PHUNGTHLUKBIA 8
8
Fimnak Cu A Ṭha I Zungzal In A Hmun
1Fimnak cu a au i hngalhthiamnak nih
a kui kha ngai tuah. #Phut 1.20-21
2Lam pawng hmun sang ah khan,
lam tonnak ah khan a dir;
3Khua hauka kutka pawngah, luhnak
kutka ah khan a au i,
4“Maw mi hna, nanmah cu
kan auhmi hna nan si,
mi vialte, nan dihlak in kan nawlmi
hna cu nan si:
5Maw mihrut rual hna, fimnak cawng
tuah u; maw lungtlawmmi hna,
ṭha tein ngai tuah u.
6Ngaihmanh u, thil ṭha kha
ka chim lai,
ka hmur in ahmaanmi bia kha
a chuak lai;
7Ka kaa nih biatak a chim lai,
holh ṭha lo hi ka hmur caah
fihnung a si.
8Ka kaa chungin a chuakmi
bia vialte cu
a dingmi bia an si dih;
bia cikngerh le hrokhrawl bia pakhat
hmanh an um lo.
9A hngalthiammi caah cun
biading an si dih i
hngalhnak a ngeimi caah cun
ahmaanmi bia an si.
10Keimah cawnpiaknak cu ngun nakin i
lak deuh u, hngalhnak cu sui ṭha
nakin i lak deuh u;
11Zeicahtiah fimnak cu lungvar nakin
a ṭha deuh i
na duhmi vialte nih khan an tluk
naisai lai lo.
12Kei cu fimnak ka si i fimnak kha
ka pek hna
hngalhnak le ruahthiamnak lam kha
ka hmuhsak hna.
13Bawipa ṭihzah cu sualnak huat khi
a si.
Porhlawtnak, ruamkainak le
sualnak lam le biadik lo kha
ka huat hna.
14Hngalhthiamnak le ṭhawnnak zong
keimah ta an si.
15Keimah thawngin siangpahrang nih
uktu bawi an si i
keimah thawngin uktu hna nih
a dingmi phunglam kha
an ser hna.
16Keimah thawngin bawi nih
bawi bantukin an um kho i
vawleicung uktu bawi a simi vialte
hna nih khan uktu bantukin
an um kho.
17A ka dawmi cu ka dawt hna i fel tein
a ka kawlmi nih cun an ka hmuh.
18Rumnak le upatnak kha
ka sinah an um,
a tlomi chaw le duhdimnak hna
zong kha an um fawn.
19Ka theitlai cu sui nakin a ṭha deuh,
sui thiang nak hmanh in
a ṭha deuh,
ka chuahpimi theitlai cu ngun ṭha phun
nakin a ṭha deuh.
20Dinnak lam ah khan ka kal i
biading lam ah khan ka kal,
21A ka dawmi cu rumnak ka pek hna i
an ngun kuang ka khahter.
22 Bawipa nih a rian hramthawknak ah
a ka ser, hlanlio i a tuahmi hna
lakah hmasa bik ka si. #Biat 3.14
23Hlan lio piin a ka hmunhter cang,
vawlei hramthawk hlanah,
a hmasa bik ah a ka ser.
24Ti thuk pipi an um
hlanah khan a ka ser,
ti a khatmi cerhti an rak um rih
hlanah khan a ka ser cang.
25Fing le tlang a ser hna hlanah
keimah cu ka chuak cang;
26Vawlei le a chung i a ummi lo hna
a ser hna hlan le
Vawlei cung leidip hmasa bik
a um hlanpi ah khan
a ka ser diam cang.
27Van hna khi a fehter hna tikah khan
ka rak um cang,
ti thuk cung i a kual,
a pum in a rin tikah khan
ka rak um ko cang;
28Cunglei van hna khi fek tein
a ser hna tikah le
ti thuk cerhti hna cu
a fehter hna tikah khan
29Ti nih khan a nawlbia cu an buar
nakhnga lo rili cu ri a serpiak hna;
vawlei hram kha a hmelchunh
tik ah khan,
30A pawngah khan rian thiam ngaimi
bantukin ka rak um;
keimah cu nifate in aa lawmhnak
ka rak si i
amah hmaiah khan
kaa lawm zungzal.
31Vawlei kha a ser dih tikah a cungah
lente kaa celh i
kaa nuamhnak cu minung hna
chungah khan a si.
32Atu cu ka fapale hna,
ka bia ngai tuah u:
Ka lam a zulmi cu lunglawmmi an si.
33Cawnpiaknak kha ngai u law
fim tuah u,
cun zeirello in um hlah u.
34Ka bia kha a ngai i ka kutka ah nifa
a um i
ka innka pawngin a ka hngakmi cu
milunglawm an si.
35Zeicahtiah keimah a ka hmutu nih
cun nunnak kha a hmuh i
Bawipa sinin duhdawtnak kha a hmuh;
36Sihmanhsehlaw keimah a ka hmu lomi nih cun
amah le amah kha
aa hliam ko;
a ka huatu vialte cu thihnak he
aa duhmi an si,” tiah a ti.
Currently Selected:
PHUNGTHLUKBIA 8: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
