1 John 5
5
CHAPTIR FYVE.
Hoo ane is born again: and hoo it is seen and kent.
1Whasae believes that Christ is the Anointit, is begotten oʼ God; and ilka ane that loʼes him that begat, loʼes him as weel that is begotten oʼ him.
2By this we ken that we loʼe Godʼs bairns, when we loʼe God, and are keepin his commauns:
3For this is the love oʼ God, that we soud keep his commauns; and his commauns are na burden.
4For aʼ that is born oʼ God owercomes the world; and this is the victory that overcam the warld, eʼen oor faith.
5And wha is he that owercomes the warld, but he that believes Jesus is Godʼs Son?
6This is he wha came baith by watir and blude, Jesus Christ; no in watir alane; but by the watir and by the blude.
7And it is the Spirit that is bearin witness, for the Spirit is truth.
8For thar are thrie that are giean witness, the Spirit, and the watir, and the blude; and the thrie are for the ae thing.
9Gin we accept the witness oʼ men, the witness oʼ God is mair; for this is the witness oʼ God, that he has witnessed anent his Son.
10He wha hauds to the Son oʼ God has the witness in himsel; he wha lippens‐na God, has made him oot fause; for he hasna pitten faith iʼ the witness God has witnessed enent his Son.
11And here is the witness: that God has giftit us wiʼ eternal life, and this life is in his Son.
12Wha has the Son has the life; and wha hasna the Son oʼ God hasna the life.
13Thir things I wrate to ye that ye micht ken #5:13 Aʼ throwe this chaptir, the “witness” the Spirit gies the believer, isna some excitit rapture, but plain evidence oʼ word and statement: something to be understude, and received, and believed iʼ the heart; and actit on iʼ the life!ye hae eternal life; to you wha are pittin faith iʼ the name oʼ the Son oʼ God.
14And this is the freedom oʼ speech that we hae toward him; that, gin onything we be askin, conform to his wull, he hearkens to us.
15And, gif we ken he hearkens to us, whatna thing we may be askin frae him, we ken that we hae the askins that we askit oʼ him.
16Gin aiblins ony ane soud see his brither sinnin a sin no to death, he sal ask, and he wull gie him life, for thae sinnin no to death. Thar is a sin to death: no anent that am I sayin that he soud mak request.
17Aʼ wickedness is sin, and thar is sin no to death.
18We ken that nae ane begotten oʼ God is sinnin; but anent him wha was begotten oʼ God — he keeps him, and yon Ill‐ane disna touch him.
19We ken that we are oʼ God, and the hail warld is in the airms oʼ the Ill‐ane.
20But we ken the Son oʼ God has come, and has gien us an inward sicht, that we may comprehend the True Ane; and we are in the True Ane; in his Son Jesus Christ. This is the true God, and, and life‐for‐aye.
21Dear bairns! gaird yersels frae eidols!
Currently Selected:
1 John 5: SCO1904
Highlight
Copy
Compare
Share
Want to have your highlights saved across all your devices? Sign up or sign in
Translated by Rev William Wye Smith. Published in Paisley, Scotland in 1904.
