SALM 148
148
Van le Vawlei Hna Pathian Thangṭhat U
1 Bawipa cu thangṭhat u!
Cung sangpi i a ummi hna,
Bawipa cu vancung khin
run thangṭhat u!
2A vancungmi vialte hna,
amah cu thangṭhat u,
a vancung ralkap vialte hna,
amah cu thangṭhat tuah u!
3Ni le thla hna, amah cu thangṭhat u!
A ceumi arfi hna, amah cu
thangṭhat u!
4Van sang bik hna, amah cu
thangṭhat u,
vancung i a ummi ti hna, amah cu
thangṭhat u!
5An dihlak in Bawipa min cu thangṭhat
hna seh!
Bia a chim i annih cu ser an si;
6amah nawl pekmi thawngin
annih cu
an umnak hmun cio ah khan
zungzal in an um i
a nawl ngai loin an um lo.
7Rili chung thil ṭihnung hna le
rilipi thuk hna,
Bawipa cu vawlei ah hin
thangṭhat u!
8Nimtlau le rial, hawhra le khuadawm,
a nawl a ngaimi thlichia,
nannih nih Bawipa cu thangṭhat
ko u!
9Fing le tlang hna, thingthei kung le
tupi hna,
amah cu thangṭhat u!
10Saram vialte hna, inn zuat saṭil le
ramlak saram hna,
a paw in a lawnmi le vate
vialte hna,
nan dihlak in amah cu thangṭhat u.
11Siangpahrang vialte le mi vialte hna,
uktu le bawi vialte hna,
amah cu thangṭhat u!
12Tlangval le ngaknu hna,
tar le no le ngakchia vialte hna,
amah cu thangṭhat u!
13An dihlak in Bawipa min cu thangṭhat
hna seh!
A min cu min dang vialte nakin
a ngan deuh;
a sunparnak nih van le vawlei
a lonh hna.
14A miphun kha miphun ṭhawng ah
a ser hna,
cucaah a mi vialte nih an thangṭhat,
a dawt ngaingaimi Israel mi nih
khan an thangṭhat.
Bawipa cu thangṭhat u!
Currently Selected:
SALM 148: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
