SALM 139
139
Pathian Nih A Hngalh Dih
1 Bawipa, na ka kawl dih hirhiar i
na ka hngalh dih cikcek!
2Ka tuahmi vialte cu na hngalh dih,
lamhlatpi khin ka ruahnak vialte cu
na hngalh dih ko hna.
3Rian ka ṭuan ah siseh, kaa dinh ah
siseh, na ka hmuh,
ka tuahmi vialte kha na hngalh dih.
4Ka chim hlan in ka chim ding vialte
kha na hngalh dih.
5Ka hnulei le ka hmailei in
na ka cawngh i
ka cungah na kut na zar.
6Na ka hngalhnak hi a thuk
tuk hringhran,
ka ruahnak nih a phak khawh
leng a si.
7Na thlarau sin hin khuazei ah dah
ka zam khawh lai?
Na hmaika hin khuazei ah dah
kaa thuh khawh lai?
8Vancung ah khin hung kai ning tiah,
cuka ah cun na rak um ko lai,
mithi khua ah khin vung
it ning tiah,
cuka zongah cun na rak um
ṭhiamṭhiam ko lai.
9Nichuahlei ha khin lo diam in
hei zuang hnik ning law,
asiloah nitlaklei a hlatnak bik hmun
zongah khin hei um hnik
ning law,
10cuka zongah cun a ka hruaitu
dingah nangmah na rak um
ṭhiamṭhiam ko lai,
a ka bawmtu dingah na rak um
ṭhiamṭhiam ko lai.
11Muihnak kha, ka thup tuah,
ka hei ti ko hnga,
asiloah, ka velchum i ceunak kha,
zan ah cang ka hei ti ko hnga,
12asinain cucu zeihmanh a ṭhahnem
hlei hnga lo,
zeicahtiah muihnak cu
nang caah cun a mui lo i
zan hmanh kha chun tlukin
a ceu ko.
Nang caah cun muihnak le ceunak cu
zeihmanh an i dang lo.
13Ka pum chung thil vialte hi
nangmah sermi an si dih;
ka nu pawchung i a ka semtertu cu
nangmah na si.
14Hi bantuk thil thuk le khuaruahharmi
thil ruangah hin
nangmah cu kan lawmh:
keimah kong i khuaruahhar
a simi thil le
nangmah nih na tuahmi thil
khuaruahhar a simi hna kong ah
hin kan lawmh.
Nangmah nih na ka hngalh dih
cikcek ko;
15Ka pum hi nang caah cun
khuaruahhar awk a si lo,
zeitindah a thli tein muisam
ka hun ken le
ka nu pawchung ah zeitindah
ka hung ṭhan ti kha
nang na caah cun khuaruahhar
a si lo.
16Ka chuah hlan in na rak ka hmuh
diam cang.
Ka ca i na sermi ni hna cu na cauk
chungah an rak i khumh
diam cang,
hram an i thawk hlan hmanh khan
an i ṭial diam cang.
17Maw Pathian, na ruahnak cu ka caah
zeitluk in dah hngalh a har,
na ruahnak cu a tam tuk ah
a dongh in a dong kho lo.
18Rel tim hnik hna ning law thetse
nak tam an si ṭung;
an dihlak in rel dih dingah cun,
nangmah chan can nun
a hau hnga!
19Maw Pathian, miṭhalo kha cu
that ko hna, ti ka duh.
Mipuarhrang pawl nih hin
ka kaltak hna seh, ti ka duh
hringhran ko.
20Nangmah kong ah thil ṭhalo lawng
an chim i
na min chiatnak lawng kha
an chim lengmang.
21 Bawipa nangmah an huatu cu
ka huat ve hna,
nangmah an dohtu cu zei ah
ka rel ve hna lo.
22Huat taktak in ka huat hna i
ka ral ah ka rel hna.
23Maw Pathian, ka pur cikcek law
ka lungthin hi hngal ko;
ka hneksak law ka ruahnak hi
hmu ko.
24Ka chungah hlenthawinak a um sual
hnga maw?
a um sual ahcun ka hmuhpiak law
zungzal hmunmi lam ah khan
ka hruai ko.
Currently Selected:
SALM 139: HCL06
Highlight
Share
Compare
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
