Nʋnʋlii 13

'Wugɔmʋʋ 'Wlɩlɩ yɛ Banabasɩ ‑nyɛ Sɔɔlʋ 'sɔ ‑sɛ

1Zezwii a ‑nʋa ‑wa ‑wʋä ‑mä Atiɔsɩ, wa gla'mö, Lagɔ a 'möbhïlanɩwa ‑nyɛ nɩkpa a ‑muë kää Lagɔ 'a wɛlɩɩ a ‑gömösɛsɛnɩlibhoo 'sɔ, wa ‑wʋ a ‑mä. Wa nglɩɩ miɛ dɛ'ɛ: Banabasɩ a'bhë mɔ, Simeɔɔ wa 'pää nɩkpɛkpëbhë mɔ, Silɛɛnɩ a nɩkpɛ ‑bhlʋ wa laa Lukiusɩ mɔ, nɩkpɛ ‑bhlʋ wa laa Manaɛɛ, ‑ɔ ‑nyɛ 'bhlɩlowli Eloodɩ 'sɔ wa 'bhʋanɩɛ yɔwʋ mɔ, 'n Sɔɔlʋ kökämö. 2'Ylɩ ‑bhlʋ 'mö, Zezwii a ‑nʋa ‑wa ‑wʋä ‑mä Atiɔsɩ, wa yɩbhä 'wlu, wa ‑wʋ Lagɔ bʋbɔ dɔ'wʋ, wa ‑wʋ su 'mö, 'n 'Wugɔmʋʋ 'Wlɩlɩ yuëë 'dɩ 'nyɛ nɩɩ: «Banabasɩ ‑nyɛ Sɔɔlʋ 'sɔ, a nɩ 'zuë 'wa dɛ, libhoo n 'kʋää 'wʋ tieee, wa 'kʋ nʋ.» 3Zaa, wa 'wlʋä su 'mö 'wëë, wa 'zuëë kätɩkpö 'wlu wa bhibhee wa 'wlumö Lagɔ 'wëë, mää Lagɔ gbää wa nɩ möö, 'n wa yuëë ‑mä tie.

Banabasɩ ‑nyɛ Sɔɔlʋ 'sɔ yɛ ‑mä Siiplɩ mö

4-5Sa'a ‑sɩbhä 'Wugɔmʋʋ 'Wlɩlɩ tiee Banabasɩ ‑nyɛ Sɔɔlʋ 'sɔ 'n wa yiɛ mö, wa ‑su Zaa wa la'ɛɛ Maakö 'bɩwʋ ɔ 'kʋä kwänɩ. Wa 'kää möä yii, glɔ ‑bhlʋ wa laa Selesii, ‑mä wa möä 'n wa yiɛ ‑mä batoo 'wʋ 'libhïnɩ, gïnyɛlekpë 'kädaa wa laa Siiplɩ 'klʋ a bhlɩɩ 'mö 'n wa yiɛ ‑mä mö. Wa ghlɛɛ ‑mä, ‑mä a glɔ ‑bhlʋ wa laa Salaminɩ, ‑mä a Zwiiföwaa a Lagɔbïdii 'mö, 'n wa yiɛ ‑mä Lagɔ 'a wɛlɩɩ bhïlanɩ.

