MIKAH 6
6
Israel Cu A Mi Hna Sual Ruangah Mawhchiatnak A Hmu
1Atu cu Bawipa nih a chimmi bia hi
thei tuah u:
Tho tuah law, Bawipa, na bia cu
chim tuah,
tlang hna khi na tehte si
hna seh,
Fing hna nih khin na chimmi cu
thei hna seh.
2Nannih tlang ngan pipi hna,
zungzal in a hmunmi tung vawlei
a dohtu hna,
Bawipa bia hi thei tuah u;
Zeicahtiah Bawipa nih a mi hna
chalh awk bia a ngei i cu bia cu
Israel he an i al lai.
3Maw ka mi hna, nan cungah zei hen
dah ka tuah?
Zeitindah nan tha kan batter hna?
Mah hihi ka let tuah u.
4Izipt ram in kan chuahpi hna,
sal cannak ram in kan tlanh hna;
Nanmah hruai awkah Moses le Aaron
le Miriam kha ka thlah hna. #Exo 4.10-16; 12.50-51; 15.20
5Moab siangpahrang Balak nih nan
cungah tuah a timhmi kha
ruat tuah u, Maw ka mi hna;
Cun zeitindah Beor fapa Baalam nih
a leh kha ruat fawn tuah u;
Bawipa nih nanmah khamhnak caah
a tuahmi kha nan hngalh
khawh nakhnga,
Shittim in Gilgal tiang nan kalnak
kha ruat tuah u. #Nam 22.2—24.25; Jos 3.1—4.19
6 Bawipa cu ka fuh tikah zeidah
kaa put lai?
Cungsang ah a ummi Pathian hmaiah
zeitindah ka kun lai?
Khangh thawinak le kum khat a timi
cawfa hna he maw amah cu
ka fuh lai?
7 Bawipa cu tuukawng a thongthong le
chiti a tiva in a luangmi kha
pe ning law, cucu maw a duhmi cu
a si hnga?
Ka tuah sualmi tlanhnak caah ka fapa
upa bik cu maw ka pekchanh lai?
Ka sualnak caah khan ka fale cu maw
amah cu ka pekchanh hna lai?
8Nannih hmun kip kaa kip i
a ummi vialte hna,
Pathian nih cun thil ṭha kha
zeidah a si ti cu an chimh cang
ko ṭung hna;
An halmi hna cu, ding tein thil ti le
zaangfahnak ngeih le
na Pathian hmai i toidor tein
khuasak kha pei a si ko cu.
9 Bawipa aw cu ngai hmanh u,
Amah min ṭih cu hlawhtlinnak a si.
Bawipa nih cun khualipi cu a thawh i,
10“Khuapi chungah aa pummi hna
ngai hmanh u.
Miṭhalo mi hna inn chungah dinlonak
in an lakmi ro chaw tampi an um.
Tahnak deu ka huatmi kha an hman.
11Khing deu le cuai deu a hmangmi
hna kha ka ngaithiam kho hna
hnga maw?
12Khuapi chung i mirum mi nih khan
sifakmi kha an hrem hna,
Cu hna cu mihrokhrawl lawngte
an si dih.
13Cucaah atu cu nan sualnak ruangah
nan rawhnak ding kha
ka thawk cang.
14A ei cu nan ei lai, sihmanhsehlaw
nan khim lai lo, nan rawl a ṭam
ṭhiamṭhiam ko lai.
Nau nganfahnak cu nan in lai,
sihmanhsehlaw fa cu nan hring
hna lai lo,
Cun nan hrin hna hmanh ah vainam
sin tu ah khan ka pek hna lai.
15Thlaici cu nan tuh lai, sihmanhsehlaw
nan zun lai lo,
Oliv chiti cu nan sur lai,
sihmanhsehlaw
nan hmang hna lai lo,
Mitsur thei cu nan nen hna lai,
sihmanhsehlaw a hang cu
nan ding hna lai lo.
16Omri siangpahrang cawnpiaknak
kha nan i ken,
A fapa Ahab le a innchungkhar nih
an tuahmi kha nannih zong nih
nan tuah ve;
An lam paoh kha nan zulh hna.
Cucaah nannih cu rawk cikcek in
kan ṭhio hna lai,
Miphun dang hna nih nannih cu
an in nihsawh hna lai i
an in serhsat hnanak cu
nan in lai,” a ti. #1Sia 16.23-34; 21.25-26
Currently Selected:
MIKAH 6: HCL06
Highlight
Copy
Compare
Share
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
