JOSHUA 4
4
Jordan Chungin Lung Hleihnih
1An phun ning piin Jordan tiva kha an tan dih tikah, Bawipa nih Joshua cu a chawnh i, 2“Mi zapi chungin mi hleihnih, phun khat in pakhat cio, la hna law, 3‘Hika hin, Jordan tiva chung hin, tlangbawi hna ke a dirnak hmun thengte khan, lung hleihnih in la u law, i put hna u law, tuzan i nan riahnak hmun ah chia hna u,’ tiah nawl pe hna,” tiah a ti. 4Cun Joshua nih Israel mi chungin mi hlei hnih hna cu, phun khat in pakhat cio a thimmi hna cu, a kawh hna i 5Joshua nih an sinah, “Bawipa nan Pathian kuang hmaiah cun Jordan tiva laifang ah khan nan va kal lai i Israel mi phun zat in, nan liang in pakhat nih lung pakhat cio nan put lai, 6cun hmailei caan ah nan tefa hna nih, ‘Hi lung hna hi nan caah zei sullam dah an si?’ tiah an in hal tik hna ah, mah hihi nan lakah hmelchunhnak a si lai. 7Khi tikah nannih nih Bawipa biakamnak kuang hmaiah Jordan tiva ti cu a cat; Jordan kha a tan tikah Jordan ti cu a cat, tiah nan chimh hna lai. Cucaah hi lung hna cu Israel mi caah zungzal hngalh camcinnak an si lai,” tiah a ti.
8Cun Israel mi hna nih cun Joshua nih nawl a pek hna bangin an tuah, Bawipa nih Joshua a chimh bang khan, Jordan tiva chungin, Israel miphun zat in, lung hleihnih cu an lak i an riahnak hmun ah an i kalpi hna i khika ah an chiah hna. 9Cun Joshua nih Jordan tiva laifang, biakamnak kuang a putu tlangbawi hna ke dirnak hmun ah khan, lung pahleihnih a bunh hna i khika ah nihin ni tiangin an um ko. 10Moses nih Joshua nawl a rak pekmi vialte bangin Bawipa nih Joshua cu mi zapi kha chimh hna awkah nawl a pekmi vialte a dih hlantiang, kuang a zawntu tlangbawi hna cu Jordan tiva chungah an dir.
Mi zapi nih cun hnawhnam in an tan; 11cun mi vialte nih cun an tan dih tikah Bawipa biakamnak kuang le tlangbawi hna cu zapi hmaiah cun an kal. 12Reuben fapa hna le Gad fapa hna le Manasseh phun cheu hna kha Moses nih a rak chimh hna bang khan Israel mi hmaiah cun hriamnam i ken in an kal; 13ral doh dingah timh cia tein ralthuam in aa thuammi mi sang li tluk, Bawipa hmaiah ral doh awkah, Jeriko nelrawn leiah cun an kal. 14Khi ni ah Bawipa nih Joshua cu Israel mi vialte hmaiah a hlorh i Moses an rak ṭihzah bantuk khan amah cu a chan chung vialte an ṭihzah ve.
15Cun Bawipa nih Joshua cu a chawnh i, 16“Hngalhternak bia kuang a zawntu tlangbawi hna kha Jordan in hung chuah awkah nawl pe hna,” tiah a ti. 17Cucaah Joshua nih tlangbawi hna cu, “Jordan tiva in hung chuak u,” tiah nawl a pek hna. 18Cun Bawipa biakamnak kuang a zawntu tlangbawi hna kha Jordan tiva chungin an chuah i tlangbawi hna keza nih cun lei ro a tawngh tikah, Jordan tiva ti cu an umnak ah an kir ṭhan i hmasa bantuk khan a kuang cu a liam ko.
19Thla hmasa bik thla, a ni hra ni ah, mi hna cu Jordan in an hung chuak i Jeriko nichuahlei ramri i a ummi Gilgal ah an riak. 20Cun Jordan chungin an lakmi lung hleihnih hna kha Joshua nih Gilgal ah a phun hna. 21Cun Israel mi hna sinah cun, “Hmailei caan ah nan fale hna nih an pale hna cu, ‘Hi lung hi zei sullam dah an si?” tiah an hal tik hna ah, 22khi tikah nan fale hna cu, ‘Israel mi nih hi. Jordan hi vawlei ro cungin an rak tan,’ tiah nan hngalhter hna lai. 23Bawipa nan Pathian nih kan tan dih hlantiang kan caah a cartermi Rili Sen cungah a tuah bang khan, Jordan tiva ti cu nan tan dih hlantiang a carter, 24zeitintiah vawlei cung mi vialte nih Bawipa kut cu a ṭhawng ti kha an hngalh nakhnga le Bawipa nan Pathian cu zungzal in nan ṭih nakhnga,” tiah a ti.
Currently Selected:
JOSHUA 4: HCL06
Highlight
Share
Compare
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
