JOB 6
6
Job Nih A Hawile Kha A Sik Hna
1Cun Job nih a leh i:
2“Ka thinlinhnak hi a khing thlai hei si seh law,
Ka vanchiatnak hi a cuai thlai hei si
seh law ka hei duh hnga dah!
3Rili thetse nakin a rit deuh ko hnga,
Cucaah cun pei ka bia hi a bultan cu.
4Zeicahtiah Lianngan Bik nih a thal in
a ka kah i
A sivai nih ka thlarau cu a ciah.
Pathian ṭihnunnak nih cun hmaitonh
in an ka tianhnawh.
5Ramlak laa cu ram a ṭam lioah
a awn bal maw?
Cawtum tah ramrawl a ei lioah
a paw bal maw?
6Thawtnak a ngei lomi rawl,
cite phulh lomi cu
aho nih dah an ei khawh?
Arti hawng ah khin zeital thawtnak
a um maw?
7Cu bantuk rawl cu ka duh hna lo i
ka caah fihnung an si.
8“Ka halmi cu hei hmu ning law,
Pathian nih ka duhmi cu hei ka pe
seh law,
9Pathian nih hei ka rial cikcek dih
seh law,
A kut kha hei samh seh law hei ka lek
ko seh law, ka hei duh hnga dah!
10Mah hihi ka hnangamnak
a si ko hnga;
Zawnruahnak ngei lo fahnak ah cun
kaa lawm ko hnga;
Zeicahtiah Mi Thiang bia cu
ka hlaw hna lo.
11Hngah rih khawhnak ding caah
thazang ka ngei ti hnga maw?
Zei donghnak i ruahchan in dah
lungsau in ka um rih hnga?
12Ka thazang cu lung thazang maw
a si?
Ka titsa cu dar dah a si?
13Biatak tein, keimah chungah hin
bawmtu zeihmanh a um lo,
Thazang petu paohpaoh cu ka sinin
an zam dih.
14“Mahle hawi cung i zaangfahnak
a ngei lomi cu
Lianngan Bik ṭihnak a hlawmi a si.
15Ka unaule hna cu tivacek bantuk hlen
hmangmi an si,
Tivate a kuang a liammi bantuk an si;
16An chungah tikhal a um caah an nak i
An chungah hawhra tlang kha
an i thup.
17A linh caan a phak tikah an lo,
A sat tikah an umnak hmun in
an lo.
18A run in khual a tlawngmi hna nih
an hun pialhnawh hna,
Ramlak ah cun an hun luhhnawh
hna i an thi tawn.
19Tema khualtlawng run hna nih ti cu
an kawl,
Sheba khualtlawng mi hna nih an
an i ruahchan.
20An rak i zumh caah khan an hnabei
a dong,
Cuka cu an phan i an lung a ar.
21Cu bantuk ah cun ka caah hin
nan i cang,
Ka chiatnak kha nan hmuh i
nan ṭih.
22‘Laksawng ka pe tuah u,’ ka ti maw?
Asiloah, ‘Nan chawva chungin
zik ka nawhpiak tuah u,’
ka ti dah?
23Asiloah, ‘Hi ral kut chung hin
ka chuah u,’ ka ti maw?
Asiloah, ‘Hremtu hna kut chungin
ka tlan u,’ ka ti dah?
24“Ka cawnpiak u law, dai tein
ka um ko lai;
Zeitindah ka palhnak a si kha
ka hngalhter tuah u.
25Fimnak in ṭha tein chimh ahcun
ka lung a pem sawk hnga,
Sihmanhsehlaw nan chimmi cu
pakpalawng a si.
26Ka bia cu leh nan ka duh maw?
A hnabei a dong cangmipa nih
a chimmi cu thli lawng pei
a si ko cu.
27Ngakṭah hna sal i lak awkah
camcawhfung hmanh
nan khiah ko hnga i
Nan hawi ṭha bik hmanh cu
chawlehnak ah
nan hman ko hnga.
28Sihmanhsehlaw atu cu ka zoh hnik u,
Nan hmaiah ka lih hrimhrim lai lo.
29Ruat rih hmanh u, dinlonak cu
ka cungah tuah si hin ti hlah seh,
Cun ka ṭhatnak cu zumh lo bantukin
um a si caah hin, ruat rih hmanh u.
30Ka leiah hin palhnak zeital
a um maw?
A ding le a dinglo kha thleidang
kho loin maw ka um?
Currently Selected:
JOB 6: HCL06
Highlight
Copy
Compare
Share
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
