1 John 4
4
CHAPTIR FOWR.
We arena to lippen ilka spirit, but to follow true spirits. Hoo to ken siclike.
1Weel‐loeʼd anes! lippen‐ye‐na aʼ spirits, but try the spirits, gin they be oʼ God! for mony fause‐prophets are gane oot intil the warld.
2Hereby ken ye the spirit oʼ God: ilka spirit that owns Jesus Christ, as haein come iʼ the flesh, is oʼ God;
3And ilka spirit that owns‐na Jesus, is noʼ oʼ God. And this is the spirit oʼ antichrist that ye heard oʼ as comin; and eʼen noo is it iʼ the warld.
4Ye are oʼ God, dear bairns, and hae owercome them; for greater is he that is in you than he that is in the warld.
5Thir are oʼ the warld; and sae they speak oʼ the warld, and the warld hearkens to them.
6We are oʼ God! He that kens God, hearkens to us; and he that isna oʼ God hearkens‐na till us: and sae we ken the spirit oʼ truth and the spirit oʼ error.
7Beloved, lat us loʼe ane anither; for love is oʼ God; and ilk ane that loʼes is begotten oʼ God, and kens God.
8He that loʼes‐na, neʼer kent God: for God is love.
9And sae was made to be seen the love oʼ God in us, that God sent oot his only‐begotten Son into the warld, that we micht leeve throwe him.
10In this is love — no that we loʼed God, but that he loʼed us, and sent oot his Son, a coverin‐ower for oor sins.
11Beloved! gin God sae loʼed us, we too soud loʼe ane anither,
12Nae ane has at any time seen God; gin we be loʼein ane anither God bides in us, and his love has been made perfete in us.
13And thus we ken that we bide in him, and he bides in us, on account oʼ his Spirit he has gien us.
14And we hae #4:14 John says, “Nae ane has at ony time seen God,” that is the Faither: but since the Apostles had seen Christ, he had seen God. And our Lord says the same, John 14:9.seen him, and gie witness that the father has sent oot the Son, as the Saviour oʼ the warld.
15Whasae may own that Jesus is the Son oʼ God, God bides in him, and he abides in God.
16And we hae come to ken and to believe the love that God has to us. God is love; and he wha bides in love, bides in God, and God bides in him.
17Herein is love perfetit in us, that we may hae freedom oʼ speech iʼ the day oʼ judgment, in that, eʼen as he is, sae are we iʼ this warld.
18Fear bides‐na in love; nay, perfete love casts oot fear; for fear has misery, and wha fears isna made perfete in love.
19We loʼe, for that he first loʼed us.
20Gin aiblins any ane soud say, “I loʼe God!” and is hatin his brither, he is a leear; for he that loʼes‐na his brither wham he has seen, hoo can he be loʼein God wham he hasna seen?
21And this commaun hae we frae him, that he wha loʼes God is to be loʼein his brither as weel.
Currently Selected:
1 John 4: SCO1904
Highlight
Copy
Compare
Share
Want to have your highlights saved across all your devices? Sign up or sign in
Translated by Rev William Wye Smith. Published in Paisley, Scotland in 1904.