6Wa nɛmöä bhlɩ 'la 'mö ‑këë, glɔ ‑bhlʋ wa laa Pafɔɔsɩ 'n wa yiɛ ‑mä ghlɛ. ‑Mä glɔ 'la 'mö, ‑mä wa ghlɩnɩɛ ‑zilinyɔ ‑bhlʋ. Nɩkpɛ 'la Zwiiföyi ɔ glɩnɩɛ. Ɔnyɩ ɔ laa Lagɔ 'a 'möbhïlanɩnyɔ. Ɔ nglɩɛ Balɩ Zezwii. 7‑Mä bhlɩ 'la 'mö a 'kämanɩnyɔɔ wa laa Segusɩ Polusɩ, 'ɔ gunyɔɔ mɔɔ. 'Kämanɩnyɔ 'la 'nɛɛnɩnyɔ ɔ glɩnɩɛ. Banabasɩwa ghlɛɛ ‑mä glɔ 'la 'möö, ɔ 'yɩbhä ɔ 'kä Lagɔ 'a wɛlɩɩ 'yukwli ‑pʋnɩ zaa, 'n ɔ yuëë wäzɩ. 8‑Maa 'kämanɩnyɔɔ wëzuëë, gunyɔ 'la Glɛköwaa laa Elimasɩ, yɩ nɔɔ dlɩ yɔwʋ nɛnɩ zaa, ɔ yɩbhä ɔ 'kä 'kämanɩnyɔɔ 'yila 'klʋ 'yula, 'kämanɩnyɔɔ 'kä Banabasɩwa a wɛlɩ kɛ 'mö ‑sɛ, ɔ tɩa Zezwii a ‑nɔ 'zʋ. 9Ɔ 'zʋä sa'aa, Banabasɩ a 'wʋ‑bhlinɩnyɔ Sɔɔlʋ, wa la'ɛɛ Pɔɔlʋ, 'Wugɔmʋʋ 'Wlɩlɩ ‑wɔɔ tenyii ‑gömö, 'n ɔ yoo 'ylimö glʋnɩ, 10ɔ lɛ naa: «Zaklɔnɩkpɛ, 'kpʋkpʋnyɔ, Sataa a 'yu, 'saa nɛnɩɛ Lagɔ dlɩ yɔwʋ 'wuë ‑nmöö ‑gbïliiɛ, ‑n yɛ ‑bɛ 'wʋ Lagɔ 'a wɛlɩɩ widɩ 'mö ‑sɛnɩ, ‑nn‑ä bhä ‑bhlɛ yɔlɔ ‑a? 11‑Nmö n nyɛa'aa ‑sɩkaa 'dɩ nɩɩ: Lagɔ yi gbää ‑na'a yilaa yi wɔlɔ, ‑n yi 'yuylukwë 'mö nɛmö ‑këë ‑lɛ yi 'mö gwälɛ.» Pɔɔlʋ kɩ ngli cuu 'n Elimasɩ a 'yila 'klʋ yiɛ ylumanɩ tititi, ɛ 'kä ‑bhɩɛa'a 'yuylukwë 'mö ɔ ‑wʋ, ɔ bhöbhlɩnɩ, ɔ tɛlɩ nɩkpɛ sɛ ‑ɔ 'kɔɔ sɔ ‑känɩ. 12‑Maa 'kämanɩnyɔɔ 'yɩɛ ‑li 'la 'ylɩmöö, 'n ɔ yiɛ Zezwii a ‑nɔ 'zʋ. Lagɔ 'a wɛlɩɩ ‑yɩ 'tɛɛ 'möö, mɩɩ noo libho 'wlu.

