Amaköri gha Bhatomu 27

Bhawuro ˆakahiru mo‑moghya o Ruumi

1Hano bhamariri bhakahatëka kubha tughëndë#27:1 Korwera hano mbagha mo‑ghisëku ke 28:16, wiiki Ruuka aghaköra orughëndö haghirohamu na Bhawuro gho ghiri abhe aramotoori mo‑mënda ghaache. na ameeri mo‑se e Itaariya. Niho Bhawuro na abhabhöhu abhande bhakahaanu kwo mokoro umu o bhaashirikare, eriina reeche Yuriyo, o rikinda re bhaashirikare bha Kayisaari Aghosito. 2Mo‑rughëndö ruyo tooghaye haghirohamu na Arisitaariko, o moghya o Tesaronike o mo‑mukööwa o Maketoniya. Mbe, toghatiira mo‑meeri ino ere eraru mo‑moghya o Atiramitiyo erëërëkëra mo‑chabhandaari che mo‑mukööwa o Asiya.

3Orosiko ro kabhere, tokahika mo‑moghya o Sitooni. Yuriyo akamukörëra Bhawuro bhoheene gho komwisherereri arighani na abhasaani bhaache, kubha bhamotoori mo‑mënda ghaache. 4Tookaru hayo tökëëndërëra no orughëndö rwito, tokaheta anyuma e gheghinga ghe Kiibhuro eribhaara re masaabha kubha twibhareke obhukama, gho kubha m‑bhuhaari chwee bhoore. 5Tokaambuka anyancha iyo gho kohetera rubhareka ro se e Kirikiya, na Bhambiriya, tokahika mo‑moghya o Miira mo‑mukööwa o Rikiya. 6Hayo, omokoro uyo o bhaashirikare akabhöna‑ho ameeri e mo‑moghya o Arekisantiriya ino ere eraghe Itaariya, aghatotiiri‑mu.

7Tokamara chaasiko chaaru toonyi mo‑meeri iyo, orughëndö ndoore ro kiihoro na ro nyaako, mbagha tokahika haghuhe no omoghya o Niito. Obhukama bhuhaari bhoghatuhööchërëra‑ho, totaatoriri koheta hano toore toriitëngʼëra tohetere, eghaghëri tohetere anyuma e gheghinga ghe Kireete, eribhaara re Sarimone. 8Tooghaye toraheta rubhareka bhareka kwo nyaako, tokahika ahaghiro hano hakobherekeru Abhandari Anchömu, haghuhe no omoghya o Raaseya.

9Ntoore tumariri eriibhagha irë mo‑rughëndö, koru chaasiko che nyangi e kwiyima ebhiinyakurë#27:9 Kwiyima ebhiinyakurë, neere anyangi e Bhayahuuti ino ere eraköru mo‑mwëri o kende hande mo‑bhutaachu bho mwëri wi ikomi. cheekabha chehetiri. Gho ghayo, tokarighi kubha aribha törëëndërëra no orughëndö ruyo, ntongabheere mo‑bhobhe. Eghaghëri Bhawuro abharwache abhaghëndi bhayo arabhugha, 10“Oo abhasooku, nerooche kubha orughëndö rwito runo ndoghoturëëtëra atabhaaribhaari. Ameeri ino haghirohamu ne emerigho gheeche, ghyose ngekomeru mo‑nyancha. Koru itu bhoose ntoghotora tooghaku.”

11Omokoro uyo o bhaashirikare tiishereriini na amangʼana gha Bhawuro, aghasiigha amangʼana gha muntërëbha o meeri no omwene ameeri iyo. 12Haghirohamu na ghayo, ahaghiro hayo hataare hachömu ghwikara mo‑riibhagha re nyighita. Eghaghëri abhaato bhaaru bhano ꞉bhaare mo‑meeri iyo bhiishererani kubha bharu hayo, bharighi aribha bhaghotora kohika Bhoyinike, eribhaara erende re mo‑gheghinga kiyo kiyo ghe Kireete, bhaghi bhiikare iyo mbagha eriibhagha re nyighita resire. Abhandari e Bhoyinike iyo neere eribhaara re bhonyancha.

