Amaköri gha Bhatomu 26

1Niho Aghiribha akamobhoorera Bhawuro akabhugha, “Noonyi no omweya o ghwitachura.” Niho, Bhawuro aghaghöröröki okubhökö, aghasëëma ghwitachura arabhugha, 2“Oo omutëmi Aghiribha, reero nekwiyoghu kubha neenyi no orubhango, gho kubha niimeeriire ambërë yaacho gho ghwitachura ighoro e ghoose ghano Abhayahuuti bhansëmiire. 3Nichömiiru chwee gho kubha iye weeche bhoheene chaasughara choose che Bhayahuuti, na ghoose ghano bhakuhakaanera. Gho ghayo neghoghusabha wiköngʼëërëri untëghëërërë.

4“Abhayahuuti bhoose mbeeche bhoheene kebhuno neere nimanyiri nabho mo‑se yiito, korwera bhoona bhoone, mbagha kohikera eriibhagha rino nimanyiri Yerusareemu. 5Ibho mbaamënyiri eni kwo meeka myaru, bharasiigha, mbaghotora konduuseri obhwibhateri kubha, nighöötiri chaasughara choose che Mabharisaayo. Kinya mweche Amabharisaayo bhayo nibho ꞉bhaare bhariiköngʼi ghughööta emeghiro ghe Ryobha ghokera chatiini chiito echende choose. 6Ghano ghaghughëri neteneru ekiina kwo meghiro reero, n‑gho kubha, neghotoora amiitëngʼërö mo‑riiraghano rino Eryobha ꞉riiraghiire bhasookoro bhiito. 7Eriiraghano riyo niryo amatöngö ghoose ikomi na abhere gha mo‑se yiito ghaghwitëngʼëra kubha, Eryobha ndekorehikeerani. Nighyo gheghughëri bhararisëngëra Eryobha obhotiko no omwishe. Oo omutëmi, neghusëmu na Abhayahuuti bhano reero, gho ghiri e miitëngʼërö ghayo! 8Ngwake inyu mokwanga ghokumi kubha Eryobha ndekoryoki abhaku?

9“Koru eni woose eriibhagha riire neere nerarighi kubha, nekwëndëru nibhe neraryanga eriina re Yesu o Nasareeti gho nchëra yoyoose yiire. 10Amangʼana ghayo nigho ꞉niiköriri iyo Yerusareemu. Eni mwene neere neriisherereru na abhakoro bha bhachaama kubha, nebhaghöötë abhatööbhiyu abhamu nekabharëkëra mo‑maghërëcha. Hano abhamu ghate yaabho ꞉bhaare bharateneru ekiina ghe ghwitu, eni neere umu o bhayo ꞉bhaabhateniire ekiina abhaato bhayo. 11Wiiki neere neraghe mo‑masinaghooghi gha Bhayahuuti kobharööna‑mu mara kaaru, mbagha bhamwange Yesu. ꞉Neebhakarariire chwee, mbagha neekabha nerabhatabhara koru na mo‑meghya ghe chaase echende.

12“Mbe, kinya bhuure neere niishereriiru na kuraghereru na abhakoro bha bhachaama, orosiko rumu neere mo‑nchëra neraghe mo‑moghya o Tamaasiko. 13Oo omutëmi, hano neere mo‑nchëra eriibhagha re chaasa ishaasabhe che mwishe, hayo hayo nekarighi obhwero bhuhaari koru Mwishaaro. Obhwero bhuyo mboore bhorakera emirëngaari ghe ryobha, bhoghaturëngaari chambaara choose, eni haghirohamu na bhano ꞉tuuköriri nabho orughëndö. 14Bhoose tooghagho haase. Nekooghu eriiraka reramboorera mo‑ghighambo kiito ghe Kebhuraaniya rerabhugha, ‘Oo Sawuri! Oo Sawuri! Ngwake okunyaaki? Kana nokwinyahaara bhoowa kinya atikere ino ekurëkërëra omusëghërë erihöröchö re mutëmi waache!’