Pɔɔlʋ ‑nyɛ Banabasɩ 'sɔ wa yɛ ‑mä Pisidii a Atiɔsɩ Lagɔwɛlɩɩ bhïlanɩ

13Pɔɔlʋwa, wa 'bhööä ‑mä Pafɔɔsɩ 'n wa yiɛ batoo 'wʋ 'libhï, Pafilii‑bhölɩɩ 'mö a ‑glɔ ‑bhlʋ wa laa Pɛɛzɩ 'n wa yiɛ ‑mä mö. ‑Mä ‑glɔ 'la 'mö, ‑mä Zaa Maakö 'bhöönuëë 'bɩwʋ 'n ɔ yiɛ ‑mä Zeluzalɛɛmö nimï mö. 14‑Maa Pɔɔlʋ ‑nyɛ Banabasɩ 'sɔ wabhlɩ, mö wa möä 'yize. Wa 'bhööä ‑mä Pɛɛzɩ, Pisidii‑bhölɩɩ 'mö a ‑glɔɔ wa laa Atiɔsɩ, ‑mä wa möä. Wa ghlɛɛ ‑mä, Zwiiföwaa 'a ‑gwlɛnɩzlɩɩ ghlɛɛ, 'n wa yiɛ ‑mä a Lagɔbuduu 'mö mö 'n wa yiɛ sɛ glɩ. 15Wa zɛlɩɛ Moyizɩ 'a Gböö a 'bɔgʋʋ ‑nyɛ Lagɔ 'a 'möbhïlanɩwaa 'a 'bɔgʋʋ 'sɔ 'mö 'wëë, 'n Lagɔbuduu a 'yukugänɩwaa yiɛ Pɔɔlʋwa 'dɩ 'nyɛ, wa lɛ naa: «‑A'bhɩanyɩ, a ‑kä 'kïbhïyie 'mlɩ ‑kä ‑yɩ ‑kanyɩɛ ‑a 'wuë swɩ nyɛmʋ 'mö 'pää, a kä a 'kä bhïla.» 16'N Pɔɔlʋ yiɛ 'wʋ ‑sɔ, 'n ɔ yiɛ sɔ ghäyɩ 'pä, ɔ lɛ naa: «Abhʋa Yizlaɛlɩ 'a ngëyii Lagɔ ‑sɛɛ ‑lɛ 'mö a ‑nʋa, 'n abhʋa ‑wʋmö'ɛɛ abhlɩ dɛ'ɛ a 'kä Lagɔ bʋbɔmöö, a 'wuë a ‑pʋnɩ 'yukwli. 17N nɛ naa, ‑abhʋa Yizlaɛlɩ 'a ngëyii 'mö a ‑nʋa, Lagɔ ‑a bʋbɔɔ, mɔɔ ‑sɛɛ ‑lɛ ‑aa dɩbawa a dɩbawa wa 'kä ɔ ‑nʋä glɩnɩ. Dɛɛ ‑aa dɩbawa ‑wʋ a‑a ‑bhlɛ ‑mä käböbhölɩ ‑gömö, ‑mä Ezipötɩ, Lagɔ mɔɔ gbää 'n wa yiɛ zumanɩ, 'ɔ 'mötɛɛnɔɔ 'mö 'n ɔ yuë'ɛɛ ‑mä galɛ 'mö ‑sɛ. 18'Ylʋbö a gwlɩ 'sɔ 'mö ɔ ‑sunuë ‑mä 'muse 'klʋ.