Bhawuro na abhaghëndi ˆbhakanyaaka chwee mo‑nyancha

13Bhokamara obhukama bhumangi bhoghasëëma kohuuta koru eribhaara re bhachuuta. Bhaghiituuri kubha ekabha kinya ꞉bhaare bharëënda. Niho bhaghasëëma orughëndö, bhaakaru hayo bhaaghaye bharahetera mo‑chambareka che gheghinga kiyo ghe Kireete. 14Hano toore toraru hayo, mo‑gheghinga kiyo kwo riibhagha isuuhu, bhokarwera‑ho obhukama bhuhaari chwee bhuno bhokobherekeru Ewurakiro.#27:14 Ewurakiro. Egheteemoro ekende ngeghotora kubha, obhukama bho bhachuuta. 15Obhukama bhuyo mboore bhoratëmatëma mo‑rubharu ro meeri iyo. Nangabha tunyaakiini nabho, amare bhoghatokinda. Tokabhotigha bhotohire hano bhokwërëkëra.

16Tokaheta anyuma e ghaghinga ghasuuhu kano ghakobherekeru Kawuta, ghaghatokengera hasuuhu obhukama bhuyo. Hayo toghatora kwo nyaako kobhotoori obhwato bho ghotooreri abhaato bhuno bhoore bhorahiru na amanche. 17Hano abhahöki bha mo‑meeri bhamariri kobhoruta obhwato bhuyo, bhakabhotiiri mo‑meeri, bhakiinaareri chaasiri ameeri iyo, gho ghiri etabhaaruka. Ibho ꞉mbaatiiniri koyehira mo‑mwishekeenya o nyancha e Siriti mo‑se e Riibhiya, eghaghëri bhaghiiki amatanga gha meeri iyo, bhakayetigha ehiru hangʼu hangʼu no obhukama.

18Emekunda ghëkëëndërëra ghutëma ameeri iyo. Hano bhookiire, abhahöki bhayo bhaghasëëma kurëkëra emerigho mo‑nyancha. 19Orosiko ro ghatato, bhakaruusi amatanga amakoro gha meeri, ne ebheghiro ebhende bhe ghughëndëri ameeri, bhakabhirëkëra mo‑nyancha kwo mabhökö ghaabho abheene. 20Chekaheta chaasiko chaaru totaakorighi eryobha na chanchöta, na anyancha iyo ekabha ërëëndërëra ghusarëka. Eghaghëri toku omukörö kubha totaakuhöna.

21Abhaato bhayo, bhakamara chaasiko chaaru mo‑nyancha iyo bhataakurë egheghiro, Bhawuro akiimeerera ghateghate yaabho, akabhabhoorera akabhugha, “Inyu abhasooku bhano, kwo riibhagha riire ꞉neebharwachiri iyo Kireete kubha totaru hayo, moore mörëëndëru muntëghëërërë. Aribha mongantëghëëriire, ebheghiro bheenyu bhetangasarëkiri hangʼu. 22Koru hangʼu, ˆnekabhasasaama kubha mwitoore omukörö, gho kubha taanyi‑ho koru umu ghate yiito uno aghoku, ameeri ayeene niyo eghosireekerera.

23“Nyeeche hangʼu gho kubha, eni n‑omooto o Ryobha neenyi, wiiki n‑omutamishi waache neenyi. Obhotiko bho kobhookera reero marayika umu o Ryobha nandweriire imeeriire rubhareka roone, 24akamboorera akabhugha, ‘Oo Bhawuro! Otatiina gho kubha nokohika Ruumi, wimeerere ambërë e Kayisaari. Wiiki umënyë kubha, bhoose bhano moonyi haghirohamu nabho mo‑rughëndö, Eryobha ndekobhatoori kwo ghareeya yaache motasireekerera.’ 25Gho ghayo, inyu, mwitoore omukörö gho kubha, neghokumi kubha ngaghuköru kinya bhuure Eryobha rembooriire. 26Koru hangʼu, ameeri yiito nekwangera mwitötö mo‑gheghinga kimu.”

Bhawuro na abhaghëndi ˆbhaghatoribhu mo‑nyancha

27Tokamara chaasiko ikomi ni inye torahiru no obhukama ino na ino mo‑nyancha iyo e Atiriya. Obhotiko bho kobhookera orosiko ruyo hano bhoghweniri ghate, abhahöki bhayo bhaghiituuri kubha hande abhe ˆbhaghatingʼi mo‑se ayoomu. 28Niho bhaghiiki egheghiro ghe kurëngëra obhwina bho manche, bhakabhöna kubha mboonyi na chamiita miröngö ene. Hano bhiishukiri ambërë hasuuhu, bhaghiiki ekirëngërë kiyo wiiki, bhakabhöna kinya chamiita miröngö etato. 29Bhaghatiina kubha ameeri nengihuniri mo‑matare, eghaghëri bhiiki chananga inye che kwimeerereri ameeri chino cheere anyuma. Bhaghasabha kubha bhoki bhwango.

