James 1
1
CHAPTIR ANE.
James tells what true faith wull do in aneʼs life. Gin aʼ wud dae sae, what a bonnie warld we wad hae!
1James, a servant oʼ God, and oʼ the Lord Jesus Christ, tae the Twalʼ Tribes oʼ the Dispersion; joy!
2Aʼ joy coont it, my brethren; whan ye come intil mony trials.
3Comin to ken that the testin oʼ yere faith works oot lang‐tholin.
4But let lang‐tholing hae its perfeteness, sae as ye may be perfete and complete, wanting in naething.
5Gin ony oʼ ye want wisdom, lat him be seekin frae God, wha gies in rowth till aʼ, and wytes‐na; and it sal be gien him.
6But lat him seek in faith, wiʼ nae switherin; for he wha has switherin doots, is like a sea‐wave, caʼd wiʼ the wind, and tossʼd wiʼ the storm.
7For lat‐na siccan a man think he sal hae onything oʼ the Lord:
8He, wiʼ a twafauld mind, unsiccar in aʼ his ways!
9Lat the lowly brither joy at his uplifting;
10But the rich in his bein brocht laigh; for, as the bloom oʼ the gerss he is to pass awa.
11For uprises the sun, wiʼ its birsʼlin heat, and birsles the gerss; “and its blume faʼs awa,” and the ee‐sweetness and beauty oʼ its face is gane! eʼen sae the rich man dwines awa in his ways.
12Happy he wha tholes trial! for, sae being appruvʼt, he sal hae a croon oʼ Life, promised oʼ the Lord to thae that loʼe him!
13Lat nae ane, whan under trials, sae, “I am tempit oʼ God!” for God is naither tempit wiʼ sin, nor sae tempts he ony ane.
14But ilk ane is #1:14 We say “trial,” whan it comes frae God; and “temp,” whan it comes frae Sautan, or wicked men or oor ain wicked thochts. In auld times, they said “temp” for baith. Sae James here.tempit, whan by his ain desires he is wheedlʼt awa and enticed.
15And the desire, haein conceived, brings forth sin; but the sin, whan aʼ is dune, brings forth death!
16Be‐ye‐na deceivʼt, brethren belovʼd!
17Ilka gude grant, and ilka perfetit gift is frae Aboon, comin doon frae the Faither oʼ lichts; wiʼ wham is nae unsiccarness, nor shadow oʼ gaun back.
18Oʼ his ain wull begat he us wiʼ the word oʼ truth, that we soud be like first‐frutes oʼ his creation.
19Ye ken this, my brethren belovʼd! But let ilka man be gleg to hear, backwart to speak, refusin to be angʼerʼt.
20For manʼs angʼer works‐na‐oot Godʼs richtousness.
21Sae than, pittin by aʼ vileness and owercome oʼ wickedness, tak till ye in meekness the inborn word, that is able to save yere sauls.
22But become ye word‐doers, and no word‐hearers alane, deceivin yere ain sels.
23For, gin ane is a word‐hearer, and no a word‐doer, he is but like a man seein his born face in a keekin‐gless.
24He sees his sel, and awa he is gane: and belyve he minds‐na what sort he was like!
25But he wha obteens a closer sicht intil a better and perfete rule, a rule oʼ libertie, and taks aye heed thare‐till, bein no a hearer forgettin, but a wark‐doer, this ain is blessʼt in his doin.
26Gin ony ane thinks to be doin religious service, and commauns‐na his tongue, but mislippens his ain heart, this aneʼs religious service is nocht ava.
27The service oʼ religion, pure and perfete afore oor God and Father is this: To be visitin faitherless and widows iʼ their dool, to keep his sel unstained frae the warld.
Currently Selected:
James 1: SCO1904
Highlight
Copy
Compare
Share
Want to have your highlights saved across all your devices? Sign up or sign in
Translated by Rev William Wye Smith. Published in Paisley, Scotland in 1904.