19Wa ghlɛɛ ‑mä Kanaa‑bhölɩɩ 'möö, ɔ bhɩa ‑mä a ngäya ngbi'sɔ 'yli, 'n ɔ yuëë 'wa bhlɩɩ dilanɩ, 20'ylʋbö a 'du ‑bhlʋ, 'ylʋbö a gwlɩ 'sɔ 'ylʋbö kʋgbä (450) 'mö a sɛ. ‑Mi'la 'plɩɛ 'wëë, 'n ɔ yuëë ‑zijlituwa 'nyɛ, wa 'kʋä ‑su, ‑këë 'n Lagɔ a 'möbhïlanɩnyɔ Samiɛlɩ a 'tɛnyɩ yiɛ ghlɛ. 21Ɔ 'tɛnyɩ 'mö ‑aa dɩbawa a'bhï wa lɛ Lagɔ nɩ ‑sɛ nɩkpɛ ɔ 'kä wa 'bhlɩlowli 'zʋ. Bɛzamɛɛ a ‑gligbëa 'wʋ a nɩkpɛ ‑bhlʋ wa laa Kiisɩ, ɔ yowli Sawilɩ, 'n Lagɔ yoo ‑sɛ. Ɔ 'kämanuë ‑gömö ‑këë 'ylʋbö a gwlɩ 'sɔ. 22'N Lagɔ a'bhë yoo 'kämanɔɔ 'wʋ ‑sɛ. 'N ɔ yiɛ Daviidɩ ‑lɛ ɔ 'bhle 'mö 'zʋ ɔ 'kä wa 'bhlɩlowli glɩnɩ. Sɛ'ɛ ɔ gbää Daviidɩ a dɛ nɩɩ: Yizayii ‑yowli Daviidɩ, 'mö n ‑sɛɛ ‑lɛ, nɩkpɛ a ‑mɔɔ nɛnɩɩɛ dlɩ yɔwʋ 'mö ɔ glɩnɩɛ. Mɔɔ 'kää 'na sɛ n yɩbhää 'wuë 'zʋ. 23Daviidɩ 'la a 'yu a 'yu ‑bhlʋ 'mö wa laa Zezwii, 'mö Lagɔ ‑sɛɛ ‑lɛ, 'mö ɔ 'zʋa Yizlaɛlɩ a puënyɔ 'wʋ. Lagɔ a'bhë ‑sɩbhä ɔ gbä a‑a. 24Zezwii lɛ 'kää yie yii, Lagɔ a 'möbhïlanɩnyɔ Zaa Batisɩ, mɔɔ 'pä a‑a wɛlɩ 'n ɔ yi a‑a Yizlaɛlɩ a ‑nʋa 'wuë 'dɩ 'nyɛ nɩɩ, wa nɩ ligba wa 'kä 'wa ‑lizokuu kɛ'mö ‑sɛ ɔ 'kʋä 'wlu wɔlʋ. 25Zaa Batisɩ lɛ 'kää 'ɔ libhoo zɛmö bhɩɛɛ yii, sɛ'ɛ ɔ 'nyɛɛ nɩkpabhë 'dɩ nɩɩ: ‑Mɔ a libhïï bhä 'mö 'wʋ 'nɩ? Puënyɔɔ ‑a ‑kʋnɩɛ 'mö n'n‑äa glɩnɩ, ‑maa ɔ ‑gäa nimï. N'n‑ä a'bhë 'ke ‑kä n 'kä 'ɔ 'siikplii bulonɩ.

26‑A'bhɩanyɩ, a 'wuë, abhʋaa bʋbɔɔ Lagɔ, ‑wa yi Ablaamö a 'yuë a 'yuë glɩnɩ oo, ‑wa 'nuë glɩnɩ oo, Lagɔ 'a 'pʋpʋɛ a wɛlɩɩ, a 'wuë a ‑liɛ. 27‑Maa Zeluzalɛɛmö a nɩkpaa ‑nyɛ 'wa 'kädɩɩ 'sɔ, wa'aa 'saa Zezwii glɩnɩɛ ‑yi. Lagɔ 'a 'möbhïlanɩwaa 'a wɛlɩɩ wa 'cɛlɩ a‑a, sɛɛ ‑gwlɛnɩzlɩ ghlɛɛ 'yize, ‑sɩbhä wa zɛliɛ 'mö, ‑maa wa 'niɛ 'mö 'nʋ. Wa köbhaa Zezwii gbʋ, wa 'lɩbhɔɔ, wɛlɩ 'la mɩɩ 'wlʋnɩɛ 'yli. 28'Kïbhë a ‑maa 'kɔɔ gbʋ köbhaa, wa 'nɔnyɩɛ 'mö ghlɩ, ‑maa ‑sɩbhä yɩ ‑wʋ 'mö, 'n wa yiɛ ‑gɔmla Pilaatɩ 'dɩ 'nyɛ nɩɩ, ɔ nɩ gbä ɔ 'kä 'ku. 29'Saa 'wuë cɛlɩ a‑a ɔ dɛ, yɩ 'wlʋnɩɛ 'yli 'wëë, 'n wa yiɛ ‑lɛ ɔ ‑gäzɛɛ su 'klʋ ‑sɛ, 'n wa yee ziza. 30‑Maa Lagɔ kɔ gäla ɔ kɔ glu ‑sɛ. 31Ɔ 'wlʋä glu 'wëë, dɛ ɔ 'bhöö a‑a ‑mä Galilee‑bhölɩɩ 'mö 'n ɔ yiɛ ‑mä Zeluzalɛɛmö mö a nɩkpaa ‑wa ‑gänɔɔ a‑a, ɔ tulanuë ɔnyɩ 'ylɩ a ‑bɛ 'mö 'ylimö. ‑Lɛ a nɩkpa 'la, mʋa 'nyɛɛ zɩ'ɛ ‑mä Yizlaɛlɩ a ‑nʋa 'dɩ nɩɩ, 'ɔ wɛlɩɩ, ‑tiawɛlɩɛ. 32‑A'bhï, 'Mänatɩtɩ 'la, mö ‑a ‑lɛmanyɩɛ: Wɛlɩɩ Lagɔ 'nyɛ a‑a ‑aa dɩbawa a dɩbawaa, 33‑zlɩ ɔ gälaa Zezwii 'n ɔ yoo glu ‑sɛɛ, wɛlɩ 'la, mɩɩ 'wlʋnɩa'aa ‑sɩkaa, ‑abhʋa 'wa yuëa a yuëa a 'tɛnyɩ nɩ 'mö 'yli. Sɛ yɩ cɛlɩɛ a‑a ‑mä Lagɔ a 'nglɩghlimanɩlwɩɩ a 'bɔgʋʋ a 'sɔnakïbhëa 'mö nɩɩ: Lagɔ lɛ naa:

