JOSHUA 5
5
Gilgal Ah Cuarpartannak le Lanhtak Puai An Tuah
1Jordan khattelei ral nitlaklei i a ummi Amor mi hna siangpahrang vialte le rili pawngah a ummi Kanaan mi siangpahrang vialte nih Israel mi caah an tan dih hlantiang Jordan tiva ti cu Bawipa nih a kaoter tiah an theih tikah, Israel mi hna ruangah cun an thin a phang i an chungah thlarau zeihmanh a um ti lo.
2Khi caan ah Bawipa nih Joshua cu, “Ṭeklung namte ser hna law, Israel mi cu a voi hnihnak an cuarpar tan ṭhan hna,” tiah a ti. 3Cucaah Joshua nih ṭeklung namte cu a ser hna i Gibeath-haaraloth ah Israel mi cu an cuarpar a tan hna. 4Cun mah hihi Joshua nih zei ruangah dah an cuarpar a tan hnanak cu a si: Izipt ram in a chuakmi pa vialte, ralkap vialte kha Izipt ram in an chuah hnuah ramlak ah khan lampi ah an thi dih. 5A chuakmi pa vialte kha cuarpar tan an rak si nain, Izipt ram i an chuah hnu ramlak i lampi ah a chuakmi vialte hna tu kha cu cuarpar tan lo an si. 6Bawipa aw kha an rak ngaih lo caah, an phun ningin, Izipt ram in a chuakmi ralkap vialte, an rawh dih hlantiang, Israel mi hna cu ramlak ah khan kum sawm li an rak vai; kannih pek awkah Bawipa nih kan pupa hna sinah chiat a sermi, cawhnuk le khuaihliti in a luangmi ram kha annih nih hmu lo dingin annih sinah Bawipa nih chiat a ser. #Nam 14.28-35 7Cucaah Joshua nih an cuarpar a tanmi hna cu anmah can ah Pathian nih a dirhmi an fale hna kha an si; lampi ah cuarpartan lo an rak si caah khan cuarpar tan loin an rak um ko.
8An phun ningin an cuarpar tannak a dih tikah, an dam tiang riahhmun i an umnak cio ah cun an um. 9Cun Bawipa nih Joshua sinah cun, “Nihin ni ah hin nan sinin Izipt mi nih an in nihsawh hnanak cu ka hrilh cang,” tiah a ti. Cucaah cu ka hmun min cu nihin tiangin Gilgal ti a si.
10Israel mi hna cu Gilgal i an riah lioah, Jeriko nelrawn ah cun, cu thla ni hleili ni zanlei ah lanhtak puai kha an tuah. #Exo 12.1-13 11Cun lanhtak puai a thaizing, cu ni hrimhrim ah cun, cu ram in a chuakmi, thilnu cawh lo chang le vaireu kha an ei. 12Cun cu ram in a chuakmi an ei tikah, a thaizing in manna kha a dong i Israel mi nih manna kha an ngei ti lo; sihmanhsehlaw cu kum ah cun Kanaan ram in a chuakmi thil kha an ei. #Exo 16.35
Joshua le Vainam Aa Zuhmi Mipa Kong
13Joshua cu Jeriko khua pawngah a um tikah a mit a hun hler i a hun zoh i, zohhmanh, a hmaiah mipa pakhat a vainam zuh cia in a dir; Joshua cu a sinah a va kal i amah cu, “Kanmah caah maw na si, kan ral hna caah dah na si?” tiah a ti. 14Cun anih nih, “Sihlah; sihmanhsehlaw Bawipa ralkapbu hruitu in ka ra,” tiah a ti. Cun Joshua cu vawlei ah a bawk i a biak i, “Ka bawipa nih a salpa a fialmi cu zeidah a si?” tiah a ti. 15Cun Bawipa ralkapbu hruitu nih cun Joshua sinah cun, “Na kedan kha i phoih hna; zeicahtiah na dirnak kha hmun thiang a si,” tiah a ti. Cun cu bangin Joshua nih a tuah.
Currently Selected:
JOSHUA 5: HCL06
Highlight
Share
Compare
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
