyɛmʋ 'mö nɩɩ, Zezwii a dlɩ tɛɛnɩ dɔ'wʋʋ, dɛ wa kää sɛ, wa nɩ nyɔnʋ ‑lɛ kɛ. Sɛ'ɛ wa nyʋä'ɛ 'dɩ nɩɩ: «'Pɩwʋ mää Lagɔ 'kämanɩɛ, mä ‑a ‑wʋä mö dɔ'wʋʋ, ‑a 'maa 'kä 'zwɩ a ‑bɛ zi 'wë, a‑a 'kää ‑mä ghlɛ.» 23Gwlɩ 'la 'wuë 'mö, Zezwii a ‑nʋa a ‑zɩkpöö ‑yɩ ‑wʋä ‑mä, ‑sɩbhä Pɔɔlʋwa ‑sɛɛ yɩ 'yukugänɩwa. ‑Zɩkpa ‑bhlʋ 'mö, wa sɛ ‑mä 'yɛya, wa 'kä wa 'bhɩa Zezwii 'a ‑gänɩwaa 'yuku ‑gänɩ. Wa ‑nyɛ wa 'wuë 'sɔ 'n wa plɛɛ su, 'n wa bhibhee wa 'wlumö Lagɔ, Zezwii wa yɩbhlɩnɩɛ wa ‑lowli 'möö, ɔ 'kʋä ‑su.

24Wa 'bhööä ‑mä, 'n wa yiɛ ‑mä Pisidii‑bhölɩɩ 'mö 'wʋ 'tʋ, ‑mä Pafilii‑bhölɩɩ 'mö 'n wa yiɛ ‑mä ghlɛ. 25‑Mä Pɛɛzɩ glɔ 'mö, 'n wa yiɛ ‑mä a ‑nʋa Lagɔ 'a wɛlɩɩ 'nyɛ. 'N wa yiɛ 'plɩ, glɔ ‑bhlʋ wa laa Atalii ‑wʋ ‑wʋä ‑lɛ gïnyɛ yɔwʋʋ, 'n wa yiɛ ‑mä mö. 26‑Mä wa 'libhïnɩa'aa batoo 'wʋ, ‑mä Atiɔsɩ mä wa 'bhöönɩ a‑a, 'n wa yiɛ ‑mä 'bɩwʋ mö. ‑Mä ‑glɔ 'la 'mö, wa lɛ 'kää libhoo tɛɛ yii, ‑mä wa bhibhenɩ a‑a wa 'wlumö Lagɔ ɔ 'kʋä 'nyu 'pää.

27Wa ghlɛɛ ‑mä Atiɔsɩ, 'n wa yiɛ Zezwii 'a ‑gänɩwaa 'wlu 'yɩbha, sɛɛ Lagɔ kää 'nglɩ 'n wa yiɛ 'ɔ libhoo nʋ, 'n ‑waaa Zwiiföwa glɩnɩ yiɛ Zezwii a ‑nʋä 'zʋmöö, 'n wa yuëë ‑sɩbhä 'tɩtɩ 'nyɛ. 28‑Mä Atiɔsɩ, Zezwii 'a ‑gänɩwaa gla'mö, wa gwälɛ ‑mä 'tɩɩ.

Currently Selected:

Nʋnʋlii 14: bet

Highlight

Copy

Compare