‑Nmö glɩnɩɛ 'na yuu.

Tɛɛnɩ zɩ'ɛ dɛ'ɛ, ‑amöö glɩnɩɛ ‑na dɩba. # 13.33 Soomö 2.7.

34Lagɔ a'bhë kɩ a ‑pa bhïla nɩɩ, Zezwii ‑kä 'ku 'wëë, ɔ yo gäla ɔ yo glu ‑sɛ, nzɩɩ ɔ 'käa'a 'kwädlɩkwädlɩnɩ ‑bhölɩ. Sɛ'ɛ ɔ gbä a 'yɛɛ nɩɩ:

‑Amö Lagɔ, sɛ n gbä a‑a n yi Daviidɩ 'kwädlɩ 'nyu 'pää,

abhʋa ɔ 'yuë a 'yuë, n yeanyɩ ‑tiamö ‑sɩbhä 'nyu 'pä. # 13.34 Ezayii 55.3.

35‑Maa ‑mä Lagɔbɔgʋʋ 'mö a kïbhë ‑mämaa 'mö, sɛ'ɛ ɔ nʋä nɩɩ:

‑Atʋ Lagɔ, ‑ɔ glɩnɩɛ ‑na 'yize a ‑nɔɔ,

ɔ ‑kä 'kuu, ‑nn‑ä ‑n 'kɔ 'yi 'tatinɩ ɔ 'kä zɛ. # 13.35 Soomö 16.10.