30Hano abhahöki bha mo‑meeri bhayo ꞉bhaare bharëënda kungʼösa koru mo‑meeri. Niho bhaghiiki obhwato mo‑manche, bhariiköri kinya mbakwënda kurëkëra ananga eribhaara re mbërë re meeri. 31Bhawuro akamobhoorera omokoro uyo o bhaashirikare, haghirohamu na abhaashirikare bhaache akabhugha, “Abhaato bhano aribha bhataaghusaagha haghirohamu na niitu mo‑meeri ino, inyu motaakuhöna.” 32Niho abhaashirikare bhayo bhakanunga chaasiri chino cheere chibhöhiri obhwato bhuyo, bhakabhotigha bhogho mo‑nyancha.

33Hano bhoore bhokeere ghuke, Bhawuro akabhasasaama abhaghëndi bhaache bhoose bharaaghërë gho kobhabhoorera arabhugha, “Reero mumariri chaasiko ikomi ni inye moonyi mo‑haho, na ghetaanyi‑ho gheghiro kino ꞉mooriire. 34Ibheere nekobhasasaama muraaghërë, gho ghiri mwëndërërë kubha abhahöru. Taanyi‑ho umu ghate yaanyu uno akobhori koru orochweri rumu mo‑mutu waache.” 35Hano Bhawuro amariri ghosiikëra ghayo, akiimoki omughaate ambërë yaabho bhoose akabhugha, ˆoghachömi Waryobha, akawosuura aghasëëma kurë. 36Niho bhayo bhoose bhaghatooru omukörö, bhoose bhakaraaghëra. 37Abhaato bhano toore mo‑meeri iyo, ntoore amaghana abhere na miröngö mohungate na bhasaasabhe. 38Hano abhaato bhoose bhamariri kuraaghëra na ghwighota, bhakarëkëra angano mo‑nyancha, kubha bhasuuhi obhorito mo‑meeri iyo.

39Hano bhookiire bhoheene, abhahöki bhayo bhakarighi ahaghiro hano amanche ghasöhiri mo‑se ayoomu ino ere no omwishekeenya, amare bhataamanyiri n‑ase ke. Bhaghiishererani kubha, aribha ekubha bhayetighe ameeri iyo isöhë ahaghiro hayo. 40Niho bhakarëkëra chananga choose na ghochetigha mo‑nyancha, eriibhagha riyo bhaghatimbora chaasiri chino cheere chighöötëriire obhosikaani, bhakamara bhakiimeereri eritanga re mbërë riichori obhukama bhoyetughute ameeri kwërëkëra mo‑se iyo ayoomu. 41Ameeri iyo hano yishukiri ambërë hasuuhu, ekahika hano emighëri ebhere ghe nyancha ghitëmëëraniire, eghasöhi omutu waache gho changuru mo‑mwishekeenya, ekibhandereri‑mu. Ibheere ekabha eratëmu ne emekunda ghe manche gho changuru anyuma yaache, mbagha eghasëëma ghoteneka ebhetenekateneka.

42Abhaashirikare bhaghasëëma obhobhe bho kobhiita abhabhöhu bhoose atabha‑ho koru umu uno angiishaghiri na kungʼösa. 43Amare omokoro waabho uyo ꞉nëëndiri kobhotoori obhuhöru bho Bhawuro, akabharëki abhaashirikare bhayo bhataköra hangʼu. Niho akabhabhoorera abhaato bhoose bhano bhaghotora kurabhacha bhashame kwirëkërë mo‑manche, bharabhache mbagha bhatëënyë bhahike mo‑se ayoomu. 44Bhano bhaghusaagha bhiimoki chambaawe, hamu ebheteneka bhe meeri iyo, bhatëënyërë. Mbe, niho itu bhoose toghatëënya tokahika mo‑se ayoomu toonyi abhahöru.

Currently Selected:

Amaköri gha Bhatomu 27: ntk

Highlight

Copy

Compare