Jude 1
1
CHAPTIR ANE.
Warnins again corrupt sins. The Lord is comin!
1Jude, a servitor oʼ Jesus Christ, brither oʼ James, to thae wha bein in God the Faither beloved anes, and keepit in Jesus Christ, are the chosen.
2Mercie to you, and peace and love, be made mair!
3While I was giean aʼ tent to be writin to ye oʼ oor common salvation, I fand it necessar to write to ye, exhortin ye to strive uncolie for the faith ance‐and‐for‐aʼ gien to the saunts.
4For thar slippit in a wheen men, oʼ wham it was putten‐doon lang syne, that this soud be their condemnation, ungodlie anes — oor Godʼs lovin‐favor turnin intil wantonness, and disownin oor only Lord Jesus Christ.
5I am thar‐for disposed to pit ye in mind, thoʼ ance‐and‐for‐aʼ ye ken aʼ things, that the Lord, haein saved a folk oot oʼ the land oʼ Egypt, did again destroy them wha believed‐na.
6Angels too, thae wha mainteenʼd‐na their ain station, but left their ain place, has he keepit for judgment oʼ a great day, in evir‐durin bonds, in mirkness.
7As Sodom and Gomorrah, and the cities aboot them, for that in siclike they gaed oot to commit uncleanness, and gaun eftir strange flesh, are set forrit as a warnin, dreein the penalty of endless fire.
8And in siclike, eʼen thir dreamers defile the flesh, despise authoritie, and miscaʼ dignities;
9Whaur‐as Michael the Archangel, whan contendin wiʼ Sautan he debatit aboot Mosesʼ body, daurna miscaʼ him; but quoʼ he, “The Lord repruve ye!”
10But thir, as mony things as they ken‐na, they miscaʼ; while in as mony things as they ken by nature as the beass without reason, in thir they corrupt theirsels.
11Alack for them! for they gaed on iʼ the path oʼ Cain, and warslʼt forrit iʼ the sin oʼ Balaam, and perishʼt iʼ the mockery oʼ Korah.
12Thir are they that are like hidlin rocks at yere love‐feasts, whan they feast wʼye; shepherds #1:12 A shepherd soud feed his flock; but this sort thocht only oʼ theirsels.feedin theirsels withoot shame; cluds wantin moisture, by the winds driven on; trees oʼ the leaf‐faʼin, wantin frute, twice deid, rived up by the rutes;
13Wild waves oʼ the sea, foamin oot oʼ their ain shame; gangrel starns, for wham black mirkness has been keepit for aye.
14And to thir prophesyʼt Enoch, the seeventh frae Adam, and quoʼ he, “Behauld! the Lord cam, amang his holie myriads,
15“To gie judgment upon aʼ, and to sentence aʼ the ungodlie anent aʼ their warks oʼ wickedness they for ungodliness had done; and anent aʼ the hard things they spak again him; sinfuʼ, ungodlie men!”
16Thir are yammerers, compleenin anes, gaun on eftir their ain desires; and their mouʼ speak heigh swallin words, fleeching and flatterin folk for their ain ends.
17But ye beloved, mind ye the words afore spoken by the Apostles oʼ oor Lord Jesus Christ;
18For they tellʼt ye that iʼ the last times thar soud be mockers, gaun on conform to their own ungodlie desires.
19Thir are they that mak separations; nateral men, no possessin the Spirit:
20But ye beloved, up‐biggin yersels iʼ yere maist holie faith, prayin iʼ the Holie Spirit,
21Keep yersels in Godʼs love, lookin for the mercie oʼ oor Lord Jesus Christ until life‐for‐aye.
22And on some hae unco compassion, while they argue wʼye;
23And ithers save wiʼ terrors, cleekin them oot oʼ the lowe; and on ithers hae mercie in fear, hatin eʼen the garment stained by the flesh.
24Noo to him wha is strang to gaird ye frae faʼin, and to set‐ye‐doon iʼ the presence oʼ his glorie faultless, wiʼ unco rejoicin,
25To this ae God oor Saviour, throwe Jesus Christ oor Lord, be glorie, heighness, dominion, and pooer, afore aʼ time past, and noo, and for aʼ time to come! Amen!
Currently Selected:
Jude 1: SCO1904
Highlight
Copy
Compare
Share
Want to have your highlights saved across all your devices? Sign up or sign in
Translated by Rev William Wye Smith. Published in Paisley, Scotland in 1904.