36‑Maa Daviidɩ a'bhë, 'ɔ 'tɛnyɩ 'mö, Lagɔ 'a libhoo, ɔ nʋ 'tɩɩ. Ɔ nuä 'wëë, 'n ɔ yiɛ 'ku. Ɔ 'kuä, dɛ wa zizaa ɔ dɩbawaa, ‑lɛ wa zizamɔɔɔ, 'n ɔ yiɛ zɛ. 37‑Maa Zezwii Lagɔ gäla ɔ ‑sɛɛ gluu, mɔɔ 'nɩɛ zɛ. 38Zaa, ‑a'bhɩanyɩ a nɩ yɩbhlɩnɩ ‑tiamö sɛ nɩɩ, 'n Lagɔ ‑kä 'a 'nyinylolii a gbʋʋ 'yi 'tatinɩɩ, 'mö Zezwii, ɔ nglɩmöä. Miɛ nɩɩ, Moyizɩ 'a Gböö a 'klʋkpamözʋzwɛɛ, mɛɛ 'nɩɛ 'nglɩ ‑kä a 'kä 'mö zlɔmanɩ Lagɔ a 'yila 'klʋ a dɔ'wʋ. 39‑Maa a ‑kä Zezwii dlɩ 'tɛɛnɩ, mɩɩ 'kää 'nglɩ ‑kä, 'a 'nyinylolii 'wuë a gbʋʋ, Lagɔ 'kʋ 'yi 'tatinɩ. 40Zaa, a 'nɛmanɩ anyɩ 'wʋ, wɛlɩɩ Lagɔ 'a 'möbhïlanɩwaa bhïla a‑a, yɩ tɩa a ‑li 'zʋ. 41Sɛ'ɛ wa gbä a‑a nɩɩ, Lagɔ lɛ naa:

Abhʋa flanɩɛ 'na bhïlawɛlɩɩ 'ylimöö,

a ‑pʋnɩ 'yukwli,

zuzuu 'kanyɩɛ ‑gömö ylɛ, a 'kä 'yli bhɩɛ.

'Saa n 'kää 'a 'tɛnyɩ nɩ 'mö 'yli 'wälanɩɩ,

'n wa ‑kaanyɩ yɩ 'dɩ 'nyɛ ‑kë,

a 'naa 'kɩ dlɩ 'wʋ ‑kä. # 13.41 Abakukö 1.5. »

42Sa'a Pɔɔlʋ 'nyʋää 'dɩ. Nɩkpa 'la 'wuë, wa bhibhee Lagɔ 'wëë 'n wa yiɛ Pɔɔlʋwa yɔwʋ bhibhe nɩɩ, wa nɩ yinɩ 'wʋ 'sɔ, ‑gwlɛnɩzlɩ ‑mɛ'la 'mö wa 'kä'ɛ wɛlɩ ‑bhʋlʋ ‑kpɔ a dɛ bhïla. 43Wa 'wlʋä ‑mä Lagɔbuduu 'mö 'wëë, Zwiiföwa a ‑bɛ, 'n nɩkpa ‑mumuë ‑waa a‑a Zwiiföwa glɩnɩ ‑wa bʋbɔa'aa Zwiiföwa a sɛ Lagɔ, 'n wa yiɛ Pɔɔlʋwa 'bɩwʋ bhlinɩ. 'N Pɔɔlʋ ‑nyɛ Banabasɩ 'sɔ yuë'ɛɛ Lagɔ 'a wɛlɩɩ 'nyɛ, 'n wa yuëë 'dɩ 'mö zʋ nɩɩ, sɛɛ Lagɔ 'pää nɩkpɛ a ngäzɩdlɩɩ, ‑lɛ a wɛlɩ 'la wa nɩ gbuli sasɛ 'wʋ.

