SALM 66
66
Thangṭhatnak le Lawmhnak Hla
David Hla
1Mi vialte hna, Pathian cu
lunglawmhnak in thangṭhat tuah u!
2A sunglawimi a min kha hla in thangṭhat u,
sunparnak in thangṭhat u.
3Pathian sinah cun, “Na tuahmi thil hi
zeitluk in dah khuaruahhar an si.
Na lianhngannak kha a ngan tuk caah
na ral cu na hmaiah therphang in
an kun.
4Vawlei cungmi vialte nih an in biak i
hla in an in thangṭhat,
na min kha hla in an thangṭhat,”
tiah chim u.
5Ra u law Pathian nih a tuahmi thil hi
zoh hna hmanh u,
minung sinah a tuahmi thil
khuaruahhar hi zoh hna hmanh u.
6Rili cu vawlei ro ah a canter i
kan pupa hna nih tiva cu an ke in an tan.
Cuka ah cun, a tuahmi thil ruangah
khan kan i lawm. #Exo 14.21; Jos 3.14-17
7A ṭhawnnak in a uk zungzal i miphun
hna cu a ngiat zungzal hna.
Ahohmanh amah doh awkah ral tho
hna hlah seh.
8Miphun vialte hna, kan Pathian cu
thangṭhat tuah u;
nan thangṭhatnak cu thanter u.
9Amah nih nung dam tein
a kan umter i
tlu loin a kan umter.
10Maw Pathian, nangmah nih
na kan hneksak;
ngun cu mei in an thianh bantukin
kannih zong na kan hneksak ve.
11Rap ah na kan foihter i kan keng ah
thilrit na kan khinh.
12Kan ral nih khan an kan lamh beh;
tilian le meisul lakah na kan kalter,
asinain atu cu himnak hmun
na kan phakter.
13Na inn ah khangh thawinak kha
ka rak put lai;
bia kaa kammi kha kan pek lai.
14Harnak chung ka rak um lio i
kan pek lai ka timi kha
kan pek lai.
15Biakṭheng cung i khangh awkah
tuu kha ka rak put hna lai,
meheh khanghmi rim thaw kha
aa zel lai i,
cawtum le meheh kha raithawinak
ah kan pek chanh hna lai.
16Pathian a upatmi vialte hna,
ra u law ra ngai tuah u;
Pathian nih ka ca i a tuahmi kha
kan chimh hna lai.
17Pathian cu bawmhnak duh ah
ka rak auh;
amah cu hla in ka rak thangṭhat.
18Ka sualnak kha rak thup ning law
ka thlacamnak cu
a rak ka ngaihpiak hnga lo.
19Sihmanhsehlaw Pathian nih cun
a ka theihpiak i
ka thlacamnak cu a ka ngaihpiak.
20Pathian nih ka thlacamnak kha
a ka hlawtpiak lo i
a fekmi a dawtnak kha
ka sinin ṭhial loin a um caah,
amah cu ka thangṭhat.
Currently Selected:
SALM 66: HCL06
Highlight
Copy
Compare
Share
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
