Revelation 3
3
CHAPTIR THRIE.
Coonsels and helps. Mair hope oʼ the cauldrife than ane naither het nor cauld.
1“And to the messenger oʼ the Kirk in Sardis write ye: Thir things says he wiʼ the seeven Spirits oʼ God, and the seeven starns: I ken what ye div, and that ye hae the name oʼ leevin whan ye are deid.
2“Tak ye gude tent, and mak siccar what remain, that are ready to dee; for I haena fund yere warks accomplishʼt iʼ the sicht oʼ my God.
3“Mind weel, than, hoo ye obteenʼd and heard; and haud siccar, and turn. Gin ye gaird‐na, I wull come as comes a thief, and in naegate sal ye ken whatna ʼoor Iʼse come on ye.
4“But ye hae a wee wheen names in Sardis, wha haena stained their robes, and they sal walk wiʼ me in white; for they are wordie.
5“Whasae prevails sal be buskit in white cleedin; and in naegate wull I delete his name oot oʼ the Buik oʼ Life: and I wull own his name afore my Faither, and afore his Angels.
6“He that has hearin, lat him hear what the Spirit is sayin to the Kirks!
7“And to the messengers oʼ the Kirk in Philadelphia write ye: Thir things says the Holie Ane, the True Ane, he that has the key oʼ Dauvid, he that opens and nane can steek, and steek and nane can open:
8“I ken yere warks (tak tent! I hae set afore ye a door unsteekit; as to whilk nane can shut it!) for ye hae a wee pooer, and did keep my word, and didna disown my name.
9“Look! I gie them oʼ Sautanʼs kirk, whilk sae they are Jews and are‐na, but lee; see, I wull gar them come and lout doon afore yere feet, and ken that I hae loʼed ye.
10“For that ye did keep the word oʼ my patience, I sal eʼen keep ye oot oʼ the ʼoor oʼ trial, whilk is coming on the hail warld, to test them dwallin on the yirth.
11“Wiʼ haste come I! haud fast what ye hae, sae as nae man taks yere croon!
12“He that prevails, I wull mak him a strang pillar iʼ the temple oʼ my God; and oot‐by sal he gang nae mair; and I wull set upon him the name oʼ my God, and the name oʼ the citie oʼ my God, New Jerusalem, she wha is to come doon oot oʼ heeven frae my God: and my new name.
13“He that has hearin lat him hear what the Spirit is sayin to the Kirks!
14“And to the messenger oʼ the Kirk oʼ Laodicea write ye: Thir things says the Amen, the Leal, and True Witness, the #3:14 No that he was the first creatit; for he wisna creatit; nor aiblins (in this place) that he was hissel the Creator — thoʼ that is true; but raither that he is the heid oʼ aʼ things; the First and Heighest.First oʼ the Creation oʼ God:
15“I ken yere warks, that naither cauld nor het ye are; I wad that ye had been aither cauld or het!
16“And sae than, for that ye are simmer‐warm, and naither cauld nor yet het, I wull spue ye oot oʼ my mooth!
17“For ye are sayin: ‘Rich am I; and hae rowth oʼ plenishin, and want nocht!’ and divna ken that ye are the waesome ane, and miserable; and in need, and blinʼ, and nakit.
18“I coonsel ye to buy frae me gowd made clear wiʼ fire, that ye may be rich; and white cleedin that ye may be weel‐buskit; and that the shame oʼ yere nakitness appear‐na; and ee‐saʼ to anoint yere een that ye may see.
19“I, as mony as I weel‐loʼe, repruve and chasten; be zealous than, and turn ye!
20“Mark, I am staunin at the door, and chappin; gin ony ane hearken to my voice, and unsteek the door, I wull gang in to him, and sup wiʼ him, and he wiʼ me.
21“He that prevails, I wull gie to him to tak his seat wiʼ me iʼ my thron; as I eʼen prevailʼt, and took my seat wiʼ my Faither in his thron.
22“He that has hearin, lat him hear what the Spirit is sayin to the Kirks!”
Currently Selected:
Revelation 3: SCO1904
Highlight
Copy
Compare
Share
Want to have your highlights saved across all your devices? Sign up or sign in
Translated by Rev William Wye Smith. Published in Paisley, Scotland in 1904.
