JOSHUA 17
17
1Cun Manasseh phun kha vo pek an si, amah cu Josef fater kha a si. Manasseh fater Makhir, Gilead pa cu ralkap a si caah Gilead le Bashan kha pek a si. 2Cun Manasseh phun chung i a taang rihmi hna cu an innchungkhar ning cio ah vo phawt an si, Abiezer, Helek, Asriel, Shekhem, Hefer le Shemida; mah hna hi Josef fapa Manasseh i a tefa hna cu pa lei in an innchungkhar ning cio ah an si.
3Manasseh fapa Makhir fapa Gilead fapa Hefer i fapa Zelofehad cu fapa a ngei lo, fanu lawnglawng a ngeih hna; mah hna hi a fanule hna min cu an si: Mahlah, Noah, Hoglah, Milkah, le Tirzah. 4Tlangbawi Eleazar le Nun fapa Joshua le haotu hna sinah cun an ra i, “Bawipa nih Moses cu, kan unau hna sinah covo kan ngeih ve nakhnga, nawl a pek,” tiah an ti. Cucaah Bawipa nawlbia bang cun an pa unau hna lakah cun covo a pek ve hna. #Nam 27.1-7 5Cuticun Manasseh nih vo hra a co, Jordan khattelei ral i a ummi Gilead le Bashan ram hleiah; 6zeicahtiah Manasseh fanu hna nih a fapa hna he vo an co ve caah a si. Gilead ram cu Manasseh mi a dang hna nih cun an co.
7Manasseh ram cu Asher in Shekhem nichuahlei i a ummi Mikmethath tiang a phan; cun ramri cu thlanglei ah En-Tappuah mi umnak tiangin a vung kal. 8Tappuah ram cu Manasseh ta a si, sihmanhsehlaw Manasseh ramri i a ummi Tappuah khua cu Efraim fapale hna ta a si. 9Cun ramri cu Kanah tivate ah a vung kal. Hi tivate thlanglei i a ummi, Manasseh khua hna lak i a ummi khua hna hi cu Efraim ta an si. Cun Manasseh ramri cu cu tiva chaklei kam cun a kal i rili ah a dong; 10thlanglei kam cu Efraim ram a si i chaklei kam cu Manasseh ram a si, ramri ah cun rili a si; chaklei ah Asher a phan, nichuahlei ah Issakhar a phan. 11Cun Issakhar le Ahser chung zongah cun Beth-shean le a khuate hna, Ibleam le a khuate hna, Dor le a khuate hna, i a ummi hna Endor le a khuate hna i a ummi hna Taanak le a khuate hna i a ummi hna, Megiddo le a khuate hna i a ummi hna cu Manasseh ta an si; a pathumnak cu Nafath a si. 12Sihmanhsehlaw Manasseh fapa hna nih cu khuami hna cu an pawnchuah kho hna lo; Kanaan mi hna cu cu ram ah cun an i benh peng ve ko. #Biac 1.27-28 13Sihmanhsehlaw Israel mi kha an hung ṭhawn tikah Kanaan mi hna cu hnekmi rian kha an ṭuanter hna i an dawi dih cikcek hna lo.
14Cun Josef phun nih Joshua kha an chawnh i, “Kei cu atu tiangah Bawipa nih thluachuahnak a ka pek caah mi tampi ka si nain, zeicahdah covo pakhat le hmun pakhat lawnglawng na ka pek?” tiah a ti. 15Cun Joshua nih annih cu, “Nannih cu mi tampi nan si ahcun, tupi ah khin hung kal u law, Periz mi le Refaim mi hna ram ah lo hung vat ngat u, Efraim tlangram cu nan caah a bit tuk ṭung cu ta,” tiah a ti hna. 16Josef phun nih cun, “Tlangram cu kan caah cun aa za lo; sihmanhsehlaw rawn i a ummi Kanaan mi vialte hna cu Beth-shean le a khuate i a ummi nih si hna seh, Jezreel Nelrawn i a ummi nih si hna seh thir rangleng an ngei,” tiah an ti. 17Cun Joshua nih Josef tefa Efraim le Manasseh sinah cun, “Nannih cu mi tampi nan si i nan ṭhawng ngaingai; vo pakhat lawng nan co lai lo, 18sihmanhsehlaw tlangram cu nan ta a si lai, tupi a si nain nan vah lai i a deng tiangin nan co lai; Kanaan mi hna cu thir rangleng an ngei i an ṭhawng nain nan ṭhawl hna lai,” tiah a ti.
Currently Selected:
JOSHUA 17: HCL06
Highlight
Share
Compare
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