15“Nekabhoori, ‘Oo Omutëmi, iye niiye we?’ Aghangarokeri akabhugha, ‘Eni neeni Yesu, uno iye okunyaaki. 16Ibheere obhooke, wimeerere! Niyëërëkiri ghokoocho gho ghiri nekwahure ubhe omutamishi waane, obhabhoorere abhande amangʼana ghano orooche reero, na ghano ghoose neghokwërëki. 17Neekubha neraghotoori koru mo‑mabhökö gha Bhayahuuti, na gha bhaato bha matöngö bhano neghoghotoma ghokoobho, 18gho ghiri obhahunyure amiisho, mbagha bharu mo‑kengʼuuri bhiigharurere obhwero, na bharu mo‑bhukangati bho Rishambu, bhiigharurere Eryobha. Hangʼu niho bhakwabhëru amasari ghaabho, mbaakubha haghirohamu na abhande bhoose bhano bhamusuru gho nchëra e ghonkumi.’

19“Gho ghayo, oo omutëmi Aghiribha, hano nerooche amarighi ghayo gharuure Mwishaaro, nteghachëëriri. 20Neghasëëma kweghi abhaato bha iyo Tamaasiko kubha, bhatuukuunere amasari ghaabho, bhiigharurere Eryobha. Bhabhe bharaköra amaköri machömu ghano ghakwërëki kubha mbatuukuuniri amasari ghaabho. Nekamara nekeeghi amangʼana ghayo ghayo mo‑bhaato bha Yerusareemu, na bha mukööwa o Yuteya, na mo‑bhaato bha matöngö. 21Ghayo nigho ꞉ghaaghëriri Abhayahuuti bhaghangööta hano bhambwine Mwisëngërö, bhaghakiibhi koonyita. 22Koru hangʼu, Eryobha ndentooriri mbagha kohikera orosiko runo ro reero. Nikyo ˆgheghaghëri ˆnekiimeerera hano ambërë e bhakoro, na ambërë e bhaato bha haase, neghosiikëra amangʼana ghano ꞉neerooche. Ghataanyi‑ho wiiki amangʼana aghande ghano neghosiikëra ghokera ghaare ꞉ghaasiikiiru na abharööti, na ghano ꞉ghaasiikiiru na Musa, kubha ngakorwera. 23Ibho ꞉mbaabhughiri kubha, Kirisito nakwëndëru anyaakibhu, wiiki abhe niwe o mumbërë koryoka koru mo‑bhaku, gho ghiri araghani kubha, obhwero bho bhotoori ˆbhokabharëngaareri abhaato bhoose, Abhayahuuti na abhaato bha matöngö.”

24Hano Bhawuro are ariitachura, hayo hayo Bheesito aghasiikëra kwo riiraka ikoro arabhugha, “Oo Bhawuro! Kana m‑mochuuru onyi! Ghusöma koocho kwaru ˆghoghaghughëri ochuure!” 25Mbe, Bhawuro akamugharokeri akabhugha, “Oo omosooku Bheesito, eni taanyi mochuuru neenyi. Amangʼana ghano neghosiikëra n‑gha hëënë. 26Koru omutëmi Aghiribha neeche bhoheene amangʼana ghano. Neenyi no obhuhëënë kubha, teenyi‑ho ngʼana koru imu ino ateeche, gho kubha amangʼana ghayo ghataaköruru gho kobhisa. Gho ghayo, neghotora ghosiikëra ambërë yaache kwo bhosubhesubhe. 27Oo omutëmi Aghiribha, noghoghakumi ghoose ghano ꞉ghaasiikiiru na abharööti? Eni nyeeche bhoheene kubha noghoghakumi.”

28Niho Aghiribha akamobhoorera, “Kana, nokwihëëbha kubha kwo mangʼana masuuhu kinya ghano, noghungarura nibhe Omokirisito!”

29Mbe, Bhawuro akamugharokeri akabhugha, “Nengabha kwo mangʼana masuuhu, hande maaru, neghusabha Eryobha ighoro yaacho, n‑ighoro e bhaato bhoose bhano bhaghuntëghëërëra reero, kubha mubhe kinya eni neenyi, amare etabha mo‑minyörörö ghino.”

30Niho omutëmi haghirohamu no omukangati Bheesito na Bheerinike, na abhande bhano ꞉bhaare bhiikeere hayo bhakiimeerera, bhaghatanura. 31Hano ꞉bhaare bhararu hayo, bhakabhoorani bharabhugha kubha, “Omooto uno, taaköriri ghyokyose kino kengaghëriri itu, koru kubhöhu.”

32Aghiribha akamobhoorera Bheesito akabhugha, “Omooto uno nangabheere atasabhiri kubha ekiina keeche gheteneru o‑Kayisaari, nangatighoorokuru.”

Currently Selected:

Amaköri gha Bhatomu 26: ntk

Highlight

Copy

Compare