SALM 145
145
Khamhtu Pathian Thangṭhatnak Caah
David Hla
1Ka Pathian le ka siangpahrang,
na lianhngannak cu
ka thanh lai i
nangmah cu a zungzal in
kan lawmh lai.
2Nifate in kan thangṭhat lai i
a zungzal in kan lawmh lai.
3 Bawipa cu a lian a nganmi a si,
fak piin thangṭhat awk a si;
a lianhngannak cu
kan hngalh khawh leng a si.
4Na tuah sernak cu chan khat hnu
chan khat thangṭhat a si lai,
thil khuaruahhar na tuahmi cu
aupi an si lai.
5Mi nih na sunparnak le lianngannak
kha an chim lai,
kei nih thil khuaruahhar na tuahmi
kha ka ruat hna lai.
6Mi nih thil khuaruahhar na tuahmi
kha an chim hna lai,
kei nih na lianhngannak kha
ka thanh lai.
7Annih nih na ṭhatnak kha
an chim lai,
na velngeihnak kha hla in
an sak lai.
8 Bawipa cu dawtnak a ngeimi le
mi zaangfah thiammi a si,
thinhun a har i a fekmi dawtnak in
a khatmi a si.
9Aho cung paoh ah a ṭha i a sermi hna
an dihlak cungah zaangfahnak
a ngei.
10 Bawipa, na sermi thil vialte nih
an in thangṭhat lai,
na sermi hna nih an in lawmh lai!
11Na pennak a sunpar ning kha
an chim lai i
na ṭhawnnak kha an thanh lai.
12Cucaah mi vialte nih thil khuaruahhar
na tuahmi kha an hngalh lai i
na pennak a sunpar ning le
a lianhngan ning kha
an hmuh lai.
13Na pennak cu zungzal in a hmun lai i
nangmah cu zungzal in
siangpahrang na si lai.
Pathian nih cun biakamnak
a tuahmi kha
zumhawktlak tein a zulh i
a tuahmi thil paoh kha an ṭha dih.
14Harnak a ingmi kha a bawmh hna i
ṭhumhnak a tongmi kha
a cawi hna.
15Ruahchannak he na sermi thil nung
vialte nih an in zoh i
an herhmi rawl kha an herh
caan te ah a pek hna.
16Na kut na samh i an dihlak in
an herhmi kha
tling tein an hmuh.
17 Bawipa cu thil a tuahnak paoh ah hin
ding tein a tuahmi a si,
rian a ṭuannak paoh ah hin
zaangfahnak a ngeimi a si.
18A autu vialte hna cu an pawng khin
an umhnawh hna,
lungtak in a autu vialte hna cu.
19Amah a ṭihmi paoh cu an herhmi
vialte kha a pek hna i
an aunak kha a theih i a khamh hna.
20Amah a dawtu cu an dihlak in
a huhphenh hna,
sihmanhsehlaw miṭhalo cu
a hrawh dih hna lai.
21 Bawipa cu ka thangṭhat lai,
thilnung vialte nih a min thiang cu
zungzal in thangṭhat hna seh!
Currently Selected:
SALM 145: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