Pɔɔlʋ ‑nyɛ Banabasɩ 'sɔ wa yɛ ‑waaa Zwiiföwa glɩnɩ a dɛ bhïla

44 ‑Gwlɛnɩzlɩ ‑mɛ'la ghlɛɛ, ‑glɔ mʋʋ doo glu, 'n wa yiɛ yi, wa 'kä ‑Alowli Lagɔ 'a 'Mänatɩtɩɩ 'yukwli ‑pʋnɩ. 45Zwiiföwaa, wa 'yɩɛ nɩkpaa a zunɔɔ 'ylɩmöö, 'yli yɩ këluëë. Pɔɔlʋ ‑kä Lagɔ 'a wɛlɩɩ bhïlaa, 'mö wa kpɛniɛ 'n wa bhïlanɩɛ Pɔɔlʋ a'bhë wɛlɩzoku. 46Pɔɔlʋ ‑nyɛ Banabasɩ 'sɔ wa'aa ‑gu ‑maa gbëaa wa 'nyʋä 'dɩ, wa lɛ naa: «Sɛɛ Lagɔ yɩbhää ‑sɩbhä ‑a zʋä, miɛ nɩɩ, 'ɔ wɛlɩɩ abhʋa ‑a 'nyɩɛ tɛɛ. ‑Maa 'pɩwʋ mää 'naa 'kää 'yli bhɩɛ, a'aa 'yɩbhä a 'kä ‑mä ghlɩ nza a pɩɛ sa'a 'kwlɛ 'mö. Zaa, a yɩɛ, nɩkpaa ‑waaa Zwiiföwa glɩnɩɩ, mö ‑a 'käa'aa ‑sɩkaa Zezwii 'a wɛlɩɩ 'nyɛ. 47Ɛ'ɛ ‑bhö nyɩasɛ, ‑maa sɛɛ Lagɔ nyɩanyɩɛ 'dɩɩ, ‑sɩbhä ‑maa nɩɩ:

‑N 'kä 'bhlɩbhëa 'wuë 'wʋ ngäla,

'Mänatɩtɩɩ ‑yɩ 'kää nɩkpɛ puë,

‑n 'kɩ bia ‑këë ‑mä dʋdʋʋ a këtiea 'wuë 'wʋ,

nza n ‑samöä ‑lɛ. # 13.47 Ezayii 49.6. »

48‑Waaa Zwiiföwa glɩnɩɩ, wa 'nʋä wɛlɩ 'laa, wa 'wuë 'mäna 'n wa 'ghlimanɩɛ Lagɔ a 'nglɩ, 'n wa nʋä: «Zezwii 'a 'Mänatɩtɩɩ, ‑li a ‑liɛ.» ‑Lɛ a zlɩ 'la 'mö, nɩkpaa 'wuë Lagɔ ‑sɛ a‑a ‑lɛ 'kɩ wa 'kä 'ɔ 'pɩwʋlelea 'wʋ 'bhle ghlɩɩ, 'n wa yiɛ 'wʋ nglu wa 'kä Zezwii a ‑nʋä 'zʋ.

49Sa'a ‑sɩbhä ‑Alowli Zezwii 'a 'Mänatɩtɩɩ mlɩmanɩɛ ‑mä bhlɩ 'la 'wuë ‑gömö. 50‑Maa ‑mä ‑glɔ 'la 'mö a 'nglɩkängwlɩɩ ‑nyɛ nɩkpa 'kädɩɩ 'sɔ, ‑wa bʋbɔmöä Lagɔɔ, 'wa dilaa 'mö Zwiiföwaa 'pää ghäyɩ, 'n wa yiɛ Pɔɔlʋwa 'zwɩ zia, 'n wa yuëë ‑mä 'wa bhlɩɩ 'mö kpëti. 51Pɔɔlʋ ‑nyɛ Banabasɩ 'sɔ, wa lɛ 'kää ‑mä ‑glɔ 'la 'mö 'wlʋä yii, 'wa kplɩɩ zɛmö a dʋdʋʋ 'mö wa gbɔtɔɔ.#13.51Mɩɩ sɛɛ zɛmö nɩɩ: Lagɔ a 'yila 'klʋ a dɔ'wʋ wa ‑kä tʋʋ, Pɔɔlʋ ‑nyɛ Banabasɩ 'sɔ mʋa 'nɩɛa'a wa gbʋ ‑kä. 'Wë ‑glɔɔ wa laa Yikoniɔmö, 'n wa yiɛ ‑mä mö. 52‑Mä Atiɔsɩ glɔ 'mö, mää Pɔɔlʋwa 'bhööä da'aa, Zezwii 'a ‑gänɩwaa ‑wa ‑wʋä ‑mä, 'Wugɔmʋʋ 'Wlɩlɩ ‑wuë tenyii ‑gömö, wa 'wuë 'mäna.

Currently Selected:

Nʋnʋlii 13: bet

Highlight

Copy

Compare