Revelation 13
13
CHAPTIR THIRTEEN.
A beast risin oot oʼ the sea: anither beast that dis ferlies.
1And he stude upon the sand oʼ the sea. And I saw a beast comin up oot oʼ the sea, haein ten horns and seeven heids, and on his horns ten croons, and his heids bure the names oʼ blasphemie.
2And the beast I saw was like to a leopard, and his feet like as oʼ a bear, and his mooth as a lionʼs mooth; and the Dragon gied him the pooer that he had, and his thron, and great authoritie.
3And I saw ane frae ʼmang his heids as it war thrust‐throwe to the deid; and his deid‐straik was healed; and aʼ the warld ferlie at the beast.
4And they gied worship to the Dragon, for giean sic pooer to the beast; and they gied worship to the beast, sayin, “Wha can marrow the beast? Wha can mak war wiʼ him!”
5And thar was gien to him a mouʼ speakin unco things, and blasphemies; and thar war gien him authoritie for forty‐twa months.
6And he openʼt his mouʼ in blasphemies again God; to miscaʼ his name, and his tabernacle, and thae that dwall in Heeven.
7And it was gien to him to mak war wiʼ the saunts, and to owercome them. And thar was gien him authoritie ower aʼ tribes, and folk, and tongues, and nations.
8And they wull worship him aʼ they that dwall on the yirth, ilk ane whase name isna putten‐doon iʼ the Buik‐oʼ‐Life oʼ the Lamb that was slain frae the fundation oʼ the warld.
9Gif ony ane has hearin, lat him hear.
10Gif ony man is for bonds, intil bonds he gangs; gif ony man wiʼ sword wull slay, by sword sal he be slain. Here is the tholin and the lealness oʼ the saunts!
11And I saw anither beast comin up oot oʼ the yird; and he had twa horns like a lamb, and he was speakin like a dragon.
12And he sways the pooer oʼ the first beast in his presence; and gars the yirth and aʼ its dwallers worship the first beast, wha was healed oʼ his deid‐straik.
13And he dis great ferlies, eʼen to gar lowe to come doon oot oʼ the lift, afore the sicht oʼ men:
14And he beguiles them that dwall on the yirth, wiʼ the ferlies it was gien him to do iʼ the sicht oʼ the beast, and commauns thae that dwall on the yirth to mak an image to the beast, wha had a deid‐straik oʼ a sword, and leeved.
15And it was gien him to gie breath to the image oʼ the beast, that the image oʼ the beast micht eʼen speak; and gar as mony as wadna gie worship to the image oʼ the beast to be slain.
16And he gars aʼ, smaʼ and great, and the rich and the puir, the free and the enthrallʼt, that they soud be brandit on their richt‐haun, or on their broo;
17And that nane soud hae pooer to buy or to troke, but he that has the mark, the name oʼ the beast, or the number oʼ his name.
18Here is discernment: he that is wyss lat him coont‐up the number oʼ the beast; for it is the number oʼ a man, and his number is sax hunner and saxty‐sax.
Currently Selected:
Revelation 13: SCO1904
Highlight
Copy
Compare
Share
Want to have your highlights saved across all your devices? Sign up or sign in
Translated by Rev William Wye Smith. Published in Paisley, Scotland in 1904.
