MIKAH 4
4
Daihnak Caan A Phak Tikah A Tangmi Kha An Kir Ṭhan Lai
1Hmailei caan ah cun
Bawipa inn a umnak tlang cu tlang
vialte lakah a sang bik a si lai;
Cu tlang ah cun mi tampi kha
an ra lai,
phun tampi kha an ra lai i,
2“Ra u law Bawipa tlang ah cun
kai hna u si,
Jakob Pathian inn ah cun
kal hna u si,
Kannih cu a lam kha
kan cawnpiak seh law
A lam cu kannih nih zul u si,”
an ti lai.
Zeicahtiah cawnpiaknak cu
Zion in a chuak i,
Bawipa bia cu Jerusalem khua in a ra;
3Amah cu miphun tampi hna biaceihtu
kha a si lai i,
Lam hlat pipi i a ummi miphun
ṭhawngṭhawng hna karlak i
biakhiaktu a si lai.
Annih nih an vainam hna cu tuhmui
ah an ser hna lai i an fei hna cu
hlawhkawi ah an ser hna lai;
Miphun pakhat nih miphun pakhat
cungah a vainam kha a hler
ti lai lo i,
Raltuk zong kha an i cawnpiak
ti lai lo; #Joe 3.10
4Pakhat le pakhat ahohmanh
hnahnawhnak i pe lo tein
Anmahle an mitsur ruang toi cio le
an theipi kung toi cio ah
khua an sa hna lai;
Zeicahtiah hi bia cu ralkapbu Bawipa
hrimhrim nih a chimmi a si. #Zek 3.10
5Mi vialte hna cu anmahle an pathian
min cio ah an kal ko lai,
Sihmanhsehlaw kannih cu Bawipa kan
Pathian min in a zungzal in
kan kal lai.
6Khi ni ah cun a tlaumi kha
ka pumh hna lai i,
Raltangmi kha ka khawmh hna lai i
a derthawmmi kha
thazang ka pek hna lai.
7A tlaumi kha a tangmi bantukin
ka kilkawi hna lai i
Zohkhenh ti lomi kha a ṭhawngmi
miphun ah ka ser hna lai, tiah
Bawipa nih a ti.
Bawipa cu Zion tlang cungah atu le
zungzal in an siangpahrang a si lai.
8Cun nang, lung in sermi innsang,
Zion fanu tlang,
Nangmah sin i biakamnak sermi
vialte kha ka tlinter lai;
Hmasa lio na bawinak kha
a ra kir ṭhan lai i
Jerusalem fanu nih uknak
na rak ngeihmi zong kha
a ra kir ṭhan lai.
9Zeicahdah atu hi a lau in nan lau?
Siangpahrang nan ngei lo maw?
Fimchimtu a tangmi nan ngei
lo maw?
Zeicahdah nau nganfah a ing liomi
nu bantukin a ngerh in
nan i ngerh len ko?
10Nau nganfah a ing liomi nu bantukin
vawlei ah i ngerh len tuah,
Maw Zion fanu;
Zeicahtiah atu cu hi khuapi hi
na kaltak lai i
ramlak ah na riak lai;
Cuticun Babilon ah na ra lai.
Khika ah khin khamh na si lai i
khika ah khin Bawipa nih na ral hna
kut chungin an luatter lai.
11Sihmanhsehlaw atu cu miphun
tampi nih an in chuahhnawh i,
“Hremnak ing seh, Zion cungah
kan diriam seh,” an ti.
12Sihmanhsehlaw annih nih Bawipa
ruahnak kha an hngal lo i
aa tinhmi zong kha
an hngalthiam lo.
A ngaingai ti ahcun, annih kha
phuhri i faphal pumh bantukin
a pumtu hna cu
Bawipa kha a si.
13Na facang cil cu thawk cang tuah,
Maw Zion fanu,
Zeicahtiah na ki cu thir in ka ser lai i
na tin cu dar in ka ser hna lai i
Miphun tampi kha na naan hna lai.
A ding loin an rak lakmi thil kha
Bawipa sinah
na pek ṭhan hna lai i,
An chawva hna cu vawlei cung
dihlak uktu Bawipa sinah
na chanh hna lai.
Currently Selected:
MIKAH 4: HCL06
Highlight
Copy
Compare
Share
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